قانات يسلام: ءار سپورتشىنىڭ چەمپيوندىق اتاقتان بۇرىن ادامدىق ارى بيىك بولۋ كەرەك - فوتو
كوكەيدە جۇرگەن كوپتەگەن ساۋالداردىڭ جاۋابىن العان سۇحباتتىڭ تولىق ءماتىنىن بۇگىن ۇسىنىپ وتىرمىز.
- كەشەدەن بەرى استاناداعى «داۋلەت» سپورت سارايىندا بوكستان فەدەراتسيا كۋبوگى ءوتىپ جاتىر. ءسىز استاناعا سول جارىسقا جانكۇيەر بولىپ كەلىپ وتىرسىز با، الدە جەكە شارۋالارىڭىزبەن ءجۇرسىز بە؟
- استاناعا ەكى ءتۇرلى جۇمىسپەن كەلدىم. بىرىنشىدەن، «استانا» پرەزيدەنتتىك كلۋبىمەن كەلىسىمشارت جاساسۋعا كەلدىم. ءارى وسى جارىستى جانكۇيەر رەتىندە تاماشالاۋدىڭ رەتى كەلىپ وتىر.
- «استانا» پرەزيدەنتتىك كاسىبي سپورت كلۋبىمەن كەلىسىمشارت جاساۋدا دەگەن اقپاراتتان ءبىزدىڭ دە قۇلاعدار بولعانىمىز بار. سول جۇمىستارىڭىز قالاي بولىپ جاتىر؟
- ول جۇمىستارىمىز نەگىزىنەن اياقتالىپ كەلەدى دەۋگە بولادى. نەگىزگى ماسەلەلەر بويىنشا ماقۇلدىق بەرىلدى. ەكى تاراپتىڭ زاڭگەرلەرى كەلىسىمشارتتى قاراپ، وزگەرتۋلەر ەنگىزىپ، سونىڭ بارلىعىن سويلەسىپ بولدى. ەندى وسى جىلدىڭ سوڭىنا دەيىن سوڭعى شەشىم قابىلدانۋى ءتيىس.
- «استانا» پرەزيدەنتتىك كاسىبي سپورت كلۋبىنا كىرۋ سىزگە قانشالىقتى ءتيىمدى، قاي جاعىنان قولايلى؟
- بۇل جەردە ەلىمە ەڭبەك سىڭىرمەي تۇرىپ، بىردەن ءتور مەنىكى دەي المايمىن. الدىمەن وسىندا ءوزىمدى دالەلدەۋىم كەرەك. سودان كەيىن عانا ءسوز ايتۋعا مۇمكىندىك تۋادى. دەگەنمەن، بۇدان بۇرىن ماعان شەتەلدىك كلۋبتار ۇسىنىستار جاساعان بولاتىن. وسىدان كەيىن «مەن نەگە ءوزىمىزدىڭ ەلدىڭ كلۋبتارىنىڭ اتىمەن شىقپايمىن» دەگەن وي كەلدى. «استانا» پرەزيدەنتتىك كاسىبي سپورت كلۋبىنىڭ دا كوپتەگەن مۇمكىندىكتەرى بار. سونداي-اق، شەتەلدە ءوز ەلىڭنىڭ اتىنداعى كلۋبتىڭ نامىسىن قورعاپ، جارىستارعا ءتۇسىپ جاتساڭ، ەلىڭدى تاعى ءبىر قىرىنان تانىتاسىڭ دەگەن ءسوز. وتانىڭدا وسىنداي مىقتى كلۋبتار بار ەكەنىن باسقالار دا بىلەدى. مەنىڭ نەگىزگى ماقساتىمنىڭ ءبىرى دە سول بولاتىن باياعىدان. قاي جاعىنان بولماسىن «استانانىڭ» ماعان ءتيىمدى جاقتارى كوپ.
