شاڭحايداعى جاپپاي باستىرىلۋ ءۇشىن پوليتسيا جاۋاپكەرشىلىكتى مويىندادى
بۇل تۋرالى روسبالت حابارلادى.
«پوليتسيا ساعات 23:20 عا قاراي ادامدار ءنوپىرىنىڭ ارتا تۇسۋىنە دەر كەزىندە ارالاسپاعانىنا وكىنەدى»، - دەپ DW اگەنتتىگى شاڭحايداعى حۋانپۋ اۋدانى پوليتسيا باستىعىنىڭ ورىنباسارى ساي ليسيننىڭ ءسوزىن كەلتىرگەن.
مەرەكەگە ءبىر اپتا قالعاندا قالالىق بيلىك ادامداردىڭ كوپتەپ شوعىرلانۋىنان قاۋىپتەنىپ حۋانپۋدا جوسپارلانعان لازەرلىك شوۋدى الىپ تاستاعان بولاتىن. دەگەنمەن وندا 300 مىڭنان استام ادام جينالدى.
جاڭاجىلدىق تۇندەگى ءتارتىپتى نەبارى 700 قۇقىق قورعاۋ ورگاندارىنىڭ قىزمەتكەرلەرى كۇزەتتى، قىسپاق باستالعاننان كەيىن عانا وعان تاعى 500 پوليتسەي اتتاندىرىلدى.
ساي ليسين جاپپاي سىعىلىسۋ كوپ قاباتتى عيماراتتاردىڭ بىرىنەن جۇرتقا ءجۇز دوللارلىق اقشاعا ۇقساس جارنامالىق كۋپون لاقتىرىلعاننان كەيىن باستالدى، دەگەن ءۋاجدى جوققا شىعاردى. «بۇل ۇرەي باستالعاننان كەيىن بولدى»، - دەپ اتاپ كورسەتتى پوليتسەي.
بۇدان بۇرىن بيلىك شاڭحايدىڭ باستى تۋريستىك كورىكتى ورىندارىنىڭ ءبىرى بولىپ سانالاتىن ۆايتان جاعالاۋىنداعى قىسپاق كەزىندە قازا بولعان 36 ادامنىڭ 32 سىنىڭ ءتىزىمىن جاريالادى. بايانداماعا قاراعاندا، ولاردىڭ كوپشىلىگى - ايەلدەر بولعان. قازاعا ۇشىراعانداردىڭ اراسىندا كامەلەتكە تولماعان ەكى جاسوسپىرىم بار، ولاردىڭ بىرەۋى - 12 جاستا.
اۋەلى ب ا ق- تا قىسپاق بيىك ۇيلەردىڭ توبەسىنەن ونداعان دوللارلىق بانكنوتتار لاقتىرىلعاننان كەيىن باستالدى دەپ حابارلادى. جەلىدە قايعىلى قىسپاققا سەبەپشى بولعان وسى «اقشا بەلگىلەرىنىڭ» سۋرەتتەرى پايدا بولدى. دوللار كۋپيۋرالارىنىڭ كوشىرمەلەرىنە «باقىتتى 2015 -جىلمەن!» دەگەن جازۋلار جازىلعان.
