قاشاعانداعى مۇناي ءوندىرۋدى توقتاتۋدىڭ باستى سەبەپتەرى انىقتالدى

اتىراۋ. قازاقپارات - اتىراۋدا قاشاعان كەن ورنىنا ەكى جاڭا قۇبىر وتكىزگىش توسەلەتىنى جايلى قوعامدىق تىڭداۋ ءوتىپ، وندا بۇرىنعى قۇبىردىڭ ىستەن شىعۋ سەبەپتەرى ءتۇسىندىرىلدى.

«وتكەن جىلى كۇزدە كەن ورنىندا كۇكىرتتى مۇناي جانە كۇكىرتتى گاز تاسىمالدايتىن ەكى قۇبىر ىستەن شىققان بولاتىن، ونىڭ سەبەپتەرىن انىقتاۋعا شامامەن ءبىر جىلداي ۋاقىت كەتتى. وعان قازاقستاندىق، شەتەلدىك ماماندار قاتىسىپ، تۇتاستاي زەرتحانا قىزمەتى تارتىلدى. نەگىزگى سەبەبى - قىسىم سالدارىنان قۇبىرلار سۋلفيدتى جارىلعان دەپ بەلگىلەندى. ناقتىراق ايتقاندا، قۇبىرلار بولات بارىنشا قاتتى بولعان ورىنداردا جوعارى قىسىم مەن كۇكىرتتى سۋتەك اسەرىنەن جارىلعان. دانەكەرلەۋ ورىندارىندا دا جارىلعان جەرلەر بار. ەندى جاڭا قۇبىرلار لاكتالعان جامىلعىمەن كومىرتەكتى بولاتتان جاسالاتىن بولدى. بۇل - اسا بەرىك ماتەريال» ، - دەپ حابارلادى NCOC كومپانياسىنىڭ باسقارۋشى ديرەكتورى ستەفان دە مايە.

ەسكە سالساق، قاشاعان كەن ورنىندا مۇناي ءوندىرۋ وتكەن جىلعى كۇزدە توقتاتىلعان، سەبەبى ەكى قۇبىردىڭ بىرنەشە جەرىنەن مۇناي توگىلگەندىگى انىقتالعان بولاتىن. اقاۋلى قۇبىرلار تولىقتاي اۋىستىرىلاتىن بولدى. ولاردىڭ ءارقايسىنىڭ ۇزىندىعى - 96 مەتر، ونىڭ 70 شاقىرىمى تەڭىز تۇبىنەن وتەدى.