ق ر ۇلتتىق بانكى مەن قىتاي حالىق بانكى اراسىندا ەسەپ ايىرىسۋ مەن تولەمدەر ۇيىمداستىرۋ بويىنشا ارنايى كەلىسىمدەرگە قول قويىلدى
بۇل تۋرالى بۇگىن ق ر ۇلتتىق بانكىنىڭ باسپا ءسوز قىزمەتىنەن حابارلادى.
«كەلىسىمدەرگە قىتاي حالىق رەسپۋبليكاسى مەملەكەتتىك كەڭەسىنىڭ پرەمەرى لي كىشياڭنىڭ قازاقستان رەسپۋبليكاسىنا رەسمي ساپارى شەڭبەرىندە 2014 - جىلعى 14 - جەلتوقساندا استانا قالاسىندا ەكى مەملەكەتتىڭ ۇكىمەت باسشىلارىنىڭ قاتىسۋىمەن قازاقستان رەسپۋبليكاسى ۇلتتىق بانكىنىڭ ءتوراعاسى قايرات كەلىمبەتوۆ جانە قىتاي حالىق بانكىنىڭ ءتوراعاسى جوۋ شياوچۋان قول قويدى» - دەلىنگەن حابارلامادا.
ەسەپ ايىرىسۋ مەن تولەمدەردى ۇيىمداستىرۋ تۋرالى كەلىسىم - قازاقستان مەن قىتاي رەزيدەنتتەرى اراسىندا شەت ەلدىك جانە ۇلتتىق ۆاليۋتالاردا ەكى ەل اۋماعىندا تاۋارلارعا، قىزمەتتەرگە جانە باسقا وپەراتسيالار بويىنشا ەسەپ ايىرىسۋ مەن تولەمدەردى جۇزەگە اسىرۋعا مۇمكىندىك بەرەدى.
سونىمەن قاتار، اتالعان كەلىسىمدە ۇلتتىق ۆاليۋتالاردىڭ قولدانىلۋ اياسىن وپەراتسيالاردىڭ گەوگرافياسى مەن سپەكترىنە قاراي كەڭەيتۋ جانە يۋان/تەڭگە ۆاليۋتالىق جۇبىنىڭ ساۋداسىن اشۋ سالاسىندا ىنتىماقتاستىق ورناتۋ كوزدەلگەن. وسىلايشا، بۇل كەلىسىم ۇلتتىق ۆاليۋتالاردى ەكىجاقتى ەسەپ ايىرىسۋلاردا پايدالانۋ سالاسىن كەڭەيتۋ ءۇشىن قۇقىقتىق نەگىز قۇراي الادى.
قازاقستان تەڭگەسى/قىتاي يۋانى ۆاليۋتالىق سۆوپى تۋرالى كەلىسىم جالپى سوماسى 7 ميلليارد يۋانعا/200 ميلليارد تەڭگەگە جاسالدى. بۇل كەلىسىمنىڭ قاراجاتى ەكى ەل اراسىندا ۇلتتىق ۆاليۋتالاردا ساۋدا- ساتتىقتى قارجىلاندىرۋ ءۇشىن پايدالانىلۋى مۇمكىن. كەلىسىم، ەكى ەلدىڭ ورتالىق بانكتەرى ۋاعدالاسقان سۆوپ-جەلىنى جاڭارتادى.
ەكى كەلىسىم دە قازاقستان مەن قىتايدىڭ ۇلتتىق ۆاليۋتالارىندا ءوزارا ساۋدانى جانە تىكەلەي ينۆەستيتسيالاردى دامىتۋ ءۇشىن وڭتايلى جاعدايلار جاساۋعا باعىتتالعان.
2014 - جىلعى 25 - قىركۇيەكتە قارجىلىق ىنتىماقتاستىق جونىندەگى قازاقستان- قىتاي كىشى كوميتەتىنىڭ توعىزىنشى وتىرىسى شەڭبەرىندە قازاقستان قور بيرجاسىندا تەڭگە/يۋان ۆاليۋتالىق جۇبىمەن ساۋدا جاساۋ ىسكە قوسىلعان بولاتىن. ەندى، قىتايدىڭ بانكارالىق ۆاليۋتالىق ساۋدا ورتالىعىنىڭ وڭىرلىك نارىعىندا (ءۇرىمجى ق. ) تەڭگە/يۋان ساۋداسى 2014 - جىلعى 16 - جەلتوقساندا باستالادى.
ەكى ەلدىڭ بانكارالىق نارىعىنا جاڭا ۆاليۋتالىق قۇرالدى ەنگىزۋ ارقىلى تەڭگە/يۋان ۆاليۋتالىق جۇبىنىڭ ساۋداسى ءۇشىن ينفراقۇرىلىمداردى قۇرۋ - ۇلتتىق ۆاليۋتالاردا ءوزارا ساۋدانى دامىتۋعا ىقپال ەتەتىن بولادى.
ەسەپ ايىرىسۋ مەن تولەمدەردى ۇيىمداستىرۋ تۋرالى كەلىسىمگە قول قويىلا وتىرىپ، قازاقستان رەسپۋبليكاسىنىڭ ۇلتتىق بانكى مەن قىتاي حالىق بانكى اراسىنداعى شەكارالاس اۋداندارداعى ساۋدادا بانكارالىق ەسەپ ايىرىسۋلار تۋرالى 2005 - جىلعى 14 - جەلتوقسانداعى قويىلعان كەلىسىمنىڭ قولدانىلۋى توقتاتىلدى.
اۆتور: جاپپاربەرگەن ايبوتا
