ۇلتتىق قوردان بولىنگەن قارجىعا قول سۇققاندار قامالاتىن بولادى - ن. نازاربايەۆ

استانا. قازاقپارات - ۇلتتىق قوردان بولىنگەن قارجىعا قول سۇققان سۇعاناقتار قامالاتىن بولادى. بۇگىن استاناداعى تاۋەلسىزدىك سارايىندا وتكەن يندۋستريالاندىرۋ كۇنى اياسىنداعى جيىن بارىسىندا ەلباسى نۇرسۇلتان نازاربايەۆ وسىلاي ءمالىم ەتتى.

«مينيستردەن، ۆيتسە-پرەزيدەنتتەن، تەرريتوريا اكىمىنەن، كومپانيا باسشىسىنان، مەردىگەرلەردەن باستاپ ءاربىر جاۋاپتى ادامنىڭ جۇمىس كۇنى قۇرىلىس جۇمىستارىن ينسپەكتسيالاۋدان باستالۋى ءتيىس»، - دەدى ق ر پرەزيدەنتى.

سونىمەن قاتار، ەلباسى ارنايى قۇرىلعان كوميسسيا دا قۇرىلىس جۇمىستارىن كۇن سايىن باقىلاۋدا ۇستاپ وتىرۋى كەرەكتىگىن قاتاڭ ەسكەرتتى.

«قارجى پوليتسياسى، پروكۋراتۋرا، ۇ ق ك شاپشاڭ وسىعان نازار اۋدارۋى ءتيىس. ءبىزدىڭ ۇلتتىق قوردان بولەتىن ءاربىر تيىن ىسكە جاراتىلسىن. وعان قول سۇققانداردى قاتاڭ ۇستاپ، قاماۋ قاجەت»، - دەدى ن. نازاربايەۆ.

اۆتور: مارلان جيەمباي