قازاقستاندا جەكەمەنشىك تۇرمە بولمايدى
«بىزدە جەكەمەنشىك تۇرمە بولمايدى. ءبىز مەملەكەتتىك- جەكە سەرىكتەستىك اياسىندا تۇرمە سالۋدى جوسپارلاۋدامىز. ياعني، جەكە ينۆەستورلار قۇرىلىسقا ينۆەستيتسيا سالادى. ال ىشىندە ءبىز، مەملەكەتتىك قۇرىلىمدار جۇمىس ىستەيدى. ويتكەنى، جازانىڭ ورىندالۋى - بۇل مەملەكەتتىك جاۋاپكەرشىلىك»، - دەدى ج. كەشۋبايەۆ.
ونىڭ اتاپ وتۋىنشە، قازىرگى تاڭدا قاراعاندىدا مەملەكەتتىك- جەكە سەرىكتەستىك اياسىندا تۇرمە سالۋ كوزدەلگەن. اتالعان نىساننىڭ تەحنيكالىق- ەكونوميكالىق نەگىزدەمەسى دايىن بولىپ قالدى. ەندى مەملەكەتتىك ساراپتاماسىن ءوتۋ قاجەت.
«ءبىز شامامەن 2015-2016 - جىلدارى كونكۋرستىق قۇجاتتاماسىن ازىرلەۋدى جوسپارلاپ وتىرمىز. ودان كەيىن ۇكىمەت كونتسەسسيونەرلەرگە كونكۋرس وتكىزەدى. بۇل حالىقارالىق كونكۋرس بولماق. وعان شەتەلدىك ينۆەستورلار دا قاتىسا الادى»، - دەدى ول.
ونىڭ اتاپ وتۋىنشە، ەرتەرەكتە قىلمىستىق اتقارۋ جۇيەسى كاسىپورىندارى 100 پايىز مەملەكەتتىك تاپسىرىستى ورىنداپ كەلگەن. بۇعان قوسا، ول كەزەڭدە سوتتالعانداردىڭ 90 پايىزدان استامى جۇمىسپەن قامتىلعان. ال قازىرگى ۋاقىتتا ورتالىقتاندىرىلعان تاپسىرىستىڭ بولماۋى سالدارىنان قىلمىستىق اتقارۋ جۇيەسىنىڭ كاسىپورىندارى ءبىر رەتتىك تاپسىرىستى عانا ورىنداۋعا ءماجبۇر.
«سوڭعى جىلدارى ىشكى ىستەر مينيسترلىگى تاراپىنان قىلمىستىق اتقارۋ جۇيەسى كاسىپورىندارىنىڭ ءوندىرىسىن جولعا قويۋعا باعىتتالعان ءبىرقاتار شارانىڭ قولعا الىنعانىن اتاپ وتكىم كەلەدى. ماسەلەن، جاڭا ءوندىرىس ورىندارى اشىلىپ، جاڭا تاۋار تۇرلەرى وندىرىلۋدە»، - دەدى ول.
ج. كەشۋبايەۆتىڭ ايتۋىنشا، بۇگىنگى تاڭداعى سوتتالۋشىلاردى ەڭبەككە بەيىمدەۋدىڭ ماڭىزدى كەزەڭدەرىنىڭ ءبىرى ولاردى كاسىپكە باۋلۋ بولىپ وتىر.
«بىزدە 46 تۇزەۋ مەكەمەسىندە كاسىپتىك كوللەدجدەر بار. بۇل وقۋ ورىندارىندا ەڭبەك نارىعىنا قاجەتتى ءتۇرلى ماماندىقتار سوتتالۋشىلارعا ۇيرەتىلۋدە. جىل سايىن شامامەن 3 مىڭ سوتتالۋشى وسى كاسىپتىك كوللەدجدەردە مەملەكەتتىك ۇلگىمەن بەكىتىلگەن ديپلومىن الادى» ، - دەدى ول.
ۆتور: مارلان جيەمباي
