ەلباسى: وبلىستاردا مەنىڭ پورترەتىم ەمەس، جۇمىسسىزدىق كورسەتكىشى تۋرالى تابلولار ءىلىنىپ تۇرۋى كەرەك

استانا. قازاقپارات - وبلىستاردا مەنىڭ پورترەتىم ەمەس، جۇمىسسىزدىق كورسەتكىشى تۋرالى تابلولار ءىلىنىپ تۇرۋى كەرەك.

بۇگىن استاناداعى تاۋەلسىزدىك سارايىندا ءوتىپ جاتقان يندۋستريالاندىرۋ كۇنى اياسىنداعى جيىن بارىسىندا ءسوز سويلەگەن ەلباسى نۇرسۇلتان نازاربايەۆ وسىلاي مالىمدەدى.

ءسوز اراسىندا ەلباسى ءىرى كاسىپورىندار جۇمىس ورىندارىن ءجيى قىسقارتۋعا ءماجبۇر بولاتىنىن، ال ولار نەگىزىنەن شاعىن جانە ورتا بيزنەستە قۇرىلاتىنىن ايتقان بولاتىن. پرەزيدەنت بۇل رەتتە جاڭادان اشىلىپ جاتقان ءىرى كاسىپورىندارعا توقتالا كەلە، وندايدا مۋلتيپليكاتيۆتىك ناتيجە بولعاندا جۇمىس ورىندارى اشىلاتىنىن جەتكىزدى.

«مەن ۇدايى شاعىن جانە ورتا بيزنەس تۋرالى ايتىپ كەلەمىن. جاھاندىق جۇمىس ورىندارى ءۇشىن كۇرەس ماسەلەسىنە ءبىز الەمنىڭ ەڭ دامىعان وتىز ەلىنىڭ قاتارىنا ەنۋگە ۇمىتكەر ەل رەتىندە جاۋاپ بەرۋگە ءتيىسپىز. وزدەرىڭىز قاراڭىز: قازاقستان ەكونوميكاسىنىڭ 6 پايىزدىق ءوسىمىن قامتاماسىز ەتۋ ءۇشىن بىزگە جىل سايىن شامامەن 10 مىڭ جۇمىس ورىندارىن قۇرۋعا تۋرا كەلەدى. وسىنى ءبارى ۇعىنۋلارى كەرەك. وبلىس ورتالىقتارىنا بارعاندا وندا مەنىڭ پورترەتىم ەمەس، سول وڭىردە جىلىنا، ايىنا، توقسانىنا قانشا جۇمىس ورىندارى اشىلعانى تۋرالى ءىلىنۋ كەرەك. مىنە، مەن وسىنى تالاپ ەتەمىن. بۇقارالىق اقپارات قۇرالدارى وبلىستاردا قانشا جۇمىس ورىندارى اشىلعانىن ۇدايى كورسەتىپ تۇراتىن بولسىن»، - دەدى ن. نازاربايەۆ.

سونىمەن قاتار، ەلباسى تەلەارنالارعا يندۋستريالاندىرۋ تىنىسى دا كۇن سايىن كورسەتىلۋى تيىستىگىن اتاپ ءوتتى. «جەتىستىگىن عانا ەمەس، كەمشىلىكتەرىن دە كورسەتۋ كەرەك. قىتايدا تەلەارنالار باستاپقىدا كاسىپورىندار، نىساندار جۇمىستارىنداعى قاربالاستى كورسەتەدى. ءبىز بۇنى نەگە كورسەتپەيمىز، بۇلار - ەلىمىزدىڭ ماقتانىشى. ءوندىرىستىڭ ءبارى اسپاننان كەلىپ جاتقان جوق، ءبارى ادامدارىمىزدىڭ قولىمەن جاسالىپ جاتىر. ءبارىمىز وسىعان جۇمىلايىق»، - دەدى مەملەكەت باسشىسى.

اۆتور: قانات مامەتقازى ۇلى