الماتى دارىگەرلەرى ا ق ش-تان ارنايى ۇشاقپەن جەتكىزىلگەن ايەلدىڭ دەنساۋلىعى جايلى تۇسىنىكتەمە بەردى

الماتى. قازاقپارات - الماتى قالالىق دەنساۋلىق ساقتاۋ باسقارماسىنىڭ وكىلدەرى كەشە الماتىعا ا ق ش- تان ارنايى رەيسپەن جەتكىزىلگەن ناۋقاس ايەلدىڭ دەنساۋلىعى جايلى ايتىپ بەردى.

ازىرگە ناۋقاستىڭ جاعدايى اۋىر حالدە بولىپ وتىر، دەيدى ماماندار.

«11- جەلتتوقساندا ناۋقاس الماتىداعى جەدەل شۇعىل مەديتسينالىق كومەك كورسەتۋ اۋرۋحاناسىنا ءتۇستى. ءبىراق، ءبىر قۋانىشتىسى، دەنساۋلىعى ناشارلاپ بارا جاتقان جوق، تۇراقتى. ازىرگە وزدىگىنەن تاماق ىشە المايدى، ەسىن بىلگەنمەن، مي قىزمەتىنە ۇلكەن زاقىم كەلگەن. بىزدە مۇنداي ناۋقاستاردى ەمدەۋدە جەتكىلىكتى تاجىريبەمىز بار. الماتىدا 4 ينسۋلت ورتالىعى: 7№, 4№, ورتالىق قالالىق اۋرۋحانا، جەدەل شۇعىل مەديتسينالىق كومەك كورسەتۋ اۋرۋحاناسىندا شوعىرلانعان. جىل سايىن جەدەل شۇعىل مەديتسينالىق كومەك كورسەتۋ اۋرۋحاناسىنىڭ وزىنە 700 دەن استام ناۋقاستاردىڭ 5 تەن 1 ءى، ياعني 20 پايىزى گەمورراگيالىق ينسۋلتپەن تۇسەدى. ازىرگە بۇدان ارتىق ەشتەڭە ايتا المايمىز. مۇنداي دياگنوزبەن تۇسكەن ناۋقاستارعا ۇزاق مەرزىمدى وڭالتۋ شارالارى تالاپ ەتىلەرى انىق»، - دەدى قالالىق دەنساۋلىق ساقتاۋ باسقارماسى باسشىسىنىڭ ورىنباسارى ماناس رامازانوۆ.

ەستەرىڭىزگە سالا كەتەيىك، سان-فرانسيسكو قالاسىندا ساپارلاپ جۇرگەن قازاقستاندىق ازاماتشا ەلەنا رەميزوۆا 7- قازاندا گەمورراگيالىق ينسۋلت الىپ قۇلاعان بولاتىن. سودان بەرى ا ق ش دارىگەرلەرى ەلەناعا 4 رەت وتا جاساعان.

ناۋقاستىڭ دەنساۋلىعى جولاۋشىلىق رەيسپەن ۇشۋعا جاراماعاندىقتان، ق ر دەنساۋلىق ساقتاۋ جانە الەۋمەتتىك دامۋ مينيسترلىگىنىڭ ارالاسۋىمەن سانيتارلىق اۆياتسيا ۇىمداستىرىلعان ەدى. 48 ساعاتقا سوزىلعان ساپاردا ۇشاق ناۋقاستىڭ دەنساۋلىعى ناشارلاۋىنا بايلانىستى جولدا ليتۆا، يسلانديا، انگليادا توقتاۋعا ءماجبۇر بولعان. يسلانديادا وعان گوسپيتالدە شۇعىل كومەك كورسەتىلدى.

اۆتور: گۇلميرا عوسمانالي