قۇپيا تۇرمەلەردەگى ازاپتاۋ ءادىسى قاتاڭ سىنعا الىندى

استانا. قازاقپارات - سوڭعى كەزدە تىڭشىلىققا قاتىستى داۋعا ءجيى ۇرىنىپ جۇرگەن ا ق ش-تىڭ بەدەلى تاعى سىنعا ىلىكتى.

جۋىردا عانا سەناتتىڭ بارلاۋ جونىندەگى كوميتەتى ورتالىق بارلاۋ باسقارماسىنىڭ بايانداماسىن جاريا ەتتى.

وندا تۇسىنىكتەمە الۋ كەزىندەگى تۇتقىنداردى ازاپتاۋ تاسىلدەرى قامتىلعان.

قۇجاتتىڭ قىسقارتىلىپ جارىق كورگەن نۇسقاسى 528 بەتتەن تۇرادى. ءبىراق ونىڭ ءتۇپنۇسقاسى 6700 بەت بولىپتى. دەگەنمەن، ونى وقىپ شىققان سەناتورلار لانكەستىكتى تىيا الماي وتىرعان كۇشتىك قۇرىلىمداردى قاتاڭ سىنعا الدى.

ال وزگەلەرى ادام توزگىسىز قورلىققا قۇپيا اباقتىلارداعى تۇتقىنداردىڭ قالاي ءتوزىپ كەلە جاتقاندارىنا تاڭقالىپ وتىر. لاڭكەستىك ارەكەتتەرگە قاتىستى تەمىر تورعا تۇسكەندەردىڭ قانداي جان ازابىن تارتىپ كەلە جاتقاندىعى بۇكىل الەمگە جاريا ەتىلدى.

ولاردىڭ اراسىندا تۇتقىندى ءتۇن ۇيقىسىنان ايىرۋ، وعان تاماقتى اۋىز ەمەس، تىك ىشەك ارقىلى شپريتسپەن كۇشتەپ جىبەرۋ، سۋعا باتىرۋ دا بار.

دايان فاينستاين، ا ق ش سەناتورى:

- قۇجاتقا سايكەس ورتالىق بارلاۋ اگەنتتىگى تۇتقىنداردان تۇسىنىكتەمە الۋدىڭ كۇشەيتىلگەن شارالارىن قولدانعان. ءبىراق تەرگەۋ ىستەرىن تاجىريبەسىز جاس وفيتسەرلەر جۇرگىزىپ، ونىڭ بارىسىن تىم سوزىپ جىبەرگەن. ولاردىڭ تۇسىنىكتەمە بەرگەن تۇتقىنداردان گورى وزدەرى كوپ بىلەتىندىگىنە تىم سەنىمدى بولعانى كورىنىپ تۇر.

ال مۇرىندارىنا اتالعان سالانىڭ ءيىسى دە بارمايتىن پسيحولوگتار تۋرالى اڭگىمە ءبىر بولەك. اگەنتتىكپەن اۋتسورسينگ ارقىلى جۇمىس ىستەگەن جالدامالى ماماندارعا تولەنگەن قاراجات 300 ميلليون ا ق ش دوللارىن قۇرادى. ءبىراق بۇدان الەمدەگى لاڭكەستىك قاۋپى سەيىلمەك تۇگىلى ءورشىپ بارادى. بۇل اتىشۋلى قۇجاتقا قاتىستى اق ءۇي يەسى دە ونى تالقىلاۋدان تىس قالمادى. باراك وباما، ا ق ش پرەزيدەنتى:

- تۇتقىنداردان بارىنشا تولىق تۇسىنىكتەمە الۋ ءۇشىن ولاردى قيناپ، ازاپتاۋعا تۋرا كەلگەنى راس. 2001 - جىلدىڭ 11 - قىركۇيەگىندەگى لاڭكەستىك ارەكەتتەردىڭ ءمان-جايىن تەرگەۋ ءۇشىن بۇدان وزگە امال قالماعان. ءبىراق بۇل ايلا-ءتاسىلدىڭ قانشالىقتى ءتيىمسىز بولعانىن ۋاقىت كورسەتتى.

سول سەبەپتى تۇتقىنداردى ازاپتاۋعا تىيىم سالاتىن بۇيرىق شىعارعان ەدىم. الداعى ۋاقىتتا ءبىزدىڭ كۇشتىك قۇرىلىمدار مۇنداي كاتەلىكتەر جاسامايتىن بولادى. بەلگىلى بولعانداي، ا ق ش-قا قاراستى قۇپيا تۇرمەلەر كۋبادان وزگە اۋعانستان، رۋمىنيا، پولشا جانە ليتۆا جەرلەرىندە ورنالاسقان. ءبىراق بۇل اقپاراتتى اتالعان ەلدەر بيلىگى بۇركەمەلەپ، شەتەلدىك تۇزەتۋ مەكەمەلەردىڭ بارىن جاسىرىپ كەلەدى. اق ءۇي يەسى ونداعى تۇتقىندار قۇقىعى بۇزىلمايدى دەسە دە، ولاردىڭ قاشان بوساتىلىپ، اتىشۋلى اباقتىلاردىڭ قاشان جابىلارى بەلگىسىز.

24.kz