ق ر پرەزيدەنتى: يننوۆاتورلاردى دايىنداۋ مەكتەپ قابىرعاسىنان باستالادى
ءىس-شارا الدىندا مەملەكەت باسشىسى ءال-فارابي اتىنداعى قازاق ۇلتتىق ۋنيۆەرسيتەتىنىڭ عىلىمي كىتاپحاناسى بازاسىندا ۇيىمداستىرىلعان يننوۆاتسيالىق جوبالار كورمەسىن ارالاپ كوردى. ونىڭ بارىسىندا وتاندىق ەكونوميكانىڭ ءتۇرلى سالالارىنداعى ءبىرقاتار يننوۆاتسيالىق ازىرلەنىمدەر تانىستىرىلدى.
كەڭەستى اشقان نۇرسۇلتان نازاربايەۆ «قازاقستان-2050» ستراتەگياسىنا سايكەس عىلىمدى قاجەتسىنەتىن ەكونوميكا قۇرۋدىڭ ماڭىزدىلىعىنا توقتالدى.
- بۇل مىندەت مەنىڭ سوڭعى جولداۋىمدا دا قويىلىپ وتىر. يننوۆاتسيالار ونىمدىلىك پەن ەڭبەك تيىمدىلىگىن كۇرت ۇلعايتۋعا الىپ كەلۋى ءتيىس. مەملەكەت يننوۆاتسيانىڭ ءوسۋىن قولدايدى. سوڭعى 5 -جىلدا بۇل سالانى قولداۋ كولەمى ءۇش ەسە ءوسىپ، 50 ميلليارد تەڭگەگە جەتتى. بالكىم، ابسوليۋتتىك ولشەم جونىنەن بۇل سونشالىق كوپ ەمەس بولار، ءبىراق ءوسىم قارقىنى ءبىراز نارسەنى اڭعارتادى.
عىلىمي زەرتتەۋ جانە تاجىريبەلىك- كونسترۋكتورلىق جۇمىستارعا (ع ز ت ك ج) ارنالعان جيىنتىق شىعىستار 49 ميللياردتان 74 ميلليارد تەڭگەگە دەيىن ءوستى، سونىڭ 30 ميللياردى جەكە سەكتور ەسەبىنەن قارجىلاندىرىلدى. پاتەنت الۋ بەلسەندىلىگى جاعىنان قازاقستان 141 ەلدىڭ ىشىندە 42-ورىندا. ەلىمىزدە يننوۆاتسيالىق كلاستەرلەر قالىپتاسۋدا، - دەدى قازاقستان پرەزيدەنتى.
مەملەكەت باسشىسى يننوۆاتورلاردى دايارلاۋ مەكتەپ قابىرعاسىنان باستالاتىنىن اتاپ ءوتتى.
- ءبىز ءبىلىمدى دامىتۋ جاعىن ويلاستىردىق. زياتكەرلىك مەكتەپتەر قۇرىلدى، وعان ەڭ تالانتتى بالالار قابىلدانۋدا. شەتەلدە جۇمىس ىستەيتىن وتاندىق عالىمدار ەلگە ورالا باستادى، مۇندا ولارعا ءتيىستى جاعداي جاسالۋدا. يننوۆاتسيانى دامىتۋدىڭ العىشارتتارى دەگەن وسى، - دەدى نۇرسۇلتان نازاربايەۆ.
قازاقستان پرەزيدەنتى يننوۆاتسيالار قازاقستاندىق ونىمدەردىڭ ساپاسى مەن باسەكەگە قابىلەتتىلىگىن ارتتىراتىنىنا نازار اۋداردى.
- كەدەندىك وداققا قاتىسۋشى ەل ءارى دۇنيەجۇزىلىك ساۋدا ۇيىمىنىڭ بولاشاق مۇشەسى رەتىندە ءبىز ءۇشىن بۇل ماڭىزدى مانگە يە. مەن جاستارىمىزعا تاعى دا ايتامىن - عىلىممەن اينالىسىڭىزدار. مەملەكەت ءوز تاراپىنان يننوۆاتسيالىق جۇمىستىڭ دامۋىن جان- جاقتى قولدايدى، - دەدى مەملەكەت باسشىسى.
كەڭەس بارىسىندا ينۆەستيتسيا جانە دامۋ ءمينيسترى ءا. يسەكەشيەۆ يننوۆاتسيالىق دامۋ سالاسىنداعى احۋال تۋرالى باياندادى. ونىڭ ايتۋىنشا، يننوۆاتسيالىق بەلسەندىلىك ۇلەسى 2009 -جىلمەن سالىستىرعاندا 2 ەسە ۇلعايعان جانە 2014 - جىلدىڭ قورىتىندىسى بويىنشا 10 پايىزدى قۇراۋى ءتيىس. بۇل كورسەتكىشتى 2020 -جىلعا قاراي 20 پايىزعا، ال ءى ج ءو يننوۆاتسيالىق ونىمدەردىڭ ۇلەسىن 2,5 پايىزعا دەيىن ارتتىرۋ جوسپارلانىپ وتىر. سوڭعى ۋاقىتقا دەيىن قارالعان 3500 دەن استام جوبانىڭ 577 سى ماقۇلدانىپ، قولداۋ تاپتى.
سونىمەن قاتار جيىن بارىسىندا الماتىنىڭ يننوۆاتسيالىق دامۋداعى ءرولى مەن ۇلەسى تۋرالى قالا اكىمى ا. ەسىموۆ باياندادى.
ءبىلىم جانە عىلىم ءمينيسترى ا. ءسارىنجىپوۆ ءوز بايانداماسىندا مەملەكەتتىك قولداۋدىڭ ماڭىزى ارتىپ كەلە جاتقانىن اتاي وتىرىپ، ع ز ت ك ج-عا ارنالعان شىعىستار كولەمىن 2050 - جىلعا قاراي ءى ج ءو-نىڭ 3 پايىزىنا دەيىن جەتكىزۋ جوسپارلانىپ وتىرعانىن ايتتى.
ال نازاربايەۆ ۋنيۆەرسيتەتىنىڭ پرەزيدەنتى ش. كاتسۋ وسى جوعارى وقۋ ورنىنىڭ يننوۆاتسيانى قولداۋداعى جاڭا جۇيە رەتىندەگى رولىنە توقتالدى.
