ءابدىجامىل نۇرپەيىسوۆتى نوبەل سىيلىعىنا ۇسىنۋعا باستاما كوتەرىلدى
ءابدىجامىل نۇرپەيىسوۆ - قازاق ادەبيەتىنىڭ دامۋىنا ولشەۋسىز ۇلەس قوسقان بەلگىلى كەڭەس جازۋشىسى، «قان مەن تەر» تريلوگياسىنىڭ اۆتورى.
«قازاق ادەبيەتىنىڭ كلاسسيگى ءابدىجامىل نۇرپەيىسوۆتى ادەبيەت بويىنشا نوبەل سىيلىعىنا ۇسىنۋ يدەياسى ماعان قاراشا ايىنىڭ سوڭىندا كەلدى. بۇل مەنىڭ اتامنىڭ ۇيىندە جازۋشىمەن كەزدەسكەننەن كەيىن بولدى. ول اتامنىڭ دوسى بولعانىمەن، مەن ءوز ومىرىمدە نۇرپەيىسوۆپەن تۇڭعىش رەت تىرىدەي كەزدەستىم. ونىمەن سويلەسكەننەن كەيىن قازاق حالقى ءوزىنىڭ قۇرمەتتى اقساقالدارىنىڭ ەڭبەگىن قۇرمەتتەۋى كەرەك ەكەنىن ءتۇسىندىم. مەنىڭ ويىمشا، ءابدىجامىل كارىم ۇلى - قازىر كوزى ءتىرى قازاقتاردىڭ ىشىندەگى بۇل ناگراداعا لايىق جالعىز ادام»، - دەيدى تەمىرعالي.
قوعام قايراتكەرى Facebook الەۋمەتتىك جەلىسىندە وسى باستاماعا ارنالعان پاراقشا اشتى. بەس كۇن ىشىندە توپقا 800 دەن استام ادام قوسىلدى. «مەن ءابدىجامىل كارىم ۇلى شىعارماشىلىعىن باعالاۋشىمىن، اسىرەسە، ونىڭ ارال تەڭىزى مەن ونىڭ حالقىنىڭ ماسەلەسىنە ارنالعان شىعارمالارىن قاستەرلەيمىن. بۇل ورايدا مەن ونى ادامزاتتىڭ ار-وجدانىن ويلايتىن الەم ادامى دەپ ەسەپتەيمىن»، - دەدى ول.
ايتا كەتۋ كەرەك، نوبەل سىيلىعى نومينانتتارىن ىرىكتەۋ ءراسىمى بىرنەشە كەزەڭنەن تۇرادى. ادەبيەت سالاسى بويىنشا نوميناتسياعا ءوتىنىش بەرۋگە شۆەد ادەبيەت، تاريح جانە كونە مۇرالار كورولدىك اكادەمياسىنىڭ مۇشەلەرى، ادەبيەت پەن لينگۆيستيكا پروفەسسورلارى، ادەبيەت قوعامداستىقتارى باسشىلارى قۇقىلى. سونىمەن بىرگە، الەم ەلدەرىنىڭ ادەبي سايتتارىندا ەڭبەكتەرى جاريالانعان اۆتورلار دا ءوتىنىش بەرە الادى.
«قازىرگى ۋاقىتتا بىزگە قوزعالىستىڭ رەسمي پاراعىنا قوسىلاتىن بەلسەندى ازاماتتار كەرەك-اق. اسىرەسە، ادەبيەت پروفەسسورلارى مەن وقىتۋشىلارى»، - دەيدى تەمىرعالي.
ءابدىجامىل نۇرپەيىسوۆ 1924-جىلى 22- قازاندا قىزىلوردا وبلىسىنىڭ ارال اۋدانىندا تۋعان. 1942-جىلى 18 جاسىندا مايدانعا اتتاندى. قالماق دالاسى، ۋكراينا، بالتىق جاعالاۋى مايداندارىندا بولدى. سوعىستان كەيىن ءابدىجامىل نۇرپەيىسوۆ ءوزىنىڭ تۇڭعىش اۆتوبيوگرافيالىق رومانى - «كۋرليانديانى» جاريالادى. 1961-1970-جىلدارى ونىڭ «قان مەن تەر» رومان-تريلوگياسى جارىق كورىپ، الەمنىڭ 30 دان استام تىلىنە اۋدارىلدى، بۇل شىعارما ءۇشىن ول ك س ر و مەملەكەتتىك سىيلىعىنا يە بولدى. 2000-جىلى جازۋشىنىڭ «سوڭعى پارىز» رومان- ديلوگياسى جارىققا شىقتى، ارالدىڭ ەكولوگيا ماسەلەسىنە ارنالعان شىعارماعا 2003-جىلى شولوحوۆ سىيلىعى بەرىلدى.
