تۇرعىن ءۇي پروبلەماسىن شەشۋ مەملەكەتتىك ساياساتتىڭ باسىم باعىتتارىنىڭ ءبىرى - د. نازاربايەۆا

استانا. قازاقپارات - «نۇر وتان» پارتياسىنىڭ ق ر پارلامەنتى ماجىلىسىندەگى فراكتسياسىنىڭ جينالىسى وتۋدە.

«بۇگىنگى فراكتسيانىڭ قاراۋىندا ءبىر عانا ماسەلە بار. ول - «بايتەرەك» ۇلتتىق باسقارۋشى حولدينگى» ا ق- نىڭ تۇرعىن ءۇي قۇرىلىسى باعدارلامالارىن ىسكە اسىرۋ تۋرالى ماسەلە»، - دەدى فراكتسيا جيىنىن اشقان ق ر پارلامەنتى ءماجىلىسىنىڭ ۆيتسە-سپيكەرى د. نازاربايەۆا.

تۇرعىن ءۇي پروبلەماسىن شەشۋ مەملەكەتتىك ساياساتتىڭ باسىم باعىتتارىنىڭ ءبىرى بولىپ تابىلاتىندىعىن باسا ايتقان ول: «مەملەكەت باسشىسى «نۇرلى جول - بولاشاققا باستار جول» اتتى قازاقستان حالقىنا جولداۋىندا تۇرعىن ءۇي قۇرىلىسى كولەمىن ۇلعايتۋعا ەكپىن قويا وتىرىپ، شەشۋ جولدارىن قاراستىرۋ مىندەتىن جۇكتەدى. ەلباسىنىڭ تاپسىرمالارىن ءساتتى ورىنداۋ ءۇشىن ءبىز پارتيا رەتىندە، پارتيانىڭ فراكتسياسى رەتىندە باقىلاۋ جۇمىسىن بەلسەندى تۇردە جۇرگىزۋگە ءتيىسپىز»، - دەدى.

سونداي-اق ۆيتسە-سپيكەر «نۇر وتان» پارتياسى ساياسي كەڭەسى وتىرىسىنىڭ قورىتىندىلارى بويىنشا فراكتسيا جانىنان بيۋجەت قاراجاتى مەن ۇلتتىق قور قاراجاتىنىڭ جۇمسالۋىن باقىلاۋ جونىندەگى 4 كوميسسيا قۇرىلعانىن ەسكە سالىپ ءوتتى.

«كوميسسيا جەتەكشىلەرى ۇكىمەت وتىرىسى جۇمىسىنا قاتىستى. قازىرگى تاڭدا ءوزارا ءىس-ارەكەتتىڭ پراكتيكالىق ماسەلەلەرىن پىسىقتاۋدا»، - دەدى ول.

اۆتور: مارلان جيەمباي