- ناقتىراق ايتىڭىزشى، ءسىز ءۇشىن «استانا» پرەزيدەنتتىك كاسىبي سپورت كلۋبىنا كىرۋدە ەلدى ءناسيحاتتاۋ جاعى تيىمدىرەك پە، الدە جەكپە- جەكتەرىڭىزدىڭ وتۋىنە قارجىلىق قولداۋ جاعى باسىمىراق پا؟
- سپورتتا ەڭ ءبىرىنشىسى - وزىڭدەگى، ءوز ەلىڭدەگى بار مۇمكىندىكتى باسقالارعا تانىتۋ. قازىر نە كوپ، امەريكادا جۇرگەن بوكسشى كوپ. ول جاقتا كىمنىڭ، نەنىڭ اتىنان كەپ جاتقانىڭ ەشكىمدى قىزىقتىرمايدى. ال «استانا» دەگەننەن كەيىن وندا قازاقستان ەكەنىن بىردەن بىلەدى. ويتكەنى بوكس ارقىلى قازاقستاندى تانيدى. سول ءۇشىن ءوز ەلىمنىڭ اتىنان، قازاق ەلىنىڭ اتىنان شىعۋ مەن ءۇشىن قۋانىش. مەن جەڭىسكە جەتىپ جاتسام، ەلىمنىڭ ابىرويى ەسەلەي تۇسەدى دەپ بىلەم.
- باسقا دا كلۋبتاردان ۇسىنىستار ءتۇستى دەپ ايتتىڭىز. قانداي تانىمال، بەلگىلى كلۋبتار بار ما اراسىندا؟
- قازىرگى بەيبىت شۇمەنوۆتىڭ مەنەدجەرى بولىپ ىستەپ جاتقان كلۋبتان ماعان ۇسىنىستار كەلدى. ونىمەن بولاشاقتا بىرگە جۇمىس جاساۋىمىز مۇمكىن. ال «استانا» پرەزيدەنتتىك كاسىبي سپورت كلۋبى مەنىڭ ەلدەگى جانە شەتەلدەگى جارىستارىمدى قارجىلاندىرۋعا جانە ۋاقىتىندا ۇيىمداستىرۋعا تولىق مۇمكىندىگى بار.
- ءسىز «استانا» پرەزيدەنتتىك كاسىبي سپورت كلۋبىمەن كەلىسىمشارتقا وتىرعاننان كەيىن دە بۇرىنعى پروۋموۋتەرىڭىز نەلسون لوپەسپەن بىرگە جۇمىس جاساي بەرەسىز بە؟
- ءيا سولاي جالعاسا بەرەدى. «استانا» جاتتىعۋىم مەن باپكەرلەرىمە قاجەتتى قارجىمەن قامدايدى.
- بۇرىنعى ۋاقىتتاردا ءسىزدىڭ كوپتەگەن جانكۇيەرلەرىڭىز شەتەلدەردە ءوتىپ جاتقان جارىستارىڭىزدى وتاندىق ارنالارىمىزدان كورە الماعان ەدى. ەندى «استانا» پرەزيدەنتتىك كاسىبي سپورت كلۋبىمەن كەلىسىمشارتىڭىز ءساتتى اياقتالسا، كەلەسى جەكپە- جەكتەرىڭىز قازاقستاننىڭ تەلەارنالارىنان كورسەتىلە مە؟
- ارينە كورە الاسىزدار. بۇرىن كوپتىڭ ءبىرى بولىپ جۇردىك، قازىر ول جەردە دە تانىلا باستادىق. كاسىپقوي بوكستىڭ ورنى ءبىر بولەك. وندا بارا سالىپ ءتور مەنىكى دەي المايسىڭ. ول جاققا گەنانىڭ ءوزى 2005 - جىلى كەتكەن. ءبىراز ءجۇرىپ، كليچكولارمەن كەلىسىمشارتقا وتىرىپ، ەندى شىعىپ جاتىر. وعان قانشاما جىل بولدى. مەن دەگەن كەشە عانا باردىم. ەكى جىلدىڭ ىشىندە بىردەن 18 كەزدەسۋ وتكىزۋىم وڭاي شارۋا ەمەس. ول بىرەۋدىڭ 4-5 جىلدا جۇرەتىن جولى. مەنىڭ قولداۋشىلارىم جارىستى جاقسى ۇيىمداستىرىپ بەردى.
- كەزدەسۋلەرىڭىزدىڭ تەز ءوتىپ جاتقانى مارەگە تەزىرەك جەتۋ ءۇشىن بە؟
- ارينە. مەن ءبىر امەريكالىق كلۋبپەن كەلىسىمشارتقا وتىرسام، بار بولعانى ءبىر جىلدا 2-3 كەزدەسۋ وتكىزىپ، دەمالىپ جۇرەر ەدىم. سەنى سولار باسقارادى، ولار نە دەسە دە ءجون. قازىر ەشكىمگە جالتاقتاماي، دايىن بولسام، ءبىر ايدا ەكى جارىسقا قاتىسۋعا مۇمكىندىگىم بار. سول جاعىنان كوپ تيىمدىلىك بولدى.
