قازاقستاننىڭ جاستارى ءوز تاريحىن ءبىلۋى كەرەك - باۋىرجان بايبەك
بۇل تۋرالى پارتيانىڭ باسپا ءسوز قىزمەتىنەن حابارلادى.
ايتا كەتەيىك، بۇگىن «نۇر وتان» پارتياسىنىڭ جانە « ERG كومەك» قايىرىمدىلىق قورىنىڭ كومەگىمەن قازاقستان رەسپۋبليكاسى تاۋەلسىزدىگىنىڭ 23 جىلدىعىنا وراي، «تاۋەلسىزدىك شەجىرەسى. قازاقستان رەسپۋبليكاسى» 50 تومدىق تاريحي-دەرەكتى ەڭبەكتىڭ كەزەكتى 10 تومىنىڭ تۇساۋكەسەرى ءوتتى.
«ءبىز جاستار دەگەندە 20 مەن 30 دىڭ اراسىنداعى ازاماتتاردى ايتامىز. ولار الدىڭعى بۋىن سەكىلدى قيىنشىلىق كورمەي ءوستى. ەلباسىنىڭ ساياساتى - بەيبىتشىلىكتىڭ، تۇراقتىلىق پەن كەلىسىمنىڭ ارقاسىندا الاڭسىز ءومىر سۇرۋدە. ال، ولاردىڭ اتا-انالارى كوپتەگەن قيىن-قىستاۋ زامانداردان ءوتتى. تاۋەلسىزدىگىمىز تۇعىرلى بولۋى ءۇشىن جاستار ءوز تاريحىن ءبىلۋى كەرەك»، - دەدى ب. بايبەك.
سونداي-اق، ول «نۇر وتان» حالىقتىڭ پارتياسى بولعاندىقتان وسىنداي يگى ىستەرگە قولداۋ كورسەتۋ باستى پارىز ەكەندىگىن ايتتى.
«قازاقستاننىڭ كوك بايراعىن كوتەرەتىن كىمدەر؟ بىزدەن كەيىنگى تولقىن جاستاردى كوزى اشىق، كوڭىلى وياۋ. ولار بىرنەشە ءتىل مەڭگەرگەن. وكىنىشتىسى، كەيبىر جاستار تاريح تۇگىلى، ءوز انا ءتىلىن بىلمەيدى. سول سەبەپتەن، «نۇر وتان» پارتياسىنىڭ باستى ماقساتى - جاستاردى وتان سۇيگىشتىككە تاربيەلەۋ ارقىلى جەتىستىككە جەتەلەۋ. ەلباسى «جاستار - ءبىزدىڭ التىن قورىمىز» دەپ جاقسى ايتتى»، - دەدى ب. بايبەك.
ونىڭ ايتۋىنشا، جاڭا تەحنولوگيانىڭ زامانىندا جاستار مالىمەتتى قىسقا-نۇسقا ەتىپ العىسى كەلەدى.
«وسى ورايدا «مۇنارا. ك ز» سايتىن اشىپ، تاريح، ءدىن، ءداستۇر تاقىرىپتارىندا قىزىقتى كونتەنت جاساپ وتىرمىز. بۇل كىتاپتاردىڭ قۇندى ماتەريالدارى دا سول سايتتا جارىق كورەتىن بولادى. ەلباسى «ينتەرنەت وقىعان جاستاردى كىتاپ وقىعان جاستار بيلەيدى»، دەپ ءدوپ باسىپ ايتتى. سول سەبەپتى ءبىز جاستاردىڭ ناعىز ءبىلىم بۇلاعى - كىتاپتان سۋسىنداۋىنا جاعداي جاساۋىمىز قاجەت»، - دەدى ب. بايبەك.
