قازاقستان الەمدىك ستاندارتتار بويىنشا بىلىمگە باعىت الدى - ن. نازاربايەۆ
مەملەكەت باسشىسى بۇل شاراعا فرانسۋز كوشباسشىسىنىڭ قاتىسۋى ءبىلىم بەرۋ سالاسىنداعى وسى بىرلەسكەن جوبانىڭ ەكى ەل ءۇشىن دە ماڭىزى جوعارى ەكەنىن بىلدىرەتىنىن ايتتى.
نۇرسۇلتان نازاربايەۆ قازاقستان الەمدىك ءبىلىم بەرۋ كەڭىستىگىنە كىرىكپەيىنشە، يننوۆاتسيالار مەن بىلىمگە نەگىزدەلگەن جاڭا ەكونوميكا قۇرا المايتىنىن دا اتاپ ءوتتى.
- ءبىزدىڭ ەلىمىزدە ءبىلىم دامۋدىڭ باسىمدىعى بار شارتى بولىپ سانالادى. قازاقستان ونى الەمدىك وزىق ستاندارتتارعا جاقىنداتۋدى كوزدەيدى. ءبىز جاستارىمىزدىڭ بولاشاققا باتىل قاراۋىنا مۇمكىن بەرەتىن بارلىق ءبىلىم مەن ماشىقتى ءوز ەلىندە يگەرە الاتىنداي بولۋىن ماقسات ەتىپ وتىرمىز. الەمگە اتى تانىمال ۋنيۆەرسيتەتتەردىڭ ەلىمىزگە كەلۋى ءبىزدىڭ تاڭداعان باعىتىمىزدىڭ دۇرىستىعىن كورسەتەدى، - دەدى قازاقستان پرەزيدەنتى.
ءوز كەزەگىندە فرانسۋا وللاند مادەنيەت جانە ءبىلىم بەرۋ سالاسىنداعى قازاق-فرانسۋز ىنتىماقتاستىعى بۇدان ءارى دە كەڭەيە بەرەتىندىگىنە توقتالدى. سونداي-اق جاڭا ج و و تۇلەكتەرى قازاقستاننىڭ يننوۆاتسيالىق دامۋىنا ەلەۋلى ۇلەس قوسا الاتىندىعىنا سەنىم ءبىلدىردى.
«سوربوننا - قازاقستان» ينستيتۋتى «پاريج قالاسىنىڭ سوربونناسى» (PRES Sorbonne Paris Cité) جوعارى ءبىلىم عىلىمي ورتالىعىنىڭ الەمدەگى ەكىنشى جانە ورتالىق ازياداعى بىردەن-ءبىر فيليالى بولىپ وتىر. ونداعى ءبىلىم بەرۋ ۇدەرىسى بولون كونۆەنتسياسىنا سايكەس جۇرگىزىلەدى. قازاقستان مەن فرانسيانىڭ پروفەسسورلارى ساباق بەرەدى.
بىرلەسكەن ينستيتۋتتىڭ اشىلۋى وتاندىق ءبىلىم بەرۋدى ەلدىڭ جوعارى بىلىكتى ماماندارعا دەگەن سۇرانىسىن قامتاماسىز ەتۋگە باعىتتاۋداعى ماڭىزدى قادامداردىڭ ءبىرى بولىپ سانالادى.
