اقمولادا كۇش اتاسى قاجىمۇقانعا ەسكەرتكىش ورناتىلدى
قاجىمۇقانعا ەسكەرتكىش سەلينوگراد اۋدانىنىڭ قاجىمۇقان اۋىلىندا ورناتىلدى. ەسكەرتكىشتىڭ اشىلۋ سالتاناتىنا وبلىس اكىمى سەرگەي كۋلاگين، زيالى قاۋىم وكىلدەرى مەن مەملەكەت جانە قوعام قايراتكەرلەرى قاتىستى. پالۋانعا ورناتىلعان ەسكەرتكىشتىڭ بيىكتىگى 3,6 مەتر، تۇعىرى 3,2 مەتر جانە ەنى 2 مەتر شاماسىندا.
ەسكە سالا كەتسەك، وسىعان دەيىن ق ر پارلامەنتى دەپۋتاتتارى ۇكىمەت باسشىسىنا ەلوردامىز استانا قالاسىندا كۇش اتاسى قاجىمۇقان مۇنايتپاسوۆقا ەسكەرتكىش ورناتۋ جونىندە ۇسىنىس بىلدىرگەن بولاتىن.
«ۇلت باتىرى جەرلەنگەن وڭتۇستىك قازاقستانداعى سپورتتى قادىرلەۋشى ىنتالى ازاماتتاردىڭ ۇلى پالۋاندى قۇرمەتتەپ، مۇراجاي اشقانىن ماقتاۋعا تۇرارلىق ءىس دەپ باعالايمىز.
الماتى قالاسىندا قاجىمۇقان اتىندا كوشە بار. وسى قاراشا ايىندا تالاپكەر اۋىلدىق وكرۋگىنىڭ جۇرتشىلىعى ءوزى تۋىپ وسكەن اۋىلدا ۇلى تۇلعانىڭ ەسكەرتكىشىن ورناتتى. بۇل - استانانىڭ توڭىرەگىندەگى ەلدى مەكەن، ياعني، اقمولا وبلىسى، سەلينوگراد اۋدانىنىڭ تالاپكەر اۋىلدىق وكرۋگى.
ايتا كەتۋ كەرەك، ەسكەرتكىشتى ءوز قاراجاتتارىنا جاساتقاندار تاعى دا وڭتۇستىك قازاقستان وبلىسىنداعى كۇش اتاسىن قۇرمەت تۇتاتىن جاندار. بۇل اتاپ وتۋگە تۇرارلىق جايت. الايدا، وسىنىڭ ءبارىن ەسكەرە كەلگەندە، مەنى ءبىر ماسەلە تاڭعالدىرىپ تۇر. استانادا قاجىمۇقان مۇڭايتپاس ۇلىنىڭ ەسكەرتكىشى جوق. ال قاجىمۇقان - ەلدىك جانە ۇلتتىق ماقتانىشىمىز ەمەس پە؟ !
ۇلى وتان سوعىسى جىلدارىندا قاجىمۇقاننىڭ ءوزى جيناعان قاراجاتقا ۇشاق جاسالىپ، سوعىسقا جىبەرىلگەنى تاريحتان بەلگىلى. قاجىمۇقان - وسكەلەڭ ۇرپاققا ۇلگى بولعان تۇلعا. ال مەملەكەت باسشىسى نۇرسۇلتان ءابىش ۇلى نازاربايەۆ ءوزىنىڭ «نۇرلى جول» جولداۋىندا جاستارعا جاعداي جاساۋ تۋرالى اتاپ وتكەنى انىق. ەلوردامىز - استانادا قاجىمۇقان مۇڭايتپاس ۇلىنا ەسكەرتكىش ورناتۋ ادىلەتتىلىك بولار ەدى.
اسىرەسە، بۇل قازاق حاندىعى قۇرىلعاندىعىنىڭ 550 جىلدىعىن اتاپ ءوتۋ قارساڭىنداعى وتە ماڭىزدى شارا بولماق. سونداي- اق، ۇلى جەڭىستىڭ 70 جىلدىعىن تويلاۋ الدىندا دا ماڭىزدى ەكەنى ءسوزسىز» ، دەپ اتاپ وتكەن ەدى ۇكىمەت باسشىسىنا جولدانعان ساۋالىندا پارلامەنت ءماجىلىسىنىڭ دەپۋتاتى تولەش كەنجين.
اۆتور: اسلان وسپانوۆ