- جالپى قازاق بوكسىنا قاراي اڭگىمە ايتا وتىرساق. قازىرگى قازاق بوكسىنا كوڭىلىڭىز تولا ما؟ جانە ءوزىڭىز ارالاسىپ تۇراتىن بوكسشىلار بار ما؟ سونداي-اق، ءوزىڭىزدىڭ جاس كۇنىڭىزدە ۇلگى تۇتقان بوكسشىلارىڭىز جونىندە ايتىپ وتسەڭىز.
- مەنىڭ ەڭ العاشقى جاتتىقتىرۋشىم دا وسى جاقتان بولدى عوي. دامير بۋدانبەكوۆ، نۇرعالي سافيۋللين، عالىم كەنجەبايەۆ، ەرماحان يبرايىموۆ، مۇحتارحان دىلدابەكوۆ، نۇرجان سمانوۆ سياقتى باپكەرلەر مەن بوكسشىلار الدىمىزداعى اعامىز بولدى. سولارعا قاراپ وستىك. كەيىن ءوزىمىزدىڭ قاتارلاس دوستارىمىز شىقتى: باقتيار ارتايەۆ، باقىت سارسەكبايەۆ، سەرىك ساپيەۆ ءبارىمىز بىرگە تەر توكتىك. ولاردىڭ ءبارى مەنىڭ جاقىن دوستارىم. بىرگە تاياق جەپ، بىرگە تاياق جەگىزىپ جۇردىك. ودان كەيىنگى شىعىپ جاتقان جانىبەك، دانيار، ادىلبەكتەر (جانىبەك ءالىمحان ۇلى، دانيار ەلەۋسىنوۆ، ادىلبەك نيازىمبەتوۆ - رەد. ) بار. ولار ارتتان ەرگەن ىنىلەرىمىز. ءبىر كەزدە بىزبەن بىرگە ءجۇردى. نۇرعالي اعام (نۇرعالي سافيۋللين - رەد. ) جاتتىقتىرعان كەزدە مەن ەكى رەت وليمپياداعا باردىم، الەم بىرىنشىلىكتەرىندە ءتاۋىر ونەر كورسەتتىم. ول كەزىندە قازىرگى ۇلتتىق قۇرامانىڭ باس باپكەرى مىرزاعالي ايتجانوۆتى، مۇحتارحان دىلدابەكوۆتى، نۇرجان سمانوۆتى جاتتىقتىرعان. بۇگىن تاڭەرتەڭ سول كىسىمەن كەزىگىپ، سالەم بەرىپ قايتتىق. قازىر دە ن. سافيۋللين - قازاقستان قۇراماسىنىڭ اعا جاتتىقتىرۋشىسى. وسىنداي كەرەمەت باپكەرلەر بار، سولاردىڭ ارقاسىندا بىزدەن دە مىقتى جىگىتتەر بيىك بەلەستەردى باعىندىرادى دەپ سەنەمىن. قازاققا بوكستان بەردى عوي اللا. مىرزاعالي ايتجانوۆ سياقتى اعالارىمىز تۇرعاندا ءبىزدىڭ قازاق بوكستا ءالى تالاي ۋاقىت الەمنىڭ كوشىن باستار.
- جاقىندا ب ا ق وكىلدەرى قانات يسلاممەن گەننادي گولوۆكين جۇدىرىقتاسۋى مۇمكىن ەكەنىن جارىسا جازىپ، قىزۋ تالقىعا سالعان بولاتىن. سول قاۋەسەت ءسوز تۋرالى ءسىزدىڭ ويىڭىزدى بىلسەك دەپ ەدىك. گولوۆكينمەن قارىم- قاتىناستارىڭىز قانداي...
