قازاق مەملەكەتى قۇرىلعان كەزدە بىردەن ورتالىقتانعان مەملەكەت بولعان - بۇركىتباي اياعان

استانا. قازاقپارات - قازاق مەملەكەتى قۇرىلعان كەزدە بىردەن ورتالىقتانعان مەملەكەت بولعان. بۇل تۋرالى بەلگىلى عالىم، پروفەسسور بۇركىتباي اياعان ۇلتتىق ارناعا بەرگەن سۇحباتىندا ايتتى.

 كەلەسى جىلى قازاق ەلى بىرنەشە مەرەيتوي تويلاعالى جاتىر. سولاردىڭ ىشىندەگى ەڭ ماڭىزدىسى -  قازاق حاندىعىنىڭ 550  جىلدىعى.

 وسى مەرەيتويعا توقتالا كەتكەن پروفەسسور، مەملەكەت تاريحى ينستيتۋتىنىڭ ديرەكتورى -  بۇركىتباي اياعان بىلاي دەيدى:

«قازاق حاندىعىنىڭ 550 جىلدىعىن ءبىز جالپى حالىقتىڭ شارا دەپ قاراۋىمىز كەرەك. جوعارى بيلىكتەن باستاپ، اۋىل، مەكتەپ، جاستار وداعى، ءاربىر سىنىپتاعى بالالارعا دەيىن جەتكىزۋىمىز كەرەك. بۇل -  ءبىزدىڭ تاريحىمىز، بۇل -  ءبىزدىڭ مەملەكەتىمىز، بۇل -  ءبىزدىڭ حاندىعىمىز. ەكىنشى ماسەلە، قازاق ەلىندە تۇرىپ جاتقان وزگە ۇلىستارعا دا ءبىزدىڭ تاريحىمىزدى تانىستىرۋ ارقىلى ولاردىڭ قازاقستاندىق ازامات ەكەنىن سەزىندىرەتىن كەز كەلدى دەگەن ويدامىن».

مەرەيتوعا بايلانىستى 20 ءبولىمدى دەرەكتى فيلم تۇسىرىلمەكشى. بۇعان پروفەسسور: «بۇل دەرەكتى فيلمدى جاساۋدا تەك تاريحشىلار عانا ەمەس، سونىمەن قاتار، ادەبيەتشىلەر، ەتنوگرافتار، انتروپولوگتار، قازاقستاننىڭ ساياسي، قوعام قايراتكەرلەرى قاتىسۋى كەرەك. سونداي- اق، تەك فيلم تۇسىرۋمەن عانا شەكتەلىپ قالماي، مول جوبا جاساۋ قاجەت. جانە باتىل قادام كەرەك. فيلممەن ماسەلەنى شەشەمىز دەگەن ويدان اۋلاق بولعان ءجون»، - دەيدى.

«قازاق مەملەكەتى قۇرىلعان كەزدە بىردەن ورتالىقتانعان مەملەكەت بولعان. مىسالى، نوعايدىڭ تراگەدياسى سول، ولار ءبىر ورتالىققا باعىنباي كەتتى. ورىس مەملەكەتىنىڭ ءوزى 1613 - جىلى عانا رومانوۆتاردىڭ تاققا كەلۋىمەن ورتالىقتانعان مەملەكەت بولادى. ال، قازاق حاندىعى قۇرىلعان كەزدە ءبىر ورتالىققا باعىنعان مەملەكەت بولدى»، - دەيدى عالىم.

   baq.kz