نۇرتاس ادامبايەۆتىڭ «ءسابينا كەلىن» فيلمى كورۋگە تۇرارلىق تۋىندى ما؟

استانا. قازاقپارات - سوڭعى ەكى اپتانىڭ ەڭ باستى جاڭالىقتارىنىڭ ءبىرى «ءسابينا كەلىن» فيلمىنىڭ جارىققا شىعۋى دەپ ايتۋعا تولىق نەگىز بار.

بار-جوعى 300 مىڭ دوللارعا ءتۇسىرىلىپ، 5 كۇن ىشىندە 112 ميلليون (615 مىڭ دوللار) تەڭگە جيناعان «ءسابينا كەلىن» فيلمى تۋرالى پىكىر ءبىلدىرىپ جاتقاندار وتە كوپ جانە ولاردىڭ كوبى پوزيتيۆتى سيپاتتا.

ماسەلەن، كينو سىنشىسى ولەگ بورەتسكيدىڭ پىكىرىنشە، كينو سالاسىندا كومەديا وتە قيىن جانر بولىپ سانالادى. كينوكومەديادا ادەبي نەمەسە تەاترلىق كۇلكى ەمەس، ەرەكشە ءازىل قاجەت. مۇنداي كومەديالاردىڭ ءبارى بىردەي ءساتتى شىعا بەرمەيدى.

مىسالى، قازاق كينوسىنىڭ ارداگەرى ءدامىر مانابايدىڭ ەكى جىل بۇرىنعى «لوتەرەيا» كومەدياسى مۇلدەم كۇلكىلى ەمەس بولىپ شىقتى. سونداي-اق، قالالىق بانكير مەن اۋىلداعى ساۋىنشى تۋرالى «ءسۇت، قايماق، سۇزبە» اتتى كومەديا دا جوعارى ناتيجە كورسەتپەدى. ال مۇندا ءبارى وڭاي، ءارى جەڭىل: قالالىق قىز اۋىلدان ءبىر-اق شىعىپ، قايتا تاربيەلەنۋدەن وتەدى. فيلمدە كوپ نارسە بار: ءازىل دە، كەيىپكەر دە، پاتريوتتىق ءمورال دا. ەشقانداي پافوس جوق.

ولەگ بورەتسكي، كينو سىنشىسى:

«وتاندىق فيلمدەردىڭ ىشىندە كورۋگە تۇرارلىق فيلمدەر از. ساكەن جولداستىڭ «قىز بەن جىگىت» («ون ي ونا») تۋىندىسىنان كەيىن نۇرتاس ادامبايەۆتىڭ «ءسابينا كەلىن» فيلمى كورۋگە تۇرارلىق ەكىنشى جارقىن فيلم. ءبىر قىزىعى، بۇل تۋىندىلار «قازاق فيلم» ەمەس، جاس تاۋەلسىز رەجيسسەرلەر ءتۇسىرىپ جاتىر.»

فيلمنىڭ اۆتورى نۇرتاس ادامبايەۆ «ءسابينا كەلىندە» ءوزىن ءتورت امپلۋادا كورسەتتى: اكتەر، رەجيسسەر، پروديۋسەر جانە سەناريست. تاعى ءبىر كينو سىنشىسى كارىم قادىربايەۆ تۋىندىعا وسى ءتورت كريتەري بويىنشا باعا بەردى.

كارىمنىڭ ويىنشا، سەناري - فيلمنىڭ ەڭ ءالسىز تۇسى. سەناريست، ءازىلدى مولىنان جازىپ، سول ارقىلى سيۋجەتتى تولتىرۋعا تىرىسقانى كورىنىپ تۇر. دراماتۋرگيا شيكى، ونىڭ ۇستىنە نۇرتاس-سەناريست نۇرتاس-اكتەرگە تىم كوپ كوڭىل بولگەن، ەكىنشى پلانداعى رولدەر تولىق اشىلماعان.

العاشقى جوباسى بولعاندىقتان، سىنشى نۇرتاستىڭ رەجيسسۋراسىنا وڭ باعا بەردى. دەگەنمەن، رەجيسسۋرا تۇتاستاي ك ۆ ن ەرەجەسىمەن قۇرىلعانىن ەسكەرتەدى. ال اكتەرلىك شەبەرلىككە قاتىستى ءبىرجاقتى پىكىر ايتۋ قيىن، سەبەبى 3-5 مينۋتتىق سكەتچ ارقىلى اكتەر تولىعىمەن اشىلمايدى.

كارىم كادىربايەۆتىڭ ويىنشا، پروديۋسەر نۇرتاسقا جوعارى باعا قويۋعا بولادى. ءوز قارجىڭا فيلم ءتۇسىرۋ قازاقستان نارىعىندا قارجىلىق تۇرعىدا وزىڭە قول جۇمساۋمەن تەڭ. الايدا «ءسابينا كەلىن» بۇل تۇجىرىمدى جوققا شىعارا الدى. العاشقى كۇننەن باستاپ كاسسا جيناۋدا.

