قۇنانبايدىڭ ءمورىنىڭ تاڭباسى تابىلدى

استانا. قازاقپارات - سەمەيدە العاش رەت ابايدىڭ اكەسى قۇنانبايدىڭ ءمورىنىڭ باسپا تاڭباسى جۇرتشىلىقتىڭ نازارىنا ۇسىنىلدى.

بۇل جايىندا «24.kz» تەلەارناسى حابار تاراتتى. مۇراجاي ماماندارىنىڭ ايتۋىنشا، بۇل جادىگەر ومبى مۇراعاتىنداعى قۇجاتتاردىڭ اراسىنان تابىلعان.

باسپا تاڭبادا قۇنانباي قاجىنىڭ اتى-ءجونى تايعا باسىلعان تاڭباداي انىق كورىنىپ تۇر. بيىل قۇنانباي قاجىنىڭ تۋعانىنا 210 جىل تولعانىن ەستەرىڭىزگە سالا كەتكىمىز كەلەدى. ونىڭ ءمورىنىڭ تاڭباسى اباي ادەبي-مەموريالدىق مۇراجايداعى كورمەگە قويىلدى.

سونىمەن قاتار، ءوز ءداۋىرىنىڭ الدىڭعى قاتارلى قوعام قايراتكەرى بولا بىلگەن قۇنانباي قاجىنىڭ ومىرىنەن سىر شەرتەتىن فوتوسۋرەتتەرى، كىتاپتارى جانە قۇجاتتارى قويىلعان.

مارجان مۇحامەدوۆا، مۇراجايدىڭ جەتەكشى عىلىمي قىزمەتكەرى:

-  قۇنانباي وسكەنبايەۆ 1849-1852 - جىلدار ارالىعىندا قارقارالى وكرۋگىنىڭ اعا سۇلتانى بولعان. سول جىلدارى وسى ءموردى پايدالانسا كەرەك. كەيبىر قۇجاتتاردا ول كىسى تۇسىنىكتەمە بەرىپ، ءوزىنىڭ ءمورىن قويادى.