ايەلىڭدى ۇرما، الەككە تۇسەسىڭ

استانا. قازاقپارات - ايەلىنە قول كوتەرىپ كۇش كورسەتكەندەر ەندى قىلمىستىق جاۋاپكەرشىلىككە تارتىلادى. جاڭا جىلدان باستاپ زاڭعا وسىنداي وزگەرتۋ ەنگىزىلمەك. بۇل تۋرالى جەتىنشى ارنا حابارلايدى.

قازىر السىزگە الىمجەتتىك كورسەتەتىندەردىڭ قانشا ۋاقىتقا اباقتىعا جابىلاتىندىعى ناقتىلانىپ جاتىر. بۇل ماسەلەنىڭ كوتەرىلۋى بەكەر ەمەس. ويتكەنى ەلىمىزدە جۇبايىن ۇرىپ-سوعۋ دەرەكتەرى كوبەيمەسە، ازايماي وتىر.

تۇرمىستىق زومبىلىق قۇرباندارى مۇندايدا ارنايى داعدارىس ورتالىقتارىنا بارادى ەكەن. ولار مۇنداي ورتالىقتاردا 6 ايعا دەيىن تۇرا الادى. وسى ارالىقتا ءبىرقاتارى كۇيەۋىمەن قايتا تابىسىپ تا جاتادى. ءبىراق، ۇيىنە بارعان سوڭ ەر ادامدار بۇرىنعى ادەتىنە قايتا باسادى ەكەن.

«ءبىر جىلدىڭ ىشىندە ەكى مارتە قايتالاپ ءتۇسىپ جاتقان كىسىلەر بار بۇل جەرگە. ءوز ۇيلەرىندەگى جاعداي قايتادان قايتالانىپ وسى جەرگە كەلۋگە ءماجبۇر بولىپ جاتىر»، - دەيدى استانا قالالىق داعدارىس ورتالىعىنىڭ الەۋمەتتىك قىزمەتكەرى ءداميلا قالدىبەكوۆا.

جەكەلەگەن ۇيىمداردىڭ اقپاراتىنا سەنسەك، قازاقستاندا جىل سايىن 30 مىڭعا تارتا كەلىنشەك زورلىق-زومبىلىق قۇربانى بولادى. ماماندار پىكىرىنشە، قىلمىستىق جاۋاپكەرشىلىك وسى تەكتەس كەلەڭسىزدىكتەردى ازايتادى. قازىر قولدانىستاعى نەگىزگى جازا 5-6 مىڭ تەڭگە كولەمىندەگى ايىپپۇل عانا ەكەن.