قوياندىداعى باسىپ الىنعان جەرلەر زاڭداستىرىلادى - وبلىس اكىمى

استانا. قازاقپارات - قوياندىداعى باسىپ الىنعان جەرلەر زاڭداستىرىلادى. بۇل تۋرالى بۇگىن استانادا ق ر پرەزيدەنتى جانىنداعى ورتالىق كوممۋنيكاتسيالار قىزمەتىندە وتكەن بريفينگتە اقمولا وبلىسىنىڭ اكىمى سەرگەي كۋلاگين ءمالىم ەتتى.

ەسكە سالا كەتەيىك، بيىل قوياندىدا زاڭسىز باسىپ الىنعان جەرلەردىڭ يەلەرى ۇيلەرىن قالدىرۋدى سۇراپ، بيلىك كومەگىنە جۇگىنگەن بولاتىن.

«ماسەلەنى شەشۋدە ەشكىمنىڭ وزەگىن تەپپەي، دۇرىس شەشىم تابۋ كەرەك. قازىر 194 داۋلى جەر تەلىمى بار. ونىڭ نەگىزگى بولىگى وسىنداي جاعدايدىڭ تۋىنداعانىنا كىنالى ەمەس. دەگەنمەن، ونىڭ ىشىندە پاتەرلەرى بار ادامدار جەر تەلىمدەرىن ونىڭ زاڭسىز ەكەنىن الدىن الا بىلە تۇرا باسىپ العاندار دا بار. جەر تەلىمدەرىن باسىپ الىپ، ونى ساتىپ، كەيىن قايتادان باسىپ الۋمەن اينالىسقاندار دا جوق ەمەس. سونىڭ بارلىعى زەرتتەلەدى جانە قولداۋدان قاعىلادى. قاندايدا ءبىر شەشىم قابىلداۋ - وتە قيىن. مۇمكىن مەن بۇرىن- سوڭدى بولماعان شەشىم شىعارامىن»، - دەگەن س. كۋلاگين ونىڭ بىرنەشە شەشىمىن ۇسىندى.

«ۇيلەردىڭ جارتىسى - مەملەكەتتىك، جارتىسى - جەكە مەنشىك جەرلەردە ورنالاسقان. مەنىڭشە، ولاردى زاڭداستىرۋعا بارۋىمىز ىقتيمال. ەكىنشىدەن، ىرگەتاسى عانا قۇيىلعان جەرلەردى ءسۇرۋىمىز مۇمكىن. ولارعا جەكە مەنشىك جەرلەرگە كوشۋگە ۇسىنىس جاسايمىز. ولار باس جوسپارعا سايكەس ورنالاسۋى ءتيىس. 194 جەر تەلىمىن قالدىراتىن بولامىز. ءبىراق باستى ماسەلە - 45 ءۇيدىڭ ماسەلەسى. ولار باس جوسپارعا سايكەس سالىنباعان. ءدال جولدىڭ ۇستىندە تۇر. ياعني اۋىلعا ينجەنەرلىك كوممۋنيكاتسيالار كەلمەيدى دەگەن ءسوز. سوندىقتان ولار ءبىزدىڭ دە جاعدايىمىزدى ءتۇسىنىپ، ۇيلەرىن جىلجىتۋلارى قاجەت. ولارعا جەر تەلىمدەرىن قالدىرامىز. بۇل تەك 194 جەر تەلىمىنىڭ ماسەلەسى. ەگەر 195 - جەر تەلىمى پايدا بولسا، سوتسىز، تەرگەۋسىز ءسۇرىپ تاستايمىز»، - دەدى وبلىس باسشىسى.

ونىڭ ايتۋىنشا، داۋدىڭ ورتاسىندا قالعان قاراپايىم حالىق كىنالى ەمەس، سوندىقتان بيلىك ولارعا كومەكتەسەدى.

«ماسەلە وتە اۋىر جانە ول ءبىر كۇننىڭ ماسەلەسى ەمەس. جەردى زاڭسىز باسىپ الۋ تۇيتكىلى 2007 - جىلدان بەرى كەلە جاتىر. مۇندا تەك ادامداردى كىنالاۋ دۇرىس ەمەس. باسىم رەتتە بيلىك كىنالى دەپ تە سانايمىن. 2007 - جىلى ادامدار سىرتتان كەلىپ، جەر تەلىمىنە قازىق قاققان، كەيىن ىرگەتاسىن قۇيعان كەزدە اۋىل اكىمى مەن ۋچاسكەلىك ينسپەكتور نەمقۇرايلى قاراعان. كەيىن ءۇي تۇرعىزىلعاندا وسىنداي شي شىقتى»، - دەدى ايماق جەتەكشىسى.

 

 اۆتور: جاسۇلان جولدىبايەۆ