بىلىكتى ماماندار دايارلاۋ بويىنشا ءبىلىم جۇيەسىنە وزگەرىستەر ەنگىزۋ قاجەت - م. بۇلىتاي
بۇگىن الماتىدا ينۆەستورلارعا ارنالعان جاڭا ىنتالاندىرۋ توپتاماسىنىڭ تۇساۋكەسەرى بارىسىندا «Mynaral Tas Company» ج ش س باس ديرەكتورى مۇرتازا بۇلىتاي وسىنداي پىكىر ءبىلدىردى.
مەن مۇنى وسى ءبىلىم سالاسىنا قاتىسىم بار ادام رەتىندە، ستۋدەنتتەرگە كوپ جىلدار ءدارىس بەرگەن ۇستاز رەتىندە ايتىپ وتىرمىن. ءبىلىم سالاسى ستراتەگيالىق ماڭىزى بار باعىت. ول مەملەكەتتىڭ دامۋىنا، كەلەشەگىنە كەپىل بولا الاتىن سالا.
قازىر ەلىمىزدە جوعارى وقۋ ورىندارىن ءبىتىرىپ جاتقان جاستاردىڭ بىلىكتىلىگى وتە جوعارى دەپ اۋىز تولتىرىپ ايتا المايمىز. ءبىز مىسالى ءوزىمىز جۇمىسقا العان ازاماتتاردى قارجى ءبولىپ شەت ەلدەردە وقىتىپ جاتىرمىز.
ءبىر وكىنىشتىسى، 1-2 جىل بىزدە بىلىكتىلىگىن شىڭداپ العان جاس ماماندار جاڭادان سالىنىپ جاتقان باسقا ءوندىرىس ورىندارىنا كەتىپ قالىپ جاتادى. دەگەنمەن، ەڭبەك نارىعىنداعى مۇنداي تۇراقسىزدىقتاردىڭ بىرتە-بىرتە جويىلاتىندىعىنا سەنىمىم مول.
ويتكەنى ەلباسى نۇرسۇلتان نازاربايەۆتىڭ بيىلعى «نۇرلى جول - بولاشاققا باستار جول» جولداۋىندا وسى ءبىلىم بەرۋ مەن جول قاتىناستارىنىڭ ينفراقۇرىلىمدارىن دامىتۋعا ەرەكشە كوڭىل ءبولىندى. ال بۇگىنگى جاريالانىپ جاتقان ىنتالاندىرۋ شارالارى عاجاپ. ولار قازاقستاندى ينۆەستيتسيا سالۋدا وتە تارتىمدى مەملەكەتكە اينالدىرا تۇسەدى» - دەدى م. بۇلىتاي.
ايتا كەتەلىك، ق ر ينۆەستيسيالار جانە دامۋ مينيسترلىگىنىڭ ينۆەستيسيالار بويىنشا كوميتەتى مەن ەكسپورت جانە ينۆەستيتسيا بويىنشا «KAZNEX INVEST» ۇلتتىق اگەنتتىگى ۇيىمداستىرعان بۇگىنگى شاراعا قازاقستانىڭ ەۋروپالىق بيزنەس قاۋىمداستىعىنىڭ (ەۆروباك) اتقارۋشى ديرەكتورى يۋليا كۋسيدي، شەت ەلدىك ينۆەستورلار مەن وتاندىق ىسكەرلىك قاۋىمداستىقتاردىڭ وكىلدەرى قاتىستى.
اۆتور: جاپپاربەرگەن ايبوتا
