قاراعاندى توپىراعىنان شىققان بوكسشىمىن - الەم چەمپيونى ولەگ ماسكايەۆ

استانا. قازاقپارات - بۇگىن استاناعا ات باسىن بۇرعان اتاقتى بوكسشى ولەگ ماسكايەۆ ءوزىنىڭ اتاق-داڭقىنا تەك قاراعاندى بوكس مەكتەبىنىڭ ارقاسىندا قول جەتكىزگەندىگىن ايتتى.

ايتا كەتەيىك، ولەگ ماسكايەۆ قازاقستان تۋماسى، كاسىپقوي بوكستا 2006-2008-جىلدارى WBC نۇسقاسى بويىنشا الەم چەمپيونى اتانعان. ول قاراعاندىدا وتكەلى وتىرعان عالىم جارىلعاپوۆ اتىنداعى حالىقارالىق تۋرنيردى تاماشالاۋعا كەلگەن بولاتىن.

«مەن ءوزىم قاراعاندى وبلىسى، اباي اۋدانىنان شىقتىم. جارىلعاپوۆ اتىنداعى تۋرنيرگە سان مارتە قاتىسىپ، وندا سان مارتە جەڭىسكە جەتكەنمىن. تاعدىر جازعانى بولار، اسكەري قىزمەتىمدى وزبەكستاندا وتكىزدىم دە، سول جاقتا ۇلكەن سپورتقا بەت بۇردىم. دەگەنمەن مەن ءوزىمنىڭ بوكس مەكتەبىم قازاقستاندا، قاراعاندىنىڭ اباي قالاسىندا قالىپتاسقانىن ەشقاشان ۇمىتقان ەمەسپىن. سول كەزدەگى جاتتىعۋلار، بوكستاعى العاشقى قادامدارىما قولداۋ كورسەتكەن باپكەرلەر جادىمدا. وكىنىشكە وراي ۇلكەن رينگتە مەن قازاقستان نامىسىن قورعاعان جوقپىن. وزبەكستان اتىنان، كەيىن رەسەي تۋىنىڭ استىندا ونەر كورسەتتىم. ءبىراق مەن ءوزىمنىڭ شىققان جەرىمدى ۇلكەن قۇرمەتپەن ەسكە الىپ ءجۇردىم، مەن - قاراعاندىدانمىن. وسى وڭىردەن شىققان بارلىق بوكسشىلاردى تانيمىن، ولاردىڭ ءار قادامدارىن باقىلاپ جۇرەمىن. قايدا بولسام دا، قاراعاندى جەرىنىڭ، اباي جەرىنىڭ نامىسىن قورعاپ جۇرەمىن»، - دەپ اتاپ ءوتتى ول.

اۆتور: جاسۇلان جولدىبايەۆ