قۇنانباي وسكەنباي ۇلىنا ارنالعان كورمە اشىلدى
بۇل تۋرالى ق ر مادەنيەت جانە سپورت مينيسترلىگىنىڭ باسپا ءسوز قىزمەتى حابارلادى.
تۇڭعىش رەت سالتاناتتى شارادا سازگەر، كۇيشى ءشامىل ءابىلتايدىڭ «قۇنانباي قاجى» كۇيى ورىندالدى.
تاريحي تۇلعا، ءبي، اعا سۇلتان، زامانىمىزدىڭ كورنەكتى قايراتكەرى، ۇلى اقىن ابايدىڭ اكەسى قۇنانباي قاجىعا ارنالعان كورمەدە «قۇنانباي وسكەنباي ۇلىنىڭ اتا-تەگى»، «بيلىك، بولىستىق، قوعامدىق قىزمەتى»، «قۇنانباي تۋرالى ارحيۆ دەرەكتەرى»، «اعا سۇلتاندىق قىزمەتى»، «قاجىلىق ساپارى» سياقتى تاقىرىپتار اشىلدى.
كورمە ماقساتتارى - قۇنانباي وسكەنباي ۇلىن تاريحي تۇلعا، ءبي، اعا سۇلتان، قاجى رەتىندە تانىتۋ، اباي قورىق-مۇراجايىندا جيناقتالعان تاريحي، عىلىمي، ادەبي ماتەريالدار ارقىلى كورسەتۋ، قازاقستان تاريحىندا سول زاماندا ورىن العان تاريحي وزگەرىستەردى كورسەتۋ، ونىڭ قوعامدىق قىزمەتىن دالەلدەيتىن ارحيۆ ماتەريالدارىن كورەرمەن نازارىنا ۇسىنۋ.
كونفەرەنسياعا قاتىسقان قالانىڭ زيالى قاۋىمىنا، سەمەي قالاسىنىڭ شاكارىم اتىنداعى مەملەكەتتىك ۋنيۆەرسيتەتىنىڭ عالىمدارىنا، ادەبيەتشىلەرگە، «شىعىس» وڭىرلىك قولباسشىلىعىنىڭ مەملەكەتتىك ءتىلدى وقىتۋ قىزمەتشىلەرىنە، ۇستازدار مەن ستۋدەنتتەرگە كورمە بويىنشا ەكسكۋرسيا جۇرگىزىلدى.
اۆتورى: دوستىق تالعات ۇلى
khabar.kz