- ءار بوكسشى ءوزىنىڭ باپكەرىنە «التىن» ەكەنى انىق! كىم ەكەنى بەلگىسىز، مەنىڭ باپكەرىم نەلسونعا بىرەۋلەر «قاناتتى گەنناديمەن جۇدىرىقتاستىرعىڭ كەلمەي مە؟» دەگەن باعىتتا حاتتار جىبەرگەن. ال وعان باپكەرىم: « ءبارى دە مۇمكىن» دەپ جاۋاپ بەرگەن. مىنە، بۇل اڭگىمە وسىدان باستالعان ەدى. گەنا - مىقتى بوكسشى. ول - ءبىزدىڭ الدىمىزداعى تۋ. الدىمىزداعى تۋ قۇلاماسىن، كاسىپقوي بوكسقا كەش قوسىلعان بىزدەر دە الدىمىزداعى تۋدىڭ قۇلاماعانىن قالامايمىز. گەنناديمەن وتە جاقسى قارىم- قاتىناستامىز، ەكەۋمىز ءبىر- ءبىرىمىزدى اۋەسقوي بوكستا جۇرگەننەن بەرى تانيمىز، تالاي جاتتىعۋ زالدارىندا بىرگە جاتتىقتىق. قازىر دە جاقسى ارالاسىپ تۇرامىز.
گەنناديدى سپورتشى رەتىندە دە، ازامات رەتىندە دە جاقسى سىيلايمىن. ءبىز، كەزىندە گەنا، باقتيار ارتايەۆ، باقىت سارسەكبايەۆتار ءبارىمىز ءبىر سالماقتىڭ بوكسشىلارى بولدىق. شەتتە جۇرسەم دە قازاقستانعا ءجيى كەلىپ ءجۇردىم. قازاقستاندىق باپكەرلەردەن دە كوپ ءتالىم الدىم. ەلىمىزدەگى بارلىق بوكسشىلاردى جاقسى بىلەمىن. بوكستاعى ءوز زامانداستارىممەن ءجيى قابارلاسىپ، ارالاسىپ تۇرامىن. ءبىراق، اۋەسقوي بوكستا گەنامەن شارشى الاڭدا كەزدەسىپ كورگەن جوقپىن. كاسىپقوي بوكستا دا كەزدەسپەيمىز. سەبەبى، گەنا ەكەۋىمىز دە ءبىر ەلدىڭ، قازاق توپىراعىنىڭ نامىسىن قورعاپ ءجۇرمىز. ال ءبىزدى ءبىر- بىرىمىزگە قارسى قويۋ اعايىندى كليچكولاردى ءبىر- بىرىمەن توبەلەستىرگەنمەن بىردەي. سوندىقتان، بۇل مۇمكىن ەمەس.
- جەكە وتباسىڭىز تۋرالى دا ايتىپ بەرسەڭىز. جاقىندا عانا «قانات وتباسىمەن امەريكادا تۇرىپ جاتىر ەكەن. بولاشاقتاعى بوكسشىنىڭ جوسپارى سول جاقتا سياقتى» دەگەن اڭگىمە تاراعان بولاتىن...
- جوق ولاي ەمەس، ولار وتكەندە جارتى جىل امەريكادا تۇرعانى راس. وتباسىم نەگىزىنەن وسى جاقتا قالادى. تەك اراسىندا مەن كوپ ۋاقىت سول جاقتا بولعان كەزىمدە قاسىمدا بولادى. ويتكەنى، امەريكادا ۋاقىتشا تۇرا تۇرۋعا مۇمكىندىكتەر بار. ال، امەريكاعا الىپ كەتۋ ويىمدا جوق. سەبەبى مەن بالا- شاعامنىڭ ءتىلىنىڭ قازاقشا شىعىپ، ءوز اتامەكەنىندە ءومىر سۇرگەنىن قالايمىن. دۇرىسى دا سول ەمەس پە؟ از كۇندىك راحاتتى ويلاپ، ادامنىڭ نەگىزگى جولىنان اداسپاعانى ءجون. بالالاردىڭ ءتىلى الدىمەن قازاقشا شىعىپ، سوسىن بارىپ قالعان ءتىلدى ۇيرەنسە دەپ ويلايمىن. بالانىڭ ءتىلى ءوز تىلىندە شىقپاعانى كەيىنگى بولاشاعى ءۇشىن پايدالى ەمەس. سوندىقتان مەنىڭ وتباسىممەن مۇحيت اسىپ، امەريكادا ءومىر سۇرسەم دەگەن نيەتىم جوق.
