قوستاناي وبلىسىنىڭ اكىمى جارمەڭكەدەگى باعانى وزگەرتتى - فوتو
وبلىس اكىمى 2014 - جىلعى ەڭ سوڭعى جارمەڭكەنى ارالاپ كورۋدى ۇيعارعان. ول ساۋدا سورەلەرىندەگى باعانى تەكسەردى. جارمەڭكەلەردە مارتەبەلى مەيماندار تەكسەرىپ كەتكەننەن كەيىن ارزان باعالاردىڭ قايتا شارىقتاپ شىعا كەلەتىنى بۇرىننان ايتىلىپ ءجۇر.
اكىم سونداي جايتتىڭ كۋاسى بولدى. ساۋدا ورىندارىنىڭ بىرىندە قوستاناي اۋدانىنداعى زاتوبول اۋىلىنان اكەلىنگەن برويلەردىڭ قۇنى 650 تەڭگەدەن 850 تەڭگەگە قايتا كوتەرىلگەنى انىقتالدى.
نۇرالى ءسادۋاقاسوۆ باعانى دەرەۋ وزگەرتۋدى تالاپ ەتتى. «قازىر وزگەرتەمىن»، - دەپ ساسقالاقتادى ساۋداگەر. «بۇلاي بولماۋى كەرەك! مۇنداي ساۋداگەرلەردەن تازارۋ قاجەت. كاسىپكەرلەر قويمالاردان ونىمدەردى كوتەرىپ ساتىپ الادى دا، مۇندا كەلىپ ساۋدالايدى. مۇنىڭ بيزنەس ەكەنى تۇسىنىكتى، ءبىراق باعانىڭ بۇلاي وزگەرۋى دۇرىس پا؟!» - دەدى اكىم. ول ءبىر عيماراتتا وتىرىپ، ءتۇرلى باعا بەلگىلەيتىن ساۋداگەرلەردى قاداعالاۋدى تاپسىردى.
جارمەڭكە قوستانايداعى مۇز سارايىندا ءوتتى. باسىلىمنىڭ حابارلاۋىنشا، جالپى العاندا، مۇندا اۋىل شارۋاشىلىعى ونىمدەرىنىڭ باعاسى وزگە ساۋدا ورىندارىنان ارزان بولدى. سيىر ەتىنىڭ كەلىسى 850 تەڭگەدەن، ون دانا جۇمىرتقا 160 تەڭگەدەن، كارتوپتىڭ كەلىسى 65 تەڭگەدەن ساتىلدى.
tengrinews.kz
