ۇلتتىق ناقىشتا كيىم تىگەتىن جاس ديزاينەرلەردىڭ بايقاۋى ءوتتى
ديزاينەرلەر بايقاۋىن «وتباسىم» ۇلتتىق قۇندىلىقتار ورتالىعى ق ر پرەزيدەنتى جانىنداعى ايەلدەر ءىسى جانە وتباسى-دەموگرافيالىق ساياسات جونىندەگى ۇلتتىق كوميسسيا مەن ق ر مادەنيەت جانە سپورت مينيسترلىگىنىڭ قولداۋىمەن ۇيىمداستىرعان.
«بۇگىن جاس ديزاينەرلەردىڭ بايقاۋىن ۇيىمداستىرىپ وتىرمىز. ماقساتىمىز - ۇلتتىق كيىمدەرىمىزدى قازىرگى زاماننىڭ تالاپتارىنا سايكەستەندىرە تۇرلەندىرۋ. ءبىزدىڭ ۇلتتىق كيىمدەرىمىز الەمدەگى ەڭ ادەمى كيىمدەردىڭ ءبىرى رەتىندە تانىلعان. ءبىراق، ونى كۇندەلىكتى كيىپ ءجۇرۋ ىڭايسىز. ءبىز ۇلتتىق كيىمىمىزدى كەڭ تاراتۋ ءۇشىن، ەڭ الدىمەن ونى جاستار كيۋ كەرەك. ال جاستارعا كيگىزۋ ءۇشىن ونى قازىرگى زامانعا لايىقتاپ تىگۋىمىز كەرەك»، - دەيدى «وتباسىم» ۇلتتىق قۇندىلىقتار ورتالىعىنىڭ ۆيتسە- پرەزيدەنتى كامال الپەيىسوۆا.
بايقاۋدا ءوز كيىم كوللەكتسيالارىن ءسان ۇيلەرىنىڭ وكىلدەرى، تىگىن كاسىپورىندارىنىڭ قىزمەتكەرلەرى، جوعارى وقۋ ورىندارى مەن كوللەدج ستۋدەنتتەرى ۇسىندى. بارلىعى 17 جاس ديزاينەر سىنعا ءتۇستى.
«بايقاۋدا ءبىرىنشى ورىن يەلەنگەن ديزاينەرگە 100 مىڭ، ەكىنشى ورىن يەسىنە 75 مىڭ، ءۇشىنشى ورىندى جەڭىپ العان ديزاينەرگە 50 مىڭ تەڭگە بەرىلەدى. بۇل كوپ ەمەس، ارينە. ءبىراق ءبىز ولاردى ارى قاراي دامۋىنا، ولاردى جارنامالاۋعا جاعداي جاسايمىز»، - دەيدى «وتباسىم» ۇلتتىق قۇندىلىقتار ورتالىعىنىڭ ءتورايىمى شولپان سىزدىقوۆا.
«بايقاۋعا قاتىسقان جاستاردىڭ ءارى قاراي ءوندىرىسىن دامىتۋىنا مۇمكىندىك بەرۋ كەرەك. جالپى، ولاردى دەمەۋ ءۇشىن قارجى كوزدەرىن ىزدەستىرگەن ءجون. وسى باعىتتا جۇمىس جاسايمىز. ءتۇرلى كومپانيالاردى، مينيسترلىكتەردى ىنتىماقتاستىققا شاقىرىپ جاتىرمىز. قولداۋ بولادى دەگەن ۇمىتتەمىز» ، - دەيدى كامال الپەيىسوۆا.
ايىمگۇل ابىلەۆا
