استانادا ۋكرايناداعى جاعدايعا بايلانىستى كەلىسسوزدەر «نورماند فورماتىندا» وتەدى
بۇل فورماتتاعى كەزدەسۋگە ۋكراينا، رەسەي، گەرمانيا جانە فرانسيا باسشىلارى قاتىسادى، دەپ حابارلايدى ر ب ك.
كەزدەسۋدىڭ دايىندالىپ جاتقاندىعى جونىندە پوروشەنكو ۋكراينالىق «ءبىرىنشى ۇلتتىق ارنادان» ترانسلياسيالانعان باسپا ءسوز ءماسليحاتىندا ءمالىم ەتتى. ۋكراينا پرەزيدەنتىنىڭ سوزىنە قاراعاندا، قازىر «بۇل سامميتتە قارالاتىن ماسەلەلەر جوباسى پىسىقتالۋدا» .
پوروشەنكو مينسكى توبىنىڭ كەزدەسۋلەرىن جالعاستىرۋعا كيەۆ مۇددەلى ەكەنىن اتاپ ءوتتى. ول مۇنىمەن قاتار جەنيەۆا فورماتىنا قايتا ورالۋ، ياعني كەلىسسوزدەرگە ە و، ا ق ش، رەسەي جانە ۋكراينا تاراپتارىنىڭ قاتىسۋى مۇمكىندىگىن دە جوققا شىعارمادى.
22 - جەلتوقساندا پوروشەنكو، پۋتين، وللاند پەن مەركەل تەلەفون ارقىلى كەلىسسوزدەر جۇرگىزدى. ونىڭ اياسىندا تاراپتار 24-26 - جەلتوقسان ارالىعىندا مينسكى توبىنىڭ كەزەكتى كەزدەسۋىن وتكىزۋگە ۋاعدالاستى. مينسكىدەگى كەلىسسوزدىڭ قورىتىندىسى بويىنشا ل ح ر باسشىسى يگور پلوتنيتسكي، جالعىز ناتيجە - كيەۆ جانە حالىق رەسپۋبليكالارى اراسىنداعى تۇتقىنداردى ايىرباستاۋ تۋرالى كەلىسىم بولعانىن اتاپ ءوتتى.
مۇنىڭ الدىندا ءتورت ەلدىڭ كوشباسشىلارىنىڭ كەزدەسۋى قازان ايىنىڭ ورتاسىندا ميلاندا وتكەن. وندا كەزدەسۋدىڭ نەگىزگى تاقىرىبى رەسەي مەن ۋكراينا اراسىنداعى گاز توڭىرەگىندەگى داۋ بولعان ەدى. كەزدەسۋ قورىتىندىسى بويىنشا پۋتين، تاراپتار گاز قۇنىن $100 جەڭىلدىكپەن قايتا ەسەپتەپ، ۋكراينالىق قارىزدى ازايتۋ تۋرالى كەلىسىلگەنىن ءمالىم ەتتى.
دونەتسك جانە لۋگانسك وبلىستارىندا ازىرگە وق اتۋدى توقتاتۋ جانە ۋكراينالىق اۋىر ارتيللەريانى شىعارۋ ماسەلەسى تولىعىمەن شەشىلگەن جوق. 25 - جەلتوقساندا ۋكراينا باس شتابىنىڭ ءتوراعاسى الەكساندر روزمازنين مالىمدەگەندەي، ۋكراينا اسكەرى تىنىشتىق رەجىمى ساقتالعان جاعدايدا عانا دونباستان اۋىر ارتيللەريانى شىعارا باستايدى.
د ح ر مەن كيەۆ اراسىندا العاش رەت وق اتۋدى توقتاتۋ تۋرالى قىركۇيەك ايىندا ۋاعدالاسقان بولاتىن.
ال مينسكىدە 5 جانە 19 - قىركۇيەكتە وتكەن كەلىسسوزدەردە اۋىر قارۋلاردى دونەتسك جانە لۋگانسك وبلىستارىنان شىعارۋعا جانە 30 شاقىرىمدىق قاۋىپسىزدىك ايماعىن قۇرۋعا كەلىستى.
