مەملەكەت باسشىسى ەلىمىزدەگى بالالاردى جاڭا جىلمەن قۇتتىقتادى - فوتو
شاراعا ەلوردالىق بالالار ۇيلەرىنىڭ تاربيەلەنۋشىلەرى، تۇرمىسى ناشار جانە كوپ بالالى وتباسىلاردىڭ بالالارى قاتىستى. شارا بارىسىندا «ماڭگىلىك ەلدىڭ قاسيەتتى قۇندىلىقتارى» اتتى جاڭاجىلدىق سالتاناتتى قويىلىم كورسەتىلدى.
ءار قاتىسۋشىعا ەلباسىنىڭ اتىنان ءتۇرلى سىيلىقتار: شاقىرۋ بيلەتتەرى، كىتاپتار، ويىنشىقتار، پلانشەتتەر، تاتتىلەر تابىستالدى جانە ەڭ باستىسى - مەملەكەت باسشىسىنىڭ بەينەقۇتتىقتاۋى تارتۋ ەتىلدى.
«قۇرمەتتى بالالار! جاڭا جىل بارلىق قازاقستاندىقتاردىڭ ۇيلەرىنە قۋانىش پەن شاتتىق اكەلەدى. وسى كۇندەردە ءبىز ەسكى جىلدى تاريح قويناۋىنا تاپسىرامىز. ول ءبىزدىڭ بارلىعىمىز ءۇشىن ەرەكشە بولدى. ءبىز بۇل مەرەكەنى جاڭا جەتىستىكتەرمەن قارسى الىپ وتىرمىز. سەندەردىڭ بارلىقتارىڭنىڭ بيىل جاقسى ناتيجە كورسەتكەندەرىڭدى مەن بىلەمىن، ويتكەنى بۇل شىرشاعا تەك بەلسەندى ءارى تالانتتى بالالار عانا شاقىرىلادى. سەندەردىڭ بارلىقتارىڭ جىل بويى جاقسى باعالار الىپ، ءتۇرلى كونكۋرستار مەن جارىستاردا جەڭىسكە جەتتىڭدەر. مەن وسى ءۇشىن وتە قۋانىشتىمىن. مەن بارلىق قازاقستاندىق بالالاردىڭ مىقتى، اقىلدى ءارى قايىرىمدى بولىپ وسكەندەرىن قالايمىن»، - دەدى ن. نازاربايەۆ ءوزىنىڭ بالالارعا ارناعان بەينەقۇتتىقتاۋىندا.
مەملەكەت باسشىسى ءوز سوزىندە ەلىمىزدە بالالاردىڭ ءبىلىم الۋىنا، دەمالىسى مەن دامۋىنا بارلىق جاعدايدىڭ جاسالىپ وتىرعانىن ايتتى. ەلباسى سونداي- اق بارلىق بالالاردىڭ ءبىلىمدى بولىپ ءوسىپ، وتانى - قازاقستان رەسپۋبليكاسىنىڭ دامۋىنا ءوز ۇلەستەرىن قوساتىنىنا سەنەتىنىن اتاپ ءوتتى.
«وسى شىرشا مەن سىيلىقتار سەندەر ءۇشىن ۇمىتىلماس ەستەلىك بولىپ قالادى دەپ ۇمىتتەنەمىن. جاڭا جىلدا سەندەرگە دەنساۋلىق پەن باقىت تىلەگىم كەلەدى. بارلىقتارىڭ ساباقتى جاقسى وقىپ، سپورتپەن اينالىسىپ، ءتۇرلى ۇيىرمەلەر مەن سەكسيالارعا بارىڭدار. ولار كەيىن ەسەيگەندە ءوز پايداسىن تيگىزەدى. بارلىق ارماندارىڭ ورىندالسىن! جاڭا جىل قۇتتى بولسىن، اينالايىندار!»، - دەدى قازاقستان پرەزيدەنتى.
سونىمەن قاتار شاراعا قاتىسۋشى بالالار ق ر ءبىلىم جانە عىلىم ءمينيسترى اسلان سارىنجىپوۆپەن، استانا قالاسى اكىمىنىڭ ورىنباسارى ەرمەك امانشايەۆپەن، ەلوردالىق ءبىلىم باسقارماسىنىڭ باسشىسى ەلميرا سۋحانبەرديەۆامەن بىرگە شىرشانى اينالا ءان سالىپ، بي بيلەدى.
اۆتور: ءابۋ- اسقار مەكەش ۇلى 
