قازاقتىڭ قىزدارىن شاشىنان سۇيرەپ جاتقاندا قاراپ تۇرا المادىم - مالىك ۇزاقوۆ
كەيىن سول ءبىر ىزعارلى وقيعالاردى باسىنان كەشىرگەن ادامدارمەن تىلدەسۋدىڭ ءساتى ءتۇستى. جەلتوقساندا قار جامىلىپ، مۇز جاستانعان جاستاردىڭ ءبىرى مالىك ۇزاقوۆ ءوز ەستەلىكتەرىمەن ءبولىستى.
«16- جەلتوقسان مەن ءۇشىن ازالى كۇن. بۇل كۇنى الاڭدا بەيبىت شەرۋگە شىققان جۇزدەگەن قازاق بوزداقتارىنىڭ قانى توگىلگەن. قازىرگە دەيىن ەسىمە تۇسسە، كوزىمە جاس كەلەدى. قانشا دوستارىم، تانىستارىم قۇربان بولدى. مەن ول كەزدە 23 جاستا بولاتىنمىن. اسكەردەن كەلگەن بەتىم. دوستارىمىزعا زاۋىتقا قوناققا كەلگەنمىن. ەلىمىزدى 20-25 جىل باسقارعان قونايەۆتى ورنىنان الىپ تاستاعانىن ەستىپ، جاستار بەيبىت شەرۋگە شىققانبىز. جەلتوقساننىڭ سول ءبىر ايازدى كۇندەرىندە الاڭعا ءبىزدى ءبىر-اق تىلەك اپاردى. ەلباسىمىز قازاق ازاماتى بولسا ەكەن دەگەن. بارلىعىمىز ءوز ويىمىزدى ايتقىمىز كەلدى.
ءدىنىمىزدى، سالتىمىزدى بىلمەيتىن كولبيندى اكەپ باسشى ەتىپ قويعانىنا قارسى بولدىق. تريبۋنادا تاڭعى ساعات 6:30 دا مىقتى قارۋلانعان اسكەر بولدى. توبەلەستىڭ باسى بەيبىت شەرۋگە شىققان جاستاردى، ءورت سوندىرگىش ماشينامەن سۋ شاشىپ، جاس قىزدارىمىزدى تەپكىلەي باستاعاندا باستالدى. ونى كورىپ تۇرىپ ازاماتتىق رۋحىمىز جىبەرمەدى. قانشا قىزدارىمىز جاراقات الدى. ەس-ءتۇسسىز جاتتى. شامامىز جەتكەنشە قارسىلىق كورسەتتىك. تۇنگى 12 لەرگە تامان مەن دە ۇستالدىم. ۇكىمەت ءۇيىنىڭ قاسىندا قاردىڭ ۇستىندە 2 ساعاتتاي جاتتىق. قاتتى تەپكىنىڭ استىندا قابىرعام سىندى. 2 كۇن بويى سۇراققا الىپ، مويىنداۋىمدى بۇيىردى. مويىندامادىم. ءبىراق، كورسەتپەگەنى قالمادى. 2 كۇنەن كەيىن ادام تانىماستاي بولىپ شىقتىم.
كەيىن سوڭىمىزعا ۇ ق ك ءتۇستى. جۇمىستان شىعاردى. ودان كەيىن 25 جىلدان كەيىن اقتالىپ شىقتىق. مەن ويلايمىن كەڭەس ۇكىمەتىنىڭ كۇيرەۋىنە جەلتوقسان قوزعالىسى ۇلكەن ىقپال ەتتى. اسىرەسە، قازاق قىزدارىنىڭ ەرلىگىنىڭ ارقاسىندا كەلدى»، - دەدى مالىك ۇزاقوۆ.
مالىك ۇزاقوۆ اڭگىمەسىن جالعاستىرا كەلە، اتالعان كوتەرىلىس ازاتتىقتىڭ جولىنداعى ۇلت-ازاتتىق قوزعالىس دەپ اتالۋعا ابدەن لايىقتى.
اۆتور: گۇلميرا عوسمانالي
