قاڭتاردا كوكپارلاتىپ شاپقان قانداي - فوتو
اۋداندا قىتايدىڭ ءىشى- سىرتىنا تانىمال ايگىلى قاناس كولى ورنالاسقان. التاي تاۋىنىڭ بيىك توسىندە جاتقان كول قىتايداعى ەڭ تەرەڭ كولدەردىڭ ءبىرى. جازدا جاسىل جەلەك جامىلعان قاناستىڭ سۇلۋ تابيعاتى، ايناداي مولدىرەگەن ايدىنى الىس- جاقىننان كەلگەن ساياحاتشىلاردى وزىنە تارتادى. ال، قىستا دا ءوز ەرەكشەلىگىمەن كورگەن جاندى ءتانتى ەتەدى.
بيىلىعى جاڭا جىل مەرەكەسىن اۋدان جۇرتى وسى كورىكتى كولدىڭ قار جامىلعان القابىندا اتاپ ءوتتى. ۇلتتىق ويىندار ۇيىمداستىرىپ، ءداستۇردى جاڭعىرتقان اۋدان جۇرتى، قار جامىلعان كول بەتىن ات تۇياعىمەن دۇبىرلەتىپ، ءاپپاق كورپە جامىلعان التاي تاۋلارىن ۇيقىسىنان وياتقانداي بولدى.
اسىرەسە، ۇلتتىق ويىنداردىڭ ىشىندەگى ەلدىڭ ارقاسىن قوزدىرىپ، قانىن تۋلاتقان كوكپار ەدى. تاناۋىنان قۇشاق- قۇشاق بۋ ۇرلەپ، بوز قىراۋ جامىلعان تۇلپارلار قۇرىش تاقىم جىگىتتەرگە قانات بىتىرگەندەي. باستارىنا تۇلكى تىماق، زەر شاپان كيىپ، الەكەدەي جالاعان ازاماتتار، كوكپاردىڭ لاعىن ات ۇستىنەن اسپانعا اتىپ، بىرىنە- ءبىرى دەس بەرمەي تارتىستى. قالادا شىرشا قۇرىپ، ساليۋت اتقان دا ءجون شىعار، ءبىراق ءار مەرەكەگە وسىلاي ۇلتتىق ءوڭ- ءتۇس بەرىپ، ءداستۇردىڭ ساباقتاستىعىمەن جالعاپ جاتساق نەسى ايىپ؟ ! قايتا كورگەن جاننىڭ كوڭىلىنە قۋانىش سىيلاپ، جاس ۇرپاقتىڭ ساناسىنا بابالار رۋحىن سىڭىرمەي مە!
سونىمەن، قاڭتاردا مۇزدى كولدى قاقىراتىپ، بۋىرقانا كوكارلاتقان ويىن ساتتەرىنەن تۇسىرىلگەن فوتولاردى نازارلارىڭىزعا ۇسىنايىق!
ايتپاقشى، اتا ءداستۇردى جالعاپ جاتقان بۋىرشان اۋدانى بىلتىرعى جىلى قىتايداعى ەڭ كورىكتى اۋداندارىڭ قاتارىنا كىرىپ، 8 ورىن يەلەنگەنىن دە ايتا كەتەيىك. جانە وسى اتاققا يە بولعان شىڭجاڭداعى بىردەن- ءبىر اۋدان بولدى. اتالعان بايقاۋعا بۇكىل قىتاي بويىنشا 2 مىڭ اۋدان تۇسكەن بولاتىن. كورىكتى اۋدانداردى باعالاۋدا قالاسىنىڭ جوبالانۋى، ەلىنىڭ ەجەلگى سالت- ءداستۇر، تاريحي جوسىنى، ءۇي- قۇرىلىستارىنىڭ ۇلگىسى، اۋىل- قىستاق وركەنيەتى، تابيعاتى، تانىمالدىعى ءبارى ەسكەرىلگەن.
مۇرات الماسبەك ۇلى
qiyan.kz
