رۋبلدىڭ قۇنسىزدانۋى بايقوڭىر تۇرعىندارىن ابىگەرگە سالدى

استانا. قازاقپارات - اينالىمىندا تەڭگە مەن رۋبل بىردەي جۇرەتىن بايقوڭىر قالاسىنىڭ تۇرعىندارى رۋبلدىڭ قۇنسىزدانۋىنان زارداپ شەگىپ وتىر.

مۇنداعى قازاقستان ازاماتتارى جالاقى مەن زەينەتاقىنى رەسەي رۋبلىمەن الادى.

ال ەكىنشى دەڭگەيلى بانكتەردىڭ فيليالدارىنان العان نەسيەلەرىن تەك تەڭگەمەن تولەيدى. جەرگىلىكتى حالىقتىڭ ايتۋىنشا، بايقوڭىردا حالىق بانكىنىڭ عانا ءبولىمى بار جانە ول بانكتەن بارلىعى بىردەي نەسيە الا المايدى.

سوندىقتان كوپشىلىگى 250 شاقىرىم قاشىقتىقتاعى وبلىس ورتالىعى - قىزىلوردا قالاسىنا بارىپ تۇرمىستىق تەحنيكانى نەسيەگە راسىمدەگەن.

"ەڭ سوراقىسى ول ەمەس"، - دەيدى حالىق، رەسەي رۋبلى قۇلدىراپ، الاتىن جالاقىلارى مەن زەينەتاقىلارى ماردىمسىز بولىپ قالعان. اسىرەسە زەينەتكەرلەر نەسيەلەرىن جابا الماي قالامىز با دەپ قورقادى.

"بۇرىنعى كۋرسپەن العاندا، ءبىز تەڭگەمەن ايىنا 22 مىڭ تەڭگە تولەپ تۇراتىنبىز. ەندى قازىر زەينەتاقىم 22 مىڭ تەڭگەگە جەتپەي قالدى اينالدىرعانىمدا. نەسيە سۇراساڭ، قازاقستان ازاماتىسىڭ، قازاقستاننان بارىپ ال دەيدى. قازاقستانعا كەلسەڭ: ەندى ايلىعىڭ، زەينەتاقىڭ - رۋبل، بارىپ ورىسىڭنان ال دەپ ايتادى"، - دەيدى زەينەتكەر بازاركۇل تاجىبايەۆا.

قىزىلوردادان تاۋاردى تەڭگەگە ساتىپ اكەلىپ، بايقوڭىردا كاسىبىن دوڭگەلەتىپ وتىرعان تۇرعىندار دا قينالىپ قالعانىن جاسىرمايدى.

"وسىعان دەيىن 200 مىڭ رۋبلگە ءبىرتالاي تاۋار الاتىنبىز. ەندى پايدادان ايتارلىقتاي قاعىلىپ قالدىق. ەسەسىنە باعالاردى كوتەرۋگە ءماجبۇرمىز"، - دەيدى ولار.

كاسىپكەر جاقىپبەك قويانبايەۆ ازىق-تۇلىك پەن تۇرمىستىق تاۋارلارعا باعانى كوتەرىپ جاتقانىن ايتادى.

"200 مىڭ رۋبل ميلليون تەڭگە بولاتىن. ەندى 200 مىڭ رۋبل - 600 مىڭ تەڭگە. 400 مىڭ تەڭگەنى جوعالتىپ وتىرمىز. ونىڭ ءبارى قالاعا كەرى اسەرىن تيگىزىپ جاتىر. مىسالى، ناندى 12 رۋبلمەن ساتىپ كەلسەك، ەندى 15 رۋبلمەن ساتۋعا ءماجبۇرمىز. حالىق اشۋلى، ساۋدا جۇرمەي جاتىر. ءارى قاراي نە بولارىن بىلمەيمىز"، - دەيدى كاسىپكەر.

 وسىلايشا، بايقوڭىرداعى حالىققا رۋبلدىڭ قۇلدىراۋى اۋىر سوعىپ وتىر.

nur.kz