ءدىني ادەبيەتتەر تەك ارنايى دۇكەندەر مەن عيبادات ۇيلەرىندە عانا ساتىلادى
بۇگىن ءماجىلىستىڭ حالىقارالىق ىستەر، قورعانىس جانە قاۋىپسىزدىك كوميتەتى مەن الەۋمەتتىك- مادەني دامۋ كوميتەتىنىڭ كوشپەلى وتىرىسىندا مادەنيەت جانە سپورت ۆيتسە-ءمينيسترى مارات ءازىلحانوۆ وسىلاي مالىمدەدى.
ەسكە سالايىق، وتىرىستا ءدىني تولەرانتتىلىق پەن كونفەسسياارالىق كەلىسىمدى نىعايتۋ ماسەلەلەرى تالقىلانعان بولاتىن.
ۆيتسە-ءمينيستردىڭ ايتۋىنشا، قىلمىستىق- اتقارۋ جۇيەسى كوميتەتىنە قاراستى تۇزەتۋ مەكەمەلەرىن قوسا العاندا، ەلىمىزدىڭ بارلىق كىتاپحانا قورلارىنا ءدىنتانۋ ساراپتاماسى جۇرگىزىلگەن.
سونىڭ ناتيجەسىندە تەرىس مازمۇنداعى ءدىني ادەبيەتتەر كىتاپحانالاردان الىنىپ، كىتاپحانا قورلارى بىرتىندەپ اقپاراتتىق-اعارتۋشىلىق باعىتتاعى ماتەريالدارمەن تولىقتىرىلا باستاعان.
«قولدانىستاعى زاڭعا سايكەس، ەندى قازاقستاندا بارلىق ءدىني كىتاپتار تەك ارنايى ستاتسيونارلىق دۇكەندەردە ساتىلادى. ياعني، بۇدان بىلاي بارلىق ءدىني ادەبيەتتەر مەن ءدىني مازمۇنداعى وزگە دە اقپاراتتىق ماتەريالدار تەك ءدىني عيبادات ۇيلەرى جانە جەرگىلىكتى اتقارۋشى ورگاندار بەكىتكەن ارنايى ستاتسيونارلىق دۇكەندەر ارقىلى عانا تاراتىلاتىن بولادى»، - دەدى مارات ءازىلحانوۆ.
اۆتور: قانات مامەتقازى ۇلى
