قازاقستان اسكەري- اۋە كۇشتەرى جاڭا اسكەري ۇشاقپەن تولىقتى
ۇشاقتىڭ ۇشىپ كەلۋى يسپانيا - گرەكيا - ازەربايجان - قازاقستان باعىتىمەن ءۇش كەزەڭدە جۇزەگە استى. ونى اۋە كەمەسىنىڭ كومانديرى مايور دميتري گروتس، كومانديردىڭ كومەكشىسى مايور ارمان جانيكەيەۆ باستاعان قازاقستاندىق ەكيپاج بەن يسپانيالىق ەكيپاج جۇزەگە اسىردى.
بۇل تەكتەس ۇشاقتار قازاقستاندا 2012-جىلعى جەلتوقساننان بەرى پايدالانىلىپ كەلەدى. بۇگىندە قازاقستاندىق ۇشقىشتار مەن تەحنيكتەر ولاردى تولىقتاي يگەردى. س-295 ەكيپاجدارى قازاقستان اۋماعىندا جانە الىس شەتەلدەردە وتكەن بارلىق وقۋ-جاتتىعۋلارعا قاتىسىپ ءجۇر. پايدالانۋعا بەرىلگەن ەكى جىل ىشىندە س-295 ءبىزدىڭ تابيعي- كليماتتىق جاعدايدا ءوزىن سەنىمدى جانە كۇي تالعامايتىن ۇشاق رەتىندە كورسەتتى.
قازىرگى تاڭدا قارۋلى كۇشتەردىڭ تەحنيكالىق جاراقتانۋى ايتارلىقتاي ارتتى. قارۋلى كۇشتەردى قازىرگى زامانعى اۆياتسيالىق تەحنيكالارمەن جاراقتاندىرۋ اسكەرلەردىڭ ۇتقىرلىعىن ارتتىرىپ، اسكەري- كولىكتىك اۆياتسيا پاركىن جاڭارتۋعا مۇمكىندىك بەرەدى.