- جالپى وتباسى تۋرالى اڭگىمە قوزعاپ وتىرعاننان كەيىن جانۇياڭىز جايىندا ايتا كەتسەڭىز. قانشا بالاڭىز بار؟
- قۇدايعا شۇكىر، ءۇش بالام بار. وسى الماتىعا كەلىپ ۇيلەندىم عوي. قازىردە وتباسىم الماتىدا تۇرادى. بالالارىمنىڭ الدى ۇشتە، سوڭعىسىنا ءتورت اي بولدى. ءوز جۇرتىم الماتىدا، ناعاشى جۇرتىم شىعىس قازاقستانداعى زايسان وڭىرىندە تۇرادى. قايىن جۇرتىم ءوز جۇرتىم الماتى جاقتا.
- ءوزىڭىز بوكسشى بولىپ ءجۇرسىز، بولاشاقتا بالالارىڭىزدىڭ دا بوكسشى بولعانىن قالايسىز با؟
- مەن دە قالامايمىن، مەنىڭ پروۋموۋتەرىم دە قالامايدى (كۇلدى). نەلسون «بالاڭدى نەسىن اۋرە قىلاسىڭ، ءبىر ۇيدەن ءبىر بوكسشى شىقسا جەتەدى عوي» دەيدى. ەندى بالام ەسەيگەندە ءوزى تالاپتانىپ جاتسا كورەرمىز.
- امەريكادا تۇرۋعا، سونداي- اق، الەمدىك جارىستاردا شىعىپ جۇرگەن سوڭ اعىلشىن ءتىلىن ءبىلۋ ماڭىزدى ەكەنى شىندىق. ءتىل ۇيرەنۋ ماسەلەسى قالاي بولىپ جاتىر؟
- قازىرگە دەيىن ءتىل ۇيرەنۋگە مۇمكىندىكتەر بولمادى. الداعى ۋاقىتتا كۋرستارعا قاتىسۋ كەرەك بولىپ جاتىر. ءبىراق، اعىلشىن تىلىندە وزىمە قاجەتتى دەڭگەيدە سوزدىك قورىم بار.
- الەۋمەتتىك جەلىلەردى قانشالىقتى پايدالاناسىز؟ ەلدەگى جاڭالىقتاردى قايدان وقىپ بىلەسىز؟
- مەن نەگىزى الەۋمەتتىك جەلىلەردە وتىرمايمىن. وعان ۋاقىتتا شىعا بەرمەيدى. ەندى شەتەلدە جۇرگەن ۋاقىتتاردا ءوز ەلىڭدە نە جاڭالىقتار بولىپ جاتىر دەپ، حابارلاردى كورەمىن. «قازاقپارات» سايتىنان دا ەلدەگى جاڭالىقتاردى وقىپ تۇرامىن.
- ءسىزدىڭ اتىڭىزدا سايت اشىلادى دەپ ەستىگەن ەدىك...
- باسىندا ونداي جوسپاردىڭ بولعانى راس. ءبىراق، كەيىن «استانا» پرەزيدەنتتىك كلۋبىمەن كەلىسىمشارتقا قول قوياتىن بولعان سوڭ ول باستاما توقتاپ تۇر. ويتكەنى، كەلىسىمشارتتا جازىلعان، ماعان قاتىستى بارلىق جوبانى سولار باسقارادى.
- قازاقتا ءبىر ءسوز بار عوي «جاۋىن جەڭگەن جارتى باتىر، ءوزىن جەڭگەن حاس باتىر» دەگەن. وزىڭدە جەڭە الماي جۇرگەن قاندايدا ءبىر كەمشىلىك ادەتتەر بار ما؟
- ادام بولعان سوڭ كەمشىلىكسىز بولۋ مۇمكىن ەمەس شىعار. ءوزىم تۋرالى ايتار بولسام، ءوز جۇمىسىما عانا قاتتى ۇقىپتىمىن. ال قالعان وتباسىنداعى كىشىگىرىم ىستەرگە مۇلدە كوڭىل اۋدارمايمىن. نەگە ەكەنىن بىلمەيمىن، ءوزىمنىڭ ىستەپ جۇرگەن ىسىمنەن باسقاسى جۇمىس ەمەس سياقتى كورىنەدى.
