قازاقستان مەن فرانسيا جاساندى جەر سەرىكتەرى مەن اتومدىق رەاكتورلارعا ارنالعان جانارماي شىعارادى

  استانا. قازاقپارات - قازاقستاندىق جانە فرانسۋز كومپانيالارى بولاشاقتا عارىشتىق جەرسەرىكتەر مەن اتومدىق رەاكتورلارعا ارنالعان جانارماي شىعاراتىن بولادى.

 بۇل تۋرالى بۇگىن استانادا ءوتىپ جاتقان قازاقستان- فرانسيا بيزنەس- فورۋمىندا ق ر ينۆەستيتسيالار جانە دامۋ ۆيتسە- ءمينيسترى ەرلان ساعاديەۆ ايتتى.

«بۇگىندە ءبىز فرانسۋزدىق ارىپتەستەرىمىزبەن بىرلەسىپ تىكۇشاقتار، ەلەكتروۆوزدار مەن راديوەلەكترونيكا قۇراستىرامىز، تيتان توسەنىشتەر، ازىق- تۇلىك، جوعارى ساپالى تسەمەنت شىعارامىز، ءتۇرلى تەحنولوگيالاردى بىرگە زەرتتەيمىز. جۋىق ارادا عارىشتىق جەرسەرىكتەر مەن اتومدىق رەاكتورلارعا ارنالعان جانارماي، كۇن باتارەيالارىن جانە باسقا دا كوپتەگەن ونىمدەر شىعاراتىن بولامىز» ، - دەدى ول.

ە. ساعاديەۆتىڭ ايتۋىنشا، فرانتسيا - قازاقستاننىڭ ءىرى ينۆەستورلارىنىڭ ءبىرى. 2005-2014 - جىلدار ارالىعىندا ينۆەستيتسيالار كولەمى شامامەن 10,8 ميلليارد ەۋرونى قۇرادى.

«بۇگىندە قازاقستاندا جۇزدەن استام فرانتسۋز كومپانيالارى جۇمىس ىستەۋدە. ولار نەگىزىنەن مۇناي- گاز، اتوم، تاماق ونەركاسىبىندە، قۇرىلىس، كولىك جانە قىزمەت كورسەتۋ سالالارىندا جەتىستىككە جەتۋدە» ، - دەدى ول.

ە. ساعاديەۆتىڭ مالىمەتىنشە، سوڭعى جىلدارى فرانتسيا قازاقستاننىڭ ساۋداداعى ارىپتەستەرىنىڭ الدىڭعى قاتارىنا شىعىپ، بەسىنشى ورىنعا تۇراقتادى. بيىلعى توعىز ايدىڭ قورىتىندىسى بويىنشا ەكى ەل اراسىنداعى تاۋار اينالىمى 5 ميلليارد دوللارعا جەتكەن.
 اۆتور: ءابۋ- اسقار مەكەش ۇلى