08:45, 05 - جەلتوقسان 2014 | GMT +5
قىتاي قازاقستاندا يادرولىق وتىن وندىرەتىن زاۋىت سالۋعا دايىن
بەيجىڭ. قازاقپارات - قىتاي قازاقستاندا يادرولىق وتىن وندىرەتىن زاۋىت سالۋعا ءازىر. بۇل تۋرالى ق ح ر استاناسىندا وتكەن ەنەرگەتيكا سالاسىنداعى ىنتىماقتاستىق ماسەلەسىنە ارنالعان 8- قازاقستان- قىتاي كەڭەسىندە قىتايدىڭ ۇلتتىق يادرولىق كورپوراتسياسىنىڭ ديرەكتورى (CNNC) ساۋ شۇدۋڭ حابارلادى.
ونىڭ ايتۋىنشا، يادرولىق تەحنولوگيالار ەكسپورتى - قىتايدىڭ مەملەكەتتىك ستارتەگياسى. «ءبىز ءوز ونىمدەرىمىزدى پاكىستان، ارگەنتينا سىندى ەلدەرگە ەكسپورتتاۋعا ىنتالىمىز»، - دەدى ول.
ساۋ شۇدۋڭنىڭ ايتۋىنشا، CNNC 2000 -جىلداردان بەرى ۋران رەسۋرسىن وندىرۋدە «قازاتومپروممەن» ىنتىماقتاستىقتى كەزەڭ-كەزەڭىمەن نىعايتىپ كەلەدى.
سونداي-اق ول قازاقستاننىڭ تابيعي ۋرانىن قىتايعا ەكسپورتتاۋ بويىنشا ناتيجەلى جۇمىستار اتقارىلعانىن ايتتى. تاراپتار 10 جىل ىشىندە اتالعان شيكىزات ءونىمىن تاسىمالداۋ تۋرالى كەلىسىمگە قول قويعان.