- قازىرگى ۋاقىتتا جاس بالالار ءسىز سياقتى چەمپيون بولامىن دەپ بوكس ۇيىرمەلەرىنە جازىلىپ جاتىر. سول وسكەلەڭ ۇرپاقتارعا قاندايدا ءبىر ايتار كەڭەس، اقىلدارىڭىز بار ما؟
- سپورت زالعا كەلگەندە ءبارى «چەمپيون بولامىن» دەيدى. مەن ەڭ العاش زالعا بارعاندا سول كەزدە، ءبارىمىزدى قابىلداپ العان جاتتىقتىرۋشى «بۇندا نەگە كەلدىڭدەر» دەپ سۇرادى. ءبارىمىز ءبىر اۋىزدان چەمپيون بولۋعا كەلگەنىمىزدى ايتامىز عوي. سوندا ول كىسى «ماعان چەمپيوننىڭ كەرەگى جوق. ءبىرىنشى ادام بولۋلارىڭ كەرەك» دەپ ەدى. «سەندەر چەمپيون بولىپ، ارتىنان تىلدەرىڭدى شايناپ، ءبىر جەردە توپىراققا اۋناپ جاتساڭدار، نەمەسە ەل امانداسا المايتىنداي دارەجەدە تالتاڭداپ جۇرسەڭدەر ول دۇرىس بولمايدى» دەگەن ەدى. بۇل ون بەس جىل بۇرىن ايتىلعان ءسوز بولسا دا، ءالى كۇنگە سانامدا جاڭعىرىپ تۇرادى.
«سەن چەمپيون بولىپ موينىڭا مەدال ءىلدى، سودان كەيىن تۇعىردان تۇسكەن سوڭ چەمپيون ەمەسسىڭ. ەندى كەلەسى ۋاقىتتا ناعىز چەمپيون ەكەنىڭدى دالەلدەۋگە تالپىنۋىڭ كەرەك» . وسى ەكى وي- ءتۇيىن ىلعيدا ويىمدا جۇرەدى. «جارىس ءبىتتى، ەندى كىم شىعادى، قالاي دايىندالۋىم كەرەك دەپ جۇرەمىن» . بۇل - مەنىڭ ۇستانىمىم. ەگەر ادام اۋەلگى ادامي ويىنان اينىپ، باسقا ءبىر نارسە تىزگىندەسە، وندا جۇرىسىنەن جاڭىلىپ قالادى. بىزدە كوپتەگەن جەڭىسكە جەتكەن ادامدار قاتەلىكتەرگە بوي الدىرىپ جاتادى. سول ءۇشىن ايتار ەدىم، جاس كەزىنەن باستاپ، ساربازداردى ناعىز گەنەرال بولۋعا تاربيەلەۋ كەرەك. ونى دۇنيە ەمەس، كوك تۋدىڭ جەلبىرەگەنى قىزىقتىراتىن بولۋ كەرەك. قازىرگى ۋاقىتتا زالعا كەلە سالىپ، «ماشينا الاسىڭ، ءۇي الاسىڭ» دەگەن دۇنيەنىڭ اڭگىمەسى ايتىلىپ جاتادى. دۇنيەاۋي اڭگىمە ادامنىڭ ىشىنە كىردى، ماقساتىڭىز تومەندەيدى. ءتىپتى، ويلاۋ جۇيەڭىز دە قۇلدىراي باستايدى. تەك سول دۇنيەنىڭ ماڭايىندا عانا جۇرەتىن بولاسىز. بەس ادامنىڭ الدىندا ماقتاۋ ءسوز ەستىگىڭىز كەلەدى. باسقا جۇرتتار ەكى رەت، ءۇش رەت وليمپياداعا قاتىسىپ جاتىر، ەل ەلۋ جاسقا دەيىن سپورتتا ءجۇر، ءبىز نەگە جۇرە المايمىز؟ ولاردان قاي جەرىمىز كەم ءبىزدىڭ؟ باسقالارمەن ءوزىمىزدى سالىستىرۋىمىز قاجەت، جاستاردى سولاي تاربيەلەۋگە ءتيىستىمىز.
