فرانسيا پرەزيدەنتى العاشقى مەملەكەتتىك ساپارمەن قازاقستانعا كەلەدى
ەكىجاقتى كەزدەسۋلەر اياسىندا نۇرسۇلتان نازاربايەۆتىڭ 2012 - جىلى فرانسياعا بارعان ساپارىندا جاسالعان ۋاعدالاستىقتاردىڭ جۇزەگە اسىرىلۋ بارىسى قارالىپ، ءوزارا ىنتىماقتاستىقتى نىعايتۋ ماسەلەلەرى تالقىلانادى.
اتاپ ايتقاندا، فرانسيا قازاقستانىڭ جەتەكشى ساۋدا سەرىكتەستەرىنىڭ الدىڭعى بەستىگىنە كىردى، ياعني بۇل مەملەكەت بۇگىندە قازاقستاننىڭ ستراتەگيالىق ارىپتەستەرىنىڭ الدىڭعى قاتارىنا ەنىپ وتىر.
1992 - جىلعى 25 - قاڭتاردا ەكى ەل اراسىندا ديپلوماتيالىق قاتىناستار ورناتىلدى. 1992 - جىلى ناۋرىز ايىندا قازاقستان رەسپۋبليكاسىندا فرانسيا رەسپۋبليكاسىنىڭ ەلشىلىگى اشىلدى، ال 1993 - جىلعى شىلدەدە فرانسيادا قازاقستان رەسپۋبليكاسىنىڭ ەلشىلىگى اشىلدى.
بيىلعى جىلدىڭ باسىنداعى مالىمەتتەر بويىنشا، 2013 - جىلدىڭ قورىتىندىلارى بويىنشا ەكىجاقتى تاۋار اينالىمى 6 ميلليارد ا ق ش دوللارىنان (ەكسپورت - 5,26 ميلليارد، يمپورت - 924 ميلليون) استى.
ال قازاقستانعا سالىنعان ينۆەستيسيا جونىنەن فرانسيا 4-ورىندا تۇر. 2005 -جىلدان بەرى وسى ەلدىڭ ءبىزدىڭ مەملەكەتكە سالعان تىكەلەي ينۆەستيتسيالارى 10 ميلليارد دوللاردان استى.
2014 - جىلدىڭ ءبىرىنشى جارتى جىلدىعىنىڭ قورىتىندىسى بويىنشا ەكى ەلدىڭ ءوزارا تاۋار اينالىمى 3,5 ميلليارد دوللاردى قامتىدى. وتكەن جىلدىڭ سايكەس كەزەڭىنە قاراعاندا ءوسىم 10 پايىزدى قۇرادى.
بۇگىندە ەلىمىزدە 150 گە جۋىق فرانسۋز كومپانيالارى قىزمەت ەتەدى. بۇل جەردە ايتا كەتۋ كەرەك، بۇرىن مۇنداي ءىرى كومپانيالار تەك مۇناي-گاز سالاسىندا ارىپتەستىك قارىم-قاتىناستا بولسا، سوڭعى 5 جىلدا قازاقستاندى يندۋستريالاندىرۋ باعدارلاماسى بويىنشا فرانسيانىڭ يندۋستريالىق كومپانيالارى ەلىمىزدە تابىستى قىزمەت ەتە باستادى. مۇنىمەن قوسا، عارىش سالاسىندا دا تىعىز ىنتىماقتاستىق ورناتىلعان.
ايتا كەتەيىك، قازاقستان- فرانسيا ۇكىمەتارالىق كوميسسياسىنىڭ وتىرىسى جانە فرانتسيانىڭ پرەزيدەنتى فرانسۋا وللاندتىڭ قازاقستان رەسپۋبليكاسىنا كەلۋى قارساڭىندا ەكى ەلدىڭ اۆياتسيالىق بيلىكتەرى استانا- پاريج باعىتى بويىنشا كەلەسى جىلعى كوكتەمنىڭ وزىندە-اق رەيس اشۋعا مۇمكىندىك بەرەتىن ءوزارا تۇسىنىستىك تۋرالى جاڭا مەموراندۋمعا قول قويدى.
تاعايىندالعان تاسىمالداۋشىلارعا استانا-پاريج باعدارى بويىنشا جيىلىگى اپتاسىنا 3 رەت رەيستەر ورىنداۋ قۇقىعى بەرىلگەن. ق ر يۆەستيتسيالار جانە دامۋ مينيسترلىگىنىڭ مالىمەتىنشە، قازاقستاندىق اۆياكومپانيالار كەلەسى جىلعى ناۋرىز ايىندا-اق بۇل باعىت بويىنشا رەيس اشۋدى جوسپارلاپ وتىر.
بۇدان بولەك، فرانتسيا قازاقستانعا «ەكسپو-2017» كورمەسىنە دايىندالۋعا قول ۇشىن بەرمەك. وسى ورايدا فرانسۋز كومپانيالارى الدا كەلە جاتقان حالىقارالىق «ەكسپو-2017» كورمەسىنە دايىندىق اياسىندا قازاقستانعا قۇرىلىس، ارحيتەكتۋرا، ەنەرگيا تيىمدىلىگىن ارتتىرۋ، كوممۋنالدىق قىزمەت سياقتى سالالاردا وزدەرىنىڭ شەبەرلىكتەرىمەن ءبولىسىپ، قالتقىسىز قىزمەتىن ۇسىنۋعا ءازىر.
سونىمەن قاتار، بيىل قازاقستاننىڭ فرانسياداعى مادەنيەت ماۋسىمى ءوتتى. «قازاقستان كۇنى» اۋقىمدى باعدارلاماسىنىڭ اياسىندا مەيماندار قازاق حالقىنىڭ قوناقجايلىلىعىمەن تانىسا الدى. فرانسۋزدار ءۇشىن ارنايى ۇلتتىق ناقىشتاعى اشەكەيلەرمەن بەزەندىرىلگەن كيىز ءۇي ورناتىلدى. ال بۇلدىرشىندەر ءۇشىن قازاق مۋلتفيلمدەرىنىڭ كورسەتىلىمدەرى ۇيىمداستىرىلدى، سونداي-اق ولار قازاق مۋزىكاسىمەن تانىسىپ، ءتۇرلى سۋرەت ۇيىرمەلەرىنە قاتىستى. بۇل شارالار مادەني قارىم- قاتىناستاردى جانە ەكى ەل اراسىنداعى ىنتىماقتاستىق بايلانىستاردى بايىتۋعا مۇمكىندىك بەردى، سونىمەن بىرگە فرانسۋزداردىڭ قازاقستان جايلى، ونىڭ حالقى مەن دامۋ دەڭگەيى جانە داستۇرلەرى تۋرالى بىلىمدەرىن ارتتىرۋعا مۇمكىندىك بەردى.
رۋسلان عابباسوۆ
