بىرەۋدى «كاپىرسىڭ» دەپ سوگۋدىڭ سالدارى قانداي؟

استانا. قازاقپارات - «كەيدە نامازى نەمەسە كورقاراسى ءبىر جەردەن شىقپاي قالسا، مۇسىلمان باۋىرلار ءبىر-بىرىنە «سەن كاپىر بولدىڭ» دەپ قاتتى ايتىپ جاتادى. وسىلاي ايتۋعا قۇقىلى ما، ونىڭ زالالى بار ما؟» دەگەن سۇراققا جاۋاپ ىزدەپ كورەلىك.

بىرەۋدى «كاپىرسىڭ» دەپ ايىپتاۋ - وتە قاۋىپتى ءارى سالدارى جامان. مۇسىلمان ءوزى سياقتى ادامعا مۇنداي ايىپ تاعۋىنىڭ زاردابى وزىنە اينالىپ كەلىپ ءتيۋى ابدەن مۇمكىن.

بۇل ءسوزدى ايتۋ ءۇشىن ەشبىر ءشۇباسىز، ەكى ۇشتى ماعىناسى جوق بۇلتارتپاس دالەل بولۋى تالاپ ەتىلەدى. دەمەك، تەك كوزىڭىز شالىپ قالعان نەمەسە قۇلاعىڭىز ەمىس ەستىپ قالعان جايتقا سۇيەنۋگە بولمايدى.

سوندىقتان، مۇنداي قورىتىندىنى تەك ۇلكەن ءدىني دارەجەسى بار نەمەسە شاريعي سوت قانا شىعارا الادى. ابدۋللا بين ومار (ر. ا. ) بۇعان قاتىستى: «قايسى ءبىر كىسى ءوزىنىڭ (دىندەس) باۋىرىنا «ەي، كاپىر» دەپ ايتسا، ول ءسوز ەكەۋىنىڭ بىرىنە بارىپ تيەدى[1]»، - دەگەن ريۋايات جەتكىزەدى.

ال، ءسابيت بين داححاك (ر. ا. ): «كىمدە- كىم وتىرىك بولسا دا يسلام دىنىنە جات نارسەمەن سەرت ەتسە، ول ءوزى ايتقانىنداي بولماق. ال، كىمدە- كىم ءوزىن ءبىر زاتپەن ولتىرسە، سول زاتپەن جاھاننام وتىندا ازاپتالادى. ال، كىمدە-كىم مۇسىلماندى لاعىنەت ەتسە، ونى ولتىرگەنمەن بىردەي. ال، كىمدە- كىم مۇسىلماندى كۇپىرلىكپەن ايىپتاسا، ونى ولتىرگەنمەن تەڭ[2]»، - دەگەن.

يمام ءتاحاۋيدىڭ كىتابىندا: «ءبىزدىڭ قۇبىلامىزعا بەت تۇزەۋشىلەردى، ولار پايعامبارىمىز (س. ع. س. ) الىپ كەلگەن ءدىندى مويىندايتىن بولسا، مۇسىلمان دەپ اتايمىز... [3]»، - دەپ مىنا حاديستى: «مەن ادامداردىڭ سىرتقى بولمىسىنا قاراپ تورەلىك ايتۋعا جىبەرىلدىم، ال اللا تاعالا ولاردىڭ ىشكى بولمىسىنا بيلىك ەتەدى[4]»، - دەپ كەلتىرىلگەن.

قورىتا ايتقاندا، قانداي جاعداي بولماسىن، ادامنىڭ يمانىنا قول سۇعۋدان ساق بولۋ قاجەت.

[1] بۇحاري

[2] بۇحاري

[3] شارح اقيدا ءات- تاحاۋيا، 89-بەت

[4] جوعارىداعى سىلتەمە

رۋسلان كامباروۆ

muslim.kz