مەملەكەتتىك باعدارلامامەن الىنعان ۇيلەردى بيزنەسكە اينالدىرۋعا تىيىم سالۋ كەرەك - نازاربايەۆا
مۇنداي پىكىردى پارلامەنتتىڭ تومەنگى پالاتاسىنىڭ ۆيسە-سپيكەرى داريعا نازاربايەۆا "نۇر وتان" پارتياسىنىڭ پارلامەنتتىك فراكسياسىنىڭ وتىرىسىندا ايتتى، - دەپ حابارلايدى Tengrinews.kz ءتىلشىسى.
"ساتىپ الۋ قۇقىعىمەن جالعا بەرىلەتىن ءۇي - بۇل جەردە وسى تۇرعىن ءۇيدى بەس جىلدان كەيىن ساتىپ الۋ مۇمكىندىگى قاراستىرىلعان. بۇل سالاعا بيزنەس ىزدەپ كەلەتىندەردىڭ الدىن الۋ ءۇشىن ءبىز بەس جىلدان كەيىن ساتىپ الىناتىن ءۇيدى تاعى دا بەس جىل بويى ساتۋعا، سىيلاۋعا، بانككە كەپىلگە قويۋعا، جالعا بەرۋگە جانە قوسالقى جالگەرلىككە بەرۋگە تىيىم سالىناتىنداي بىرنارسە جاساۋىمىز كەرەك. بۇل ناقتى كورسەتىلۋى ءتيىس"، - دەدى نازاربايەۆا جاڭا تۇرعىن ءۇي باعدارلاماسى تۋرالى ايتىپ جاتقان كەزدە.
سونىمەن قاتار، ول قازاقستاندا جاڭا تۇرعىن ءۇي باعدارلاماسىنىڭ قاتىسۋشىلارى ءۇشىن «سەنىم تەلەفونى» بولۋى كەرەك ەكەنىن ايتتى. «تۇرعىن ۇيلەردى ۇيلەستىرۋدە ءبىز «سەنىم تەلەفونى» بولۋى كەرەك دەپ ەسەپتەيمىز.
بۇل باعدارلاما ارقىلى ءۇي العانداردىڭ ءتىزىمى جاريالاناتىنىن ايتتىڭىزدار. مۇنىمەن بىرگە ءسىزدىڭ كابينەتىڭىزگە «سەنىم» تەلەفونى دا بولسىن»، - دەدى نازاربايەۆا "بايتەرەك" ۇلتتىق باسقارۋشى حولدينگى» ا ق باسقارما ءتوراعاسى قۋاندىق بيشىمبايەۆقا.
«ادامدار تەلەفون سوعىپ، ادىلدىكتىڭ بۇزىلعانىن، «كەزەكتە مەنەن وزىپ كەتتى» دەپ ايتۋ ءۇشىن. مۇنداي اقپارات، مۇنداي ينتەراكتيۆ بولۋى كەرەك»، - دەدى ول.
ەسكە سالا كەتەيىك، قازاقستان پرەزيدەنتى نۇرسۇلتان نازاربايەۆ «نۇرلى جول» ساياساتى اياسىندا جاڭا تۇرعىن ءۇي باعدارلاماسىنىڭ قولعا الىناتىنىن 2014 - جىلعى 11 - قاراشادا جاريا ەتىلگەن جولداۋىندا ايتقان ەدى.
بۇل باعدارلاما بويىنشا تۇرعىن ءۇي العاشقى جارناسىز ءارى پايىزسىز بەرىلۋى ءتيىس ەكەندىگى جانە 35 جاسقا دەيىنگى ەرلى-زايىپتىلار جاڭا تۇرعىن ءۇي باعدارلاماسى بويىنشا پاتەر الا الاتىن بولعانى حابارلاندى. سونىمەن بىرگە، جاڭا تۇرعىن ءۇي باعدارلاماسى بويىنشا باسپانانىڭ ءبىر شارشى مەترىنىڭ قانشا تۇراتىنى دا جاريا ەتىلدى.
