شىمكەنتتە العاش رەت باۋىر اۋىستىرۋ وتاسى جاسالدى

شىمكەنت. قازاقپارات - شىمكەنتتە العاش رەت باۋىر اۋىستىرىلدى.

جەدەل مەديتسينالىق كومەك اۋرۋحاناسىندا باۋىر اۋىستىرۋ وتاسىن شىمكەنتتىك دارىگەرلەر بەلارۋستىك ارىپتەستەرىمەن بىرلەسىپ جاسادى. وتا 16 ساعاتقا سوزىلدى.

«وتاعا بەلارۋس ەلىنەن التى ادام، جەرگىلىكتى جەتى دارىگەر قاتىستى. مۇنداي وتالار توپپەن جاسالادى، ءبارى تەڭ جۇمىس اتقاردى. وتا اياقتالعانشا، بىردە-ءبىر دارىگەر سىرتقا شىققان جوق» ، - دەدى جمكا باس دارىگەرى ءمادي بەگالييەۆ.

العاشقى ناۋقاس بايدىبەك اۋدانىنىڭ تۇرعىنى رايحان بەكمۇرزايەۆا بولدى. 27 جاستاعى ايەلگە دارىگەرلەر ەكى جىل بۇرىن «باۋىر سيرروزى» دياگنوزىن قويعان. ونىڭ نەبارى 3 اي ءومىرى عانا قالعان دەسەدى، ەندى وعان ءتىپتى بالا تۋۋعا دا بولادى. قازىر ناۋقاس توسەكتەن تۇردى. وعان اپەكەسى دونور بولدى. باۋىر بىرنەشە اپتادان كەيىن قالپىنا كەلەدى. سودان كەيىن رايحان قالىپتى ءومىر سۇرەتىن بولادى.

وبلىستىق دەنساۋلىق ساقتاۋ باسقارماسىنىڭ دەرەكتەرىنە سۇيەنسەك، ەسەپتە 500 گە تارتا ناۋقاس تىركەلگەن. ولار گەپاتيت، سيرروز، ىسىك سالدارىنان باۋىر جەتىمسىزدىگىنە دۋشار بولعان. ناۋقاستاردىڭ ءبىرازى باۋىر اۋىستىرۋعا مۇقتاج جاندار.

«2015 - جىلى وسى باعىتتى دامىتپاقپىز. ءبىرقاتار كلينكالارمەن شارت جاساستىق. وڭتۇستىك كورەيا، امەريكانىڭ ءتۇرلى مەكەمەلەرىنىڭ تاجىريبەسىن زەردەلەيمىز»، - دەدى و ق و دەنساۋلىق ساقتاۋ باسقراماسىنىڭ باستىعى ج. ىسمايىلوۆ.

 بۇل وتا بەلارۋس دارىگەرلەرى شەبەرلىك سىنىبىنىڭ بولىگى بولدى. وقىتۋعا 23 مامان قاتىستى، ولار - حيرۋرگتەر، انەستەزيولوگتار، رەانيماتولوگتار، گەپاتولوگتار، ترانسفۋزيولوگتار.