جەتىمدەردىڭ اقىسىن جەگەندەردىڭ الدى جەتى جىلعا سوتتالدى - ب ق و

ورال. قازاقپارات - ورال قالالىق سوتى مۇگەدەك جانە جەتىم بالالاردىڭ ەسەپشوتتارىنان اقشا جىمقىرعان «قازپوشتا» ا ق فيليالىنىڭ توعىز قىزمەتكەرىنە قاتىستى ۇكىمدى جاريا ەتتى.

ب ق و سوتىنىڭ باسپا ءسوز قىزمەتىنەن تۇسكەن مالىمەتكە قاراعاندا، «قازپوشتا» ا ق فيليالىنىڭ 9 قىزمەتكەرى ماتەريالدى جاۋاپتى تۇلعالار بولا تۇرا، «كولۆير» جۇيەسىمەن وزدەرىنىڭ قۇپيا لوگيندەرى ارقىلى، جالعان شىعىس كاسسالىق وردەرلەر راسىمدەپ، مۇگەدەك جانە جەتىم بالالاردىڭ شوتتارىنان اقشا ۇرلاعان.

اتالعان تۇلعالاردىڭ قىلمىستىق ارەكەتتەرىنىڭ سالدارىنان «قازپوشتا» ا ق عا 21780234 تەڭگە زالال كەلتىرىلگەن.

سوت ۇكىمىمەن «قازپوشتا» ا ق فيليالىنىڭ وپەراتسيالىق ۋچاسكە باسشىسى گۇلنار يسقاقوۆا ق ر ق ك 176-بابى 4-بولىگى، 351-بابى 2-بولىگى بويىنشا كىنالى دەپ تانىلىپ، 5 جىل مەرزىمگە ماتەريالدى جاۋاپتى قىزمەتتى اتقارۋ قۇقىعىنان، مۇلكىن تاركىلەپ، 7 جىل مەرزىمگە باس بوستاندىعىنان ايىرۋ جازاسىن جالپى تارتىپتەگى تۇزەۋ كولونياسىندا وتەۋگە سوتتالدى.

ە. قاراسايەۆا ق ر ق ك 176-بابى 3-بولىگى «ب» تارماعىمەن 3  جىل مەرزىمگە ماتەريالدى جاۋاپتى قىزمەتتى اتقارۋ قۇقىعىنان، مۇلكىن تاركىلەنىپ، 5 جىل مەرزىمگە باس بوستاندىعىنان ايىرىلدى. ول دا جازاسىن جالپى تارتىپتەگى تۇزەۋ مەكەمەسىندە وتەيتىن بولادى.

ءۇش سوتتالۋشىعا سىناق مەرزىمى تاعايىندالدى. سونىمەن بىرگە، تاعى ەكى سوتتالۋشى 1 جىلدان شارتتى تۇردە بوستاندىعىنان شەكتەلدى. بۇدان باسقا بەس جىلعا باس بوستاندىقتارىنان ايىرىلعان ەكى سوتتالۋشىعا جازاسىن وتەۋ 1 جىل مەرزىمگە كەيىنگە قالدىرىلدى.

اۆتور: ەلجان ەرالى