كورەرمەنىنە «استانا وپەرا» تاڭعاجايىپ مۋزىكا كەشىن ۇسىنعالى وتىر
كورەرمەن نازارىنا ءارتۇرلى ستيلدەگى جانە باعىتتاعى شىعارمالار - جاڭارۋ داۋىرىنەن باستاپ، XX عاسىر كومپوزيتورلارىنىڭ مۋزىكاسىنا دەيىن ۇسىنىلادى.
تىڭدارماندى توسىن سىي مەن جاڭالىق كۇتەدى، اتاپ ايتقاندا، قازاقستاندىق مۋزىكا سۇيەر قاۋىم ءۇشىن جاڭا مۋزىكالىق شىعارمالار ورىندالىپ، تانىمال كومپوزيتسيالاردىڭ قۇپيا بولىپ كەلگەن سىرلارى اشىلادى.
ەلوردا كورەرمەنىنىڭ «استانا وپەراداعى» سۇيىكتى سوليستەرىنىڭ ورىنداۋىندا ۆوكالدىق، اسپاپتىق جانرلارداعى باتىس ەۋروپالىق كومپوزيتورلار: ك. ۆ. گليۋك، ي. س. باح، گ. ف. گەندەل، ۆ. ا. موتسارت، دج. كاچچيني، ت. البينوني، ف. شۋبەرت، پ. ماسكاني، ش. گۋنو، ا. دۆورجاك، ك. سەن- سانس، ۆ. گومەس، ا پياتسوللا جانە باسقالاردىڭ تۋىندىلارى شىرقالادى.
«اۆە ماريا» - «ماريا، قۋانا بەر» دەگەن ماعىنانى بىلدىرەدى. كونسەرت باعدارلاماسىندا «اۆە ماريا» دەپ بىردەي اتالاتىن ءارتۇرلى اۆتورلاردىڭ شىعارمالارى جانە باسقا رۋحاني مۋزىكانىڭ جاۋھارلارى شىرقالادى.
«ۇلى كومپوزيتورلاردىڭ اسقاق مۋزىكاسى ەرەكشە رۋحتاندىراتىن اتموسفەرا سىيلاپ، نۇر شاشقان روجدەستۆو مەرەكەسى قارساڭىنداعى وسى ءبىر كلاسسيكالىق مۋزىكا كەشى تىڭدارمانعا كەرەمەت قۋانىش سىيلايدى»، - دەيدى مۋزىكالىق كەڭەسشى راۋشان بەسكەمپىروۆا.
