تاۋەلسىزدىك كۇنىنە وراي استانادا «جۋسان» بالەتىنىڭ پرەمەراسى وتەدى

استانا. قازاقپارات - «استانا بالەت» تەاترىنىڭ جاڭا ماۋسىمى ۇلكەن ءۇمىت پەن تارتىمدى پرەمەرالاردىڭ ماۋسىمى بولماق. تەاتر ءوزىنىڭ ەكىنشى ماۋسىمىن تاۋەلسىزدىك كۇنىنە ورايلاستىرىلعان ۇلتتىق جوبا - ءبىر اكتىلى «جۋسان» بالەتىمەن اشادى، دەپ حابارلادى astana.kz.

كورەرمەندەر قويىلىمدى 10 جانە 11- جەلتوقساندا «استانا وپەرا» ساحناسىندا تاماشالاي الادى. وعان ۇجىمنىڭ بارلىق ترۋپپاسى قاتىسادى.

«وسى ماۋسىمداعى تەاتردىڭ العاشقى پرەمەراسى قازاقستاننىڭ بالەت ونەرى تاريحىنداعى ءىرى وقيعا بولماق. تەاتردىڭ رەپەرتۋارىندا تۇڭعىش رەت ۇلتتىق تاريحىمىزعا ارنالعان ءبىر اكتىلى بالەت قويىلدى. وسىعان دەيىن قازاق ساحناسىندا تۇرىك تاريحىنا ارنالعان («الەم» بالەتى) قويىلعان بولاتىن، ال حالىقتىڭ تاريحى، دالا تاريحى بالەت ساحناسىندا تۇڭعىش رەت سومدالماق»، دەلىنگەن حابارلامادا.

باقىت قايىربەكوۆتىڭ جىر جولدارى سپەكتاكل ليبرەتتوسىنىڭ نەگىزىن قۇرادى. «جۋسان» - اۆتورلىق بالەت. بۇل - جاس حورەوگراف مۋكارام ءاۆاحريدىڭ جاساعان تۇڭعىش ۇلكەن ەڭبەگى. بالەتتى قويۋ جۇمىسىنا قازاقستان رەسپۋبليكاسىنىڭ ەڭبەك سىڭىرگەن قايراتكەرى، پروفەسسور اليلا الىشيەۆا، قازاقستاننىڭ ەڭبەك سىڭرگەن ءارتىسى ايگۇل تاتي، ۋدمۋرت رەسپۋبليكاسىنىڭ ەڭبەك سىڭىرگەن قايراتكەرى نيكولاي ماركەلوۆ، پەداگوگ- رەپەتيتور زاۋرە ۇمبەتقۇلوۆا ات سالىستى.