بابالار ءسوزى: شاقشاق جانىبەكتىڭ تاۋاسار باتىرعا ات قويعانى
جوبانىڭ نەگىزىنە «مادەني مۇرا» باعدارلاماسى اياسىندا شىققان 100 تومدىق اۋىز ادەبيەتىنىڭ جىر- تولعاۋلارى، قيسسا- داستاندار، ءسوز ۇستاعان شەشەندەر مەن بيلەرىمىزدەن قالعان ناقىلدار، تاريحي جادىگەرلىكتەر الىندى. جوبا ماتەريالدارى قازاق تىلىندە (قازاقشا جانە توتە جازۋمەن) اگەنتتىك سايتىندا جاريالانىپ وتىرادى.
***
تاۋاساردىڭ اكەسى ەسەنامان بالاسىنا ات قويعىزاردا ارعىننىڭ شاقشاق رۋىنان شىققان قارت جانىبەكتى جورىقتان كەلە جاتقان جولىنان توسىپ، سالەم بەرىپ، قۋانىشتى كوڭىل كۇيىن ايتادى.
مىنە، سول داڭقتى شاقشاق جانىبەك قارەكە- بايبۋرا رۋىنداعى ەسەنامان بايدىڭ تىلەگىنە بار ىقىلاسىن بەرىپ، ونىڭ ۇيىنە تۇسەدى. قۋانىشتى اتا- انا اعىنان اقتارىلىپ، ادال نيەتىمەن، اقسارباس قويىن سويىپ قارسى الادى. اق كۇندىكتى انا مەن ايىر بورىكتى اتا اياۋلى كورەتىن ارۋاقتى باتىرلارى شاقشاق
جانىبەكتەن: «بالامىزعا ات قويىپ بەرىپ، ارۋاعىڭىزبەن قورعاي ءجۇرىڭىز» ، - دەپ تىلەك ەتەدى.
اتا- انانىڭ قۋانىشىنان جۇرەگى تەبىرەنگەن باتىر بەسىكتى الىپ، بەسىك كورپەنى اشىپ، بالپاناقتاي بالانى كورىپ، تەبىرەنە باتا بەرىپ، بىلاي دەيدى:
جاعالاسار جاۋىڭ كوپ،
جاۋعا شاپساڭ، ەسەر بول!
ەل ىشىندە داۋىڭ كوپ،
جۇرت الدىندا كوسەم بول!
جابىلعان جاۋدى جاپىرىپ،
شايقاسقاندا ەسەن بول!
جەكەگە شىقساڭ جەلدەنىپ،
جاۋىڭنىڭ باسىن كەسەر بول!
سونان سوڭ بەتىن سيپادى دا، اتا مەن اناعا قاراپ: «بەسىگىن كوتەرگەندە، كوڭىلىم تولدى، بالاڭىزدىڭ اتى تاۋاسار بولسىن! ءبىراق بىرەۋلەرگە اتىن اتاتىپ بوقتاتپا، ات جالىن تارتىپ مىنگەندە، العان بەتىنەن توقتاتپا!» - دەيدى.
شاقشاق جانىبەكتى ءپىر تۇتىپ، سيىنعان اتا- انا: «ءاۋمين!» - دەپ بەتىن سيپايدى.
