ن. نازاربايەۆ «قازاقستان- تۇركىمەنستان- يران» تەمىر جولىنىڭ باستى ەرەكشەلىكتەرىن اتادى

گورگان. قازاقپارات - بۇگىن «قازاقستان- تۇركىمەنستان- يران» تەمىر جولىنىڭ تۇركىمەن- يران بولىگىنىڭ اشىلۋ سالتاناتىندا ق ر پرەزيدەنتى نۇرسۇلتان نازاربايەۆ اتالعان جولدىڭ باستى ەرەكشەلىكتەرىن اتادى.

«تۇركىمەنستان پرەزيدەنتى گۋربانگۋلى بەردىمۇحامەدوۆ پەن يران يسلام رەسپۋبليكاسىنىڭ پرەزيدەنتى حاسان رۋحاني مىرزا مەن سىزدەردى وسى مەرەكەدە كورگەنىمە قۋانىشتىمىن. ەڭ بىرىنشىدەن، ءبىزدىڭ ەلدەردىڭ تەمىرجولشىلارىن، قۇرىلىسشىلارىن بۇگىنگى مەرەكەمەن شىن جۇرەكتەن قۇتتىