قىتايدا قازاق ءتىلدى اقپارات قۇرالدارىنىڭ جۇمىسى كەڭەيۋدە

استانا. قازاقپارات - قىتاي استاناسى بەيجىڭدەگى قازاق ءتىلدى اقپارات قۇرالدارى جۇمىسىن كەڭەيتتى.

جاڭا جىلدان باستاپ ورتالىق ۇلتتار راديوسىنداعى قازاق ءبولىمى 18 ساعات اۋە تولقىنىنا شىعادى. بۇرىن 7 ساعات جۇمىس ىستەيتىن. بۇدان بولەك ورتالىق CCTV تەلەارناسىنا قارايتىن ينتەرنەت تەلەارنا رەسمي تۇردە ىسكە قوسىلدى.

قىتايداعى بەس ۇلتتىڭ تىلىندە سويلەيتىن ۆيدەو پورتال ەلدەگى ساياسي، ەكونوميكالىق، مادەني جاڭالىقتاردى جەدەل تاراتىپ قانا قويماي، قىتاي تىلىندەگى حابارلاردى اۋدارىپ، جاريا قىلادى. سونىمەن قاتار، قىتاي حالىقارالىق راديوسى «جاڭا جىبەك جولى» دەپ اتالاتىن ۇيالى تەلەفون قوسىمشاسىن شىعاردى.

بۇل قازاقستان مەن قىتاي اراسىنداعى كيريلل قارپىمەن قازاقشا حابار تاراتا باستاعان العاشقى جوبا بولىپ وتىر. ونىڭ اشىلۋىنا قىتايداعى قازاقستان ەلشىلىگىنىڭ قىزمەتكەرلەرى قاتىستى. الەمدەگى 65 ەلدىڭ تىلىندە اقپارات بەرەتىن راديو وسىلايشا قازاق-قىتاي قارىم-قاتىناسىن ناسيحاتتاپ، جىبەك جولى ەكونوميكالىق بەلدەۋىندەگى ەكى ەلدىڭ اقپاراتتىق الماسۋىنا مۇددەلى.

رىن چەن، قىتاي حالىقارالىق راديوسى باسشىسىنىڭ ورىنباسارى:

- قازاقستان مەن قىتاي اراسىنداعى ەكونوميكالىق مادەني بايلانىستى ناسيحاتتاپ، ارىپتەستىكتى نىعايتۋعا ءوز ۇلەسىمىزدى قوسقىمىز كەلدى. قازىر حالىقتىڭ باسىم بولىگى، ىسكەر ازاماتتار ۇيالى تەلەفونىن سويلەسۋ ءۇشىن عانا ەمەس، اقپارات الۋ ءۇشىن دە پايدالانادى. سوندىقتان «جاڭا جىبەك جولى» قوسىمشاسى ارقىلى قىتايدى قازاقستانعا، قازاقستاندى قىتاي ازاماتتارىنا تانىستىرۋعا بولادى.

24.kz