- ءوزىڭىزدىڭ العاشقى مەكتەبىڭىز التايدا بولدى عوي. قازىر سول جاقتا الەمدىك شىڭداردى باعىندىرۋعا مۇمكىندىگى بار، سوڭىڭىزدان ەرگەن جاس بوكسشىلار بار ما؟
- تاربيە مىقتى بولسا، بارلىق جەردەن مىقتىلار شىعادى ەكەن. باستىسى - تاربيەسى دۇرىس بولسا. مەنىڭ قازىرگى جاتتىقتىرۋشىم - نەلسون لوپەس دەگەن كۋبالىق. جاسى الپىسقا كەلدى. سول ايتادى، كۋبالىقتار مەن قازاقتاردىڭ دەنە ساپاسىن سالىستىرسام، قازاقتار كۇشتى. ءبىراق كۋبالىقتاردىڭ جەڭىپ جاتقان سەبەبى - تاربيەسى جاقسى، ولاردا رۋح جاعىنان مىقتى دەيدى.
نەلسوننىڭ ولاي ايتقانىنىڭ ءجونى بار سياقتى، وليمپياداعا بارعاندا كۋبالىقتاردىڭ سىرتقى بەينەسىنەن- اق وزدەرىنە دەگەن سەنىمدى كورەسىڭ. ال باسقا ەلدىڭ سپورتشىلارى بار. ولاردى تۋرا اتۋعا الىپ بارا جاتقانداي، ميلليون ادامدى موينىنا مىنگىزىپ العانداي باستارى تومەن سالاقتاپ جۇرەدى.
- ەلىمىزدىڭ ەڭ باستى مەرەكەسى - تاۋەلسىزدىك كۇنىندە قازاقستاندىقتارعا نە تىلەيسىز؟ ءوزىڭىز وسى مەرەكەنى قالاي اتاپ وتەسىز؟
- تاۋەلسىزدىك - ەلىمىزدىڭ ەڭ ۇلكەن ۇلىق مەرەكەسى. بارشا قازاقستاندىقتاردى وسى مەرەكەمەن قۇتتىقتايمىن. ءبىزدىڭ بۇگىنگى جەڭىسىمىز بەن جەتىستىگىمىز وسى تاۋەلسىزدىكتىڭ ارقاسى. تاۋەلسىز ەلىمىز بولماسا، ءبىزدىڭ ەرلىگىمىز بەن تابىسىمىز كىمگە كەرەك؟ مەملەكەتىمىزدىڭ بۇگىنگى بەرەكە- بىرلىگى جاراسقان وسى مامىراجاي كۇندەرى ۇزاعىنان بولسىن دەپ تىلەيىك. تاۋەلسىزدىك مەرەكەسى - پاتريوتتىق مەرەكە.
جەلتوقساننىڭ ەكپىنىمەن كەلگەن تاۋەلسىزدىكتىڭ ءبىز ءۇشىن الار ورنى قاشان دا بولەك. سوندىقتان دا «تولارساقتان ساز كەشكەن» باتىر بابالارىمىزدىڭ ءار جىلدا توگىلگەن قانىنىڭ، ۇلى مۇراتتار جولىندا قۇربان بولعان اسىل ازاماتتارىمىزدىڭ اسقاق ارماندارىنىڭ ارقاسىندا قول جەتكىزگەن تاۋەلسىزدىكتى ءبىز ءارقاشان ماقتان تۇتىپ، قاستەرلەي بىلۋگە ءتيىستىمىز. بىلە بىلسەك، بۇل - ءبىزدىڭ ازاماتتىق پارىزىمىز، ادامدىق بورىشىمىز.
مەنىڭ وتباسىمدا تاۋەلسىزدىك كۇنى ۇلكەن توي بولادى. جاقسىلاپ تۋىس- تۋعان، اعايىن- دوستار جينالىپ، ۇلكەن داستارحان جاساپ، ارنايى اتاپ وتەمىز.
تالاي ۇلت پەن ۇلىستىڭ ورتاق مەكەنىنە اينالعان ۇلى دالادا ازات ەلدىڭ ازاماتى اتانعاننان اسقان باقىت جوق. قازاقپارات ۇجىمىنا دا تابىستار تىلەيمىن. سىزدەر دە تاۋەلسىزدىكتىڭ تال بەسىگىندە تەربەلىپ، جازارلارىڭىز مول، وقىرماندارىڭىز كوپ بولسىن. بارلىق وتانداستارىمىزعا قىران قۇسى قالىقتاعان كوك اسپانىمىزدىڭ استىندا باياندى دا باقىتتى عۇمىر سىيلاسىن.
- سۇحباتىڭىزعا راحمەت!
دايىنداعان بەيسەن سۇلتان ۇلى
