جازۋشى، فيلولوگيا عىلىمدارىنىڭ دوكتورى ابدۋلحاميت مارحابايەۆ دۇنيەدەن وزدى
ابدۋلحاميد مارحابايەۆ - 1938 - جىلى 18 - ساۋىردە قىزىلوردا وبلىسى، ارال اۋدانى، اۋان اۋىلىندا دۇنيەگە كەلگەن. 1964 - جىلى قازاق مەملەكەتتىك ۋنيۆەرسيتەتىنىڭ فيلولوگيا فاكۋلتەتىن (جۋرناليستيكا ءبولىمى) بىتىرگەن. «ءبىلىم جانە ەڭبەك» («زەردە) جۋرنالىنىڭ ادەبي قىزمەتكەرى، ءبولىم مەڭگەرۋشىسى (1964-1967)، قازاق مەملەكەتتىك ۋنيۆەرسيتەتى جۋرناليستيكا فاكۋلتەتىنىڭ اسسيستەنتى، اعا مۇعالىمى، دوتسەنتى (1967-1976) قىزمەتتەرىن اتقارعان.
«ءبىلىم جانە ەڭبەك» جۋرنالىنىڭ باس رەداكتورى (1976-1985)، «جاڭا فيلم» جۋرنالىنىڭ اعا رەداكتورى، قازاق ك س ر باسپا، پوليگرافيا جانە كىتاپ ساۋداسى ىستەرى جونىندەگى مەملەكەتتىك كوميتەتى باس رەداكتسياسىنىڭ اعا رەداكتورى (1981-1982)، قازاق ورتالىق مۇراجايىنىڭ باسپا- رەداكسيا سەكتورىنىڭ اعا رەداكتورى، سەكتور مەڭگەرۋشىسى (1985-1987) بولىپ ىستەگەن. كوپ جىلدان بەرى قاز ۇ ۋ-دا ۇستازدىق قىزمەتتە بولدى. فيلولوگيا عىلىمدارىنىڭ كانديداتى (1972)، دوكتورى (2001)، جۋرناليستيكا فاكۋلتەتىنىڭ دوتسەنتى (1975)، پروفەسسورى (1997).
1959 - جىلدان رەسپۋبليكالىق باسىلىمداردا عىلىمي-فانتاستيكالىق جانر سالاسىندا اڭگىمە-پوۆەستەر جازا باستادى. «عارىشتاعى قىمىز» اتتى تۇڭعىش جيناعىنان (1972) باستاپ، «ارال اۋەندەرى» (1980)، «بالالاردىڭ امان قالعانىن ايت!» (1997)، «اسپانعا قۇلادى دا كەتتى» (1997)، «جارىلقاۋشى...» (1998)، «توسىن عارىشحات» (1998)، «شورتان پلانەتاسى، سەن كىنالىسىڭ!» (2008)، « قىزىق قيال» (2008)، ت. ب. ونداعان كوركەم شىعارمالارى جەكە كىتاپ بولىپ شىقتى.
جەكە تۋىندىلارى « قىزىل ساۋلە» (1962)، «بايقوڭىر شوق جۇلدىزى» (1979)، «وت-تاس» (1981)، «جەرۇيىققا ساياحات» (1984)، «وتانىمىزدىڭ تاۋەلسىزدىگىنە تارتۋ» (2006) جيناعىنا ەنگەن. كەيبىر شىعارمالارىن ورىس تىلىندە «مولودايا گۆارديا» باسپاسىنىڭ جىل سايىنعى «فانتاستيكا» جيناعى، ۋكراين تىلىندە «مولود» باسپاسى، مولدوۆان تىلىندە «ليتەراتۋرا ارتيستيكە» باسپاسى باسىپ شىعاردى.
فانتاستيكا جانرىنىڭ تابيعاتى مەن تەوريالىق ەرەكشەلىكتەرىن ايقىندايتىن فانتاستيكاتانۋ حاقىندا «قولىڭدى اكەل، كەلەشەك. قازاق فانتاستيكاسى: كەشە، بۇگىن جانە...» (1978)، «قازاق فانتاستيكالىق ادەبيەتى.
جىلنامالاۋ، قاراستىرۋ، توپتاستىرۋ، دارالاۋ، قيسىنداۋ، دايەكتەۋ» (1998)، «قازاق فانتاستيكاسىنىڭ پوەتيكاسى» (2008) اتتى مونوگرافيالارى، «يسلام- عىلىم- جۋرناليستيكا» وقۋلىعى جارىق كوردى.
اۋدارما سالاسىندا شىققان ەڭبەكتەرى: ءازىربايجان قالامگەرى ح. عاسىلوۆانىڭ «جايلى مەكەن» (1974)، ۆ. ميحانوۆسكييدىڭ «شەكسىزدىككە شەرۋ» (1990)، «فانتاستيكالىق امەريكا ءافسانالارى» (2007).
