مەملەكەتتىك ناگرادالار قايراتكەرلەرگە ەرەكشە قانات بىتىرەدى - اسانالى ءاشىموۆ

استانا. قازاقپارات - بۇگىن اقوردادا مەملەكەت باسشىسى نۇرسۇلتان نازاربايەۆ ەلدىڭ الەۋمەتتىك- ەكونوميكالىق جانە مادەني دامۋىنا، حالىقتار اراسىنداعى دوستىق پەن ىنتىماقتاستىقتى نىعايتۋعا قوسقان ەلەۋلى ۇلەسى جانە بەلسەندى قوعامدىق قىزمەتى ءۇشىن ازاماتتاردىڭ ۇلكەن ءبىر توبىن مەملەكەتتىك ناگرادالارمەن ماراپاتتاعان بولاتىن.

وسىعان وراي، ەلباسىنىڭ قولىنان ناگرادا العان 1- دارەجەلى «دوستىق» وردەنىنىڭ يەگەرى، م. اۋەزوۆ اتىنداعى قازاق مەملەكەتتىك اكادەميالىق دراما تەاترىنىڭ كوركەمدىك جەتەكشىسى اسانالى ءاشىموۆ بارشا قازاقستاندىقتاردى تاۋەلسىزدىك كۇنىمەن قۇتتىقتادى.

«بۇعان دەيىن «وتان» وردەنىن العان ەدىك. بۇگىن مەملەكەت باسشىسىنىڭ قولىنان تاعى ءبىر ۇلكەن ماراپاتقا يە بولىپ وتىرمىز. ەڭبەكتىڭ باعالانعانى، ونىڭ ىشىندە تۇڭعىش پرەزيدەنتتىڭ قولىنان ماراپات الۋ ءارقاشاندا قىمبات. تاۋەلسىزدىكتىڭ الدىندا كوپتەگەن قايراتكەرلەر ماراپاتتالىپ جاتقانى قۋانتادى. ەلىمىزدەگى ءاربىر ناگرادانىڭ ءوز ورنى، ءوز باعاسى بار. سونىڭ ىشىندە ونەر ەڭبەككەرلەرىنىڭ ماراپاتقا يە بولۋىن مەن شىن جۇرەكتەن لايىقتى دەر ەدىم، بۇل قايراتكەرلەرگە ەرەكشە قانات بىتىرەدى»، - دەدى ا. ءاشىموۆ.

 سونىمەن قاتار، 1- دارەجەلى «دوستىق» وردەنىنىڭ يەگەرى بارشا قازاقستاندىقتاردى ەلىمىزدىڭ ۇلىق مەرەكەسىمەن قۇتتىقتاي وتىرىپ، ونەر قايراتكەرلەرىنىڭ ەڭبەگىنە جەمىس تىلەدى.

اۆتور: قانات مامەتقازى ۇلى