انشىلەر جاڭا جىل مەرەكەسىن قايدا قارسى الادى؟
ونەر يەلەرى قوي جىلىنىڭ كەلۋىن ەرەكشە اتاپ وتۋگە جوسپارلار قۇرىپ وتىر.
دوسىمجان تاڭاتاروۆ مەرەكەدە جاقىندارىن قۇتتىقتاپ شىعادى.
«جاڭا قوي جىلىن ۇيدە، وتباسىممەن بىرگە قارسى الامىن»، - دەدى تاڭاتاروۆ. ايتۋىنشا، جاڭا جىل ول ءۇشىن - جىلدىڭ اۋىسۋى عانا. دەگەنمەن ول «جاڭا جىلدى جالپى، اركىم ءوز وتباسىمەن، رەتى كەلسە، دوستارىمەن، جاقىن تۋىستارىمەن داستارقان باسىندا قارسى الۋى ءتيىس»، دەپ ەسەپتەيدى. «ءوز باسىم ءۇي-ءۇيدى ارالاپ جاقىندارىمدى قۇتتىقتاپ شىعامىن، ءبىراق بۇل مەرەكەدە مەن سىيلىق جاسامايمىن»، - دەدى ول. Tengrinews.kz ءتىلشىسى ودان ەسىندە جاقسى ساقتالعان جاڭاجىلدىق وقيعا تۋرالى سۇرادى. «مەنىڭ ويىما بىردەن بالالىق شاعىم كەلەدى. جاڭا جىلدى مەكتەپتە بەرەتىن سىيلىق ءۇشىن قاتتى كۇتۋشى ەدىك، سول كەزدەگى الما مەن مانداريندەردىڭ ءيىسى مەن ءدامىن ۇمىتۋ مۇمكىن ەمەس. مەكتەپتەن العان المانى ۇيگە اكەلسەڭ، جاسىرا المايتىنسىڭ، ءبارىمىز ءبولىسىپ جەيتىنبىز، سەبەبى سول ءبىر المانىڭ ءيىسى بۇكىل ءۇيدىڭ ءىشىن الىپ كەتەتىن، ال قازىر قاپ-قاپ الما قويساڭ دا، ونداي ءيىس شىقپايدى. ءبىر الما الۋ ءۇشىن بار ونەرىمىزدى سالىپ ءان ايتىپ، ءبي بيلەيمىز، ارينە، ول ساتتەر ماڭگى ەستە قالادى»، - دەدى ول.
قاراقات ءابىلدينا تابيعاتتىڭ اياسىندا وتىرىس ۇيىمداستىرادى.
قازاقستاننىڭ ەڭبەك سىڭىرگەن قايراتكەرى قاراقات ءابىلديناعا دوستارى «جاڭا جىلدا شەتەلگە بارايىق» دەگەن ۇسىنىس ايتىپتى. «ءبىراق مەنىڭ بالالارىم ءالى كىشكەنتاي. سوندىقتان استانانىڭ شەتىنەن ۇلكەن ءۇيدى الىپ، دوستارىمىزدىڭ باسىن قوسىپ، شانا تەۋىپ، اققالا جاساپ، اتقا ءمىنىپ، ءدامدى تاماق ءىشىپ، تابيعاتتىڭ اياسىندا وتىرىس ۇيىمداستىرۋدى جوسپارلاپ قويدىق»، - دەيدى ول. ءانشىنىڭ ازىرشە سىيلىق الۋعا مۇرشاسى بولا قويماپتى. «جالپى، جاڭا جىل مەنى بالالىق شاقپەن كوپ بايلانىستىرادى. سەبەبى مەن اۋىلدا جىلدا-جىلدا اقشاقار بولاتىنمىن. ول كەزدە قازىرگىدەي دايىن ءتاج دە، كوستيۋم دە جوق، ءبارىن قولدان تىگەتىنبىز. كارتون قاعازدى قيىپ ءتاج جاساپ، ونىڭ ۇستىنە ماقتانى جاپسىرىپ، ءتۇرلى-ءتۇستى شىنىنى ۇگىتىپ، ونى ماقتانىڭ ۇستىنە جاپسىراتىنبىز، مۇنىڭ بارلىعى كەشەگىدەي ەسىمدە. تاعى ءبىر ەستەن كەتپەيتىن جايت، ول - اياز اتانىڭ بەرگەن سىيلىعىنىڭ ىشىنەن شىعاتىن ءبىر تال اپەلسين. ءبىزدىڭ جاڭاارقا - جەمىس-جيدەكتىڭ ءوڭىرى ەمەس، اپەلسيندى سول كەزدە عانا ءبىر كورىپ قالاتىنمىن»، - دەيدى ءانشى. ايتۋىنشا، جاڭا جىل - بالالاردىڭ عاجايىپتى كۇتەتىن مەيرامى، سوندىقتان «جاڭا جىلدا بالالارىمنىڭ اكەسى اياز اتا بولىپ، مەن اقشاقار بولىپ، تاقپاقتارىن ايتقىزامىز»، - دەدى ءابىلدينا.
تامارا اسار بيىلعى مەرەكەدە تۇڭعىش رەت تەلەديدار ساتىپ الادى.
تامارا اسار دا جاڭا جىلدى وتباسىمەن قارسى الادى، ول دا ءالى سىيلىق الىپ ۇلگەرمەگەن. «مەن نەگىزى تەلەديدار كورمەيتىن اداممىن، ۇيىمدە تەلەديدار جوق. تۋىستارىم جاڭا جىلدا قوناققا كەلەدى، ءبىراق ءبىر شارت قويدى، ەگەر تەلەديدار الماساڭ، ۇيىڭە بارمايمىز دەدى، ەندى تەلەديدار الۋعا تۋرا كەلەدى»، - دەيدى ول. ستۋدەنت كەزىندەگى جاڭا جىلى ءانشىنىڭ ەسىنەن كەتپەيدى. «18-19 جاسىمدا جاڭا جىلدى قارسى الامىز دەپ، دوستارىمىزبەن ءبىر جەردە جينالدىق. ول كەزدە قازىرگى «حلوپۋشكا» جوق، ءبىراق مەن تاۋىپ، ونى بىرەۋ الىپ قويار دەپ جاتاقحاناداعى توسەگىمنىڭ استىنا تىعىپ جۇرگەم، ءدال سول كۇنى ۇمىتىپ كەتىپپىن. ءبارىمىز داستارقانعا وتىرىپ، جاڭا جىلعا جارتى ساعات قالعاندا «حلوپۋشكا» ەسىمە ءتۇستى. تاكسي ۇستاپ جاتاقحاناعا بارىپ، پيروتەحنيكامدى الىپ بارعانشا جاڭا جىل ءوتىپ كەتتى. ءسويتىپ ول شارتىلداقتى تاكسيدەن ءتۇسىپ، باعانانىڭ جانىندا جالعىز اتقانىم ەسىمدە»، - دەپ جاۋاپ بەردى.
مەرۋەرت تۇسىپبايەۆا جاڭا جىلدا اقشا ۇلەستىرەدى.
ادەتتە جاڭا جىلدى بالاسىمەن شەتەلدە قارسى الاتىن مەرۋەرت تۇسىپبايەۆا بيىل ەشقايدا بارمايدى. «سەبەبى جاقىندا بەرىلگەن «قازاقستاننىڭ ەڭبەك سىڭىرگەن قايراتكەرى» دەگەن اتاق العانىمدى اتاپ وتكىم كەلەدى»، - دەيدى ول. بۇل مەرەيلى داستارقانعا دوستارى، تۋىستارى، ارىپتەستەرى مەن جۋرناليستەر شاقىرىلادى. «مەن سىيلىق بەرگەننەن گورى، سىيلىق العاندى جاقسى كورەتىن اداممىن، ءبىراق كوبىنەسە سىيلىقتى اقشالاي بەرەمىن. جاقىندارىڭنىڭ نەنى قالايتىنىن بىلمەيسىڭ عوي، سوندىقتان اقشا بەرگەن دۇرىس دەپ ەسەپتەيمىن، ال ۇلىما نە سۇراسا، سونى ساتىپ الىپ بەرەمىن»، - دەيدى ول. وتكەن جىلى جاڭا جىل مەرەكەسىن بالاسىمەن بىرگە اتاقتى ادامداردىڭ ۇيىندە قارسى الىپتى. «اتى- جوندەرىن ايتپاي-اق قويايىن، سول جاڭا جىلدى ەشقاشان ۇمىتپايمىن. ورىستار ايتپاقشى، جاڭا جىلدى قالاي قارسى الساڭ، سولاي وتكىزەسىڭ دەگەن راس سياقتى. سەبەبى بيىلعى جىل اسا جەمىستى بولدى. اتاققا يە بولدىم، بالام تۋىلعاندا قازاق-تۇرىك ليتسەيىندە وقىسا دەپ ارمانداعان ەدىم، سول ارمانىم ورىندالدى، بالاممەن سول ءبىر قۇتتى ۇيدە جاڭا جىلدى قارسى الىپ ەدىم، «جاقسىدان - شاراپات» دەمەكشى، جۇعىستى بولىپ، بۇل جىل ءبىزدى جاقسىلىققا كەنەلتتى»، - دەيدى تۇسىپبايەۆا.
