ءبىز ەۋرازيالىق ەكونوميكالىق وداقتى ومىرشەڭ ءارى بارلىعى ءۇشىن تارتىمدى ەتۋگە ءتيىسپىز - ق ر پرەزيدەنتى

ماسكەۋ. قازاقپارات - ماسكەۋ قالاسىندا قازاقستان رەسپۋبليكاسىنىڭ پرەزيدەنتى نۇرسۇلتان نازاربايەۆ رەسەي فەدەراتسياسىنىڭ پرەزيدەنتى ۆلاديمير پۋتينمەن كەزدەستى.

 كەزدەسۋدە ەلباسى رەسەي پرەزيدەنتىمەن العاشقى كەزدەسكەننەن بەرى 15 جىل وتكەنىن ايتتى.

«وسى ۋاقىت ارالىعىندا ءسىز رەسەيدەگى حاوستى توقتاتتىڭىز. وسى جىلدار ىشىندە رەسەيدە بيلىك ۆەرتيكالىن قالپىنا كەلتىردىڭىز، سونىڭ ارقاسىندا ول بۇگىندە مۇلدە باسقا ەلگە اينالدى. ءوزىڭىز جاريالاعان جولداۋدى جانە ويعا العان جوسپارلاردى جۇزەگە اسىرۋدا ۇلكەن تابىستار تىلەيمىن»، - دەدى نۇرسۇلتان نازاربايەۆ.

 كەزدەسۋدە ەلباسى 2015 - جىلى 1 - قاڭتاردان باستالاتىن ەۋرازيالىق ەكونوميكالىق وداقتىڭ ماڭىزدىلىعى تۋرالى ايتتى.

 «بيىل ءبىز استانادا ەۋرازيالىق ەكونوميكالىق وداق تۋرالى شارتقا قول قويدىق. ول كەلەسى جىلى جۇمىس ىستەي باستايدى. بارلىق كەدەرگىلەرگە قاراماستان، ءبىز بۇل ۇيىمدى قولداۋعا جانە ونى ومىرشەڭ ءارى بارلىعى ءۇشىن تارتىمدى ەتۋگە ءتيىسپىز»، - دەدى ەلباسى.

رەسەي پرەزيدەنتى ۆلاديمير پۋتين ەكىجاقتى ىنتىماقتاستىقتىڭ نەگىزگى پەرسپەكتيۆالارىنا جانە ينتەگراتسيانى ءارى قاراي تەرەڭدەتۋ جونىندەگى جوسپارلارعا توقتالدى.