كارىم قادىربايەۆ، كينو سىنشىسى:

«رەجيسسەرلىك، سەناريلىك جانە اكتەرلىك كەمشىلىكتەرگە قاراماستان «ءسابينا كەلىن» كاسسالىق جينالىم بويىنشا قازاقستاندا رەكورد ورناتۋى ابدەن مۇمكىن. سونداي-اق، قازاقستاندىق ك ۆ ن ويىنشىلارىنىڭ ۇلكەن كينوعا كەلۋى جىلدامداي تۇسەدى. قازىردىڭ وزىندە «اۋىلدان قاشۋ» («پوبەگ يز اۋلا») سەريالىن تولىق مەتراجدى فيلمگە اۋىستىرۋ تۋرالى اڭگىمەلەر ايتىلۋدا. نەگىزگى سۇراق: ك ۆ ن ويىنشىلارى ناعىز كينو تۇسىرە الا ما، الدە ولار وزدەرىنىڭ سكەتچتەرىنىڭ ۇزارتىلعان فورماسىن جاساي ما؟»

كاسىبي كينوتانۋشى ەمەس، قاراپايىم، ءبىراق ءوز پىكىرى بار ادامداردىڭ ويىنشا، «ءسابينا كەلىن» -  وتە ءساتتى شىققان جوبا. ماسەلەن، بەلسەندى، ءارى بەدەلدى فەيسبۋك پايدالانۋشىسى ولجاس قۇدايبەرگەنوۆتىڭ ويىنشا، فيلمدە ءازىل ارقىلى باي مەن كەدەي اراسىنداعى الشاقتىق پەن ءارالۋاندىلىق كورسەتىلەدى. ول بايىپ كەتكەن ادامداردىڭ جاعدايى ناشار تۋىستارىمەن بايلانىس ۇزۋگە تىرىسۋى، ول اكە-شەشەسى باقۋاتتى كەيبىر قىزداردىڭ باي جىگىتتەردى ىزدەۋى ارقىلى كورىنىس تابادى. باستىسى، اۋىل مەن قالا اراسىنداعى الشاقتىق ايقىن جەتكىزىلگەن.

ولجاس قۇدايبەرگەنوۆ، ەكونوميست، بەلسەندى ينتەرنەت پايدالانۋشىسى:

«نۇرتاس اۋىلدىڭ شىنايى جاعدايىن كورسەتە الدى. الايدا ول ونى دەپرەسسياعا اينالدىرماي ءازىل ارقىلى كەرەمەت جەتكىزدى»

اۆتورلىق پىكىر

ەگەر ءدال وسى فيلم وتكەن عاسىردىڭ 90- جىلدارى شىقسا، ەشكىم بۇل تۋىندىنى تۇسىنبەس ەدى، كەرىسىنشە اۋىل ءومىرىن بۇلاي كورسەتۋ اشۋ-ىزا تۋدىرار ەدى. ءبىراق قازىر رەاكسيا باسقا، بۇل قۋانتپاي قويمايدى. سەبەبى بۇل قوعامنىڭ مادەني ساناسىنىڭ وسكەنىن كورسەتەدى. اۋىر تاقىرىپتى ءاردايىم جەڭىل، ءبىراق استارلى مازمۇنمەن جەتكىزۋگە بولاتىنىن ءبىزدىڭ قوعام تۇسىنە باستاعانداي.

بالكىم كاسىبي كينو تۇرعىسىنان كەمشىلىكتەر بار شىعار، مەيلى ول دراماتۋرگيا بولسىن، مەيلى ول رەجيسسۋرا بولسىن. ءبىراق بۇل حالىقارالىق نوميناتسياعا ۇمىتكەر تۋىندى ەمەس، قازاقستاننىڭ جالپاق جۇرتىنا ارنالعان ماعىنالى كومەديا.

مەن ءوزىم «ءسابينا كەلىن» فيلمىنەن بىرنەشە مەسسەدجى بايقادىم. ەڭ ءبىرىنشى كوزگە تۇسەتىنى ول ارينە - باي مەن كەدەيلەردىڭ ماتەريالدىق، رۋحاني جانە مادەني الشاقتىعى. ەكىنشى، جوعارىدا كەلتىرىلگەندەي، اۋىلدى جاعىمدى جاقتارى ۇتىمدى كورسەتىلگەن.

سونداي-اق، قازاق قوعامى ءۇشىن وتە وزەكتى تاقىرىپ، كەلىن مەن ەنە اراسىنداعى قارىم-قاتىناس ماسەلەسى ادەمى قامتىلعان. قاجەتتى قادامداردى جاساساڭ، ەنەنىڭ جۇرەگى ءجىبيتىنىن بايقاۋعا بولادى. تورتىنشىدەن، الەۋمەتتىك جەلىلەردىڭ شىناي جۇزدەسۋگە، تىلدەسۋگە تاتىمايتىنى ءازىل ارقىلى كەرەمەت كەلتىرىلگەن.

بەسىنشىدەن، ەگەر ادام تالپىنسا، ىڭعايلى ورتانى كەز كەلگەن جەردەن جاساي الادى. ءسابينانىڭ كاراوكە كەشتەرى مەن ديسكوتەكانى ۇيىمداستىرۋى وسىنىڭ ايقىن دالەلى بولسا كەرەك.

 P. S. وسى كۇنگە دەيىن ءبىز وتاندىق كينولاردى قولداۋ ماقساتىندا ونىڭ ساپاسىنا كوپ نازار اۋدارماي بارا بەرەتىن ەدىك. مەنىڭ ويىمشا، بىرتە-بىرتە ءبىز ەلىمىزدە تۇسىرىلگەن فيلمدەرگە «وتاندىق» دەگەن جەلەۋمەن، شىن مانىسىندە قىزىق، ءارى ماعىنالى تۋىندى بولعانى ءۇشىن بارا باستايمىز.

دارحان ومىربەك

El.kz