گەرمانيا حالقى قازاق ءتىلىن ۇيرەنۋدە
ساباق گەرمانياداعى كونە وقۋ ورنى - گۋمبولدت ۋنيۆەرسيتەتىنىڭ قابىرعاسىندا ۇيىمداستىرىلىپ كەلەدى. فريدەريكە كايزەردىڭ قازاق ءتىلىن وقۋعا دەگەن قۇشتارلىعى ەرەك. ول گەرمانيانىڭ گۋمبولدت ۋنيۆەرسيتەتىندەگى بىردە-ءبىر ساباقتان قالمايدى.
العىر قىز نەبارى 20 جاسىندا بۇدان بولەك 5 ءتىلدى مەڭگەرىپ العان ەكەن. ال قازاق تىلىنە دەگەن قىزىعۋشىلىق ەلىمىزگە ەرىكتى بولىپ كەلگەن كەزدە تۋىپتى.
فريدەريكە كايزەر، گۋمبولدت ۋنيۆەرسيتەتىنىڭ ستۋدەنتى: - قازاق تىلىنە قىزىعامىن. بيىل ءبىر جىل بويى قازاقستاننىڭ وسكەمەن قالاسىندا بولدىم، نەمىس مەكتەبىندە جۇمىس ىستەدىم. كەيىننەن قازاق ءتىلىن گەرمانيادا دا وقۋعا بولاتىنى تۋرالى اقپاراتتى ەستىدىم. قازاقستاننىڭ مادەنيەتى مەن تۇرعىندارى وتە قاتتى ۇنادى، تىلگە دەگەن ماحابباتىم وسىدان كەيىن ارتسا كەرەك. پالاۋ، مانتى، ەت تاعامدارى وتە قاتتى ۇنايدى. بۇل توپتىڭ قازاق ءتىلىن ۇيرەنىپ جۇرگەنىنە 2 اي ۋاقىت بولىپ قالدى. قىسقا مەرزىم ىشىندەگى جەتكەن جەتىستىكتەرى از ەمەس. ستۋدەنتتەر جازۋعا عانا ەمەس، سويلەسۋگە دە جاراپ قالعان.
حاسان يلديريم، گۋمبولدت ۋنيۆەرسيتەتىنىڭ ستۋدەنتى: - مەن قازاقشا سويلەيمىن، قازاق تىلىندەگى ادەبي كىتاپتاردى وقىپ، وسى تىلدە ەركىن سويلەيتىن كۇنگە جەتەمىن دەپ ويلايمىن. سوسىن، ارينە، قازاقستانعا بارىپ، تاجىريبە جۇزىندە شىڭدالا تۇسەمىن. گەرمانيادا قازاق ءتىلىن وقىتۋ كۋرستارى بيىل باستالىپ وتىرعان جوق. ونداعان ستۋدەنتتەر قازىرگى كۇنى اۋىزەكى ءتىلدى مەڭگەرىپ، ەركىن سويلەي الاتىن دەڭگەيگە جەتكەن. ءتىلدى ۇيرەنۋ قۇپياسى - وڭاي. ساباق ويىن تۇرىندە وتكىزىلىپ، ءدارىس ءتىلدى مەيلىنشە جەڭىل قابىلداۋعا نەگىزدەلگەن.
گۇلسىم ماساقوۆا، مۇعالىم: - نەمىس ستۋدەنتتەرى قازاق تىلىندەگى ءدارىس كەزىندە ەرەجە عانا ەمەس، ۇلتتىق ءداستۇرىن تانىپ، حالىق مۋزىكاسىن دا مەڭگەرۋگە كوڭىل بولگەن.
www.24.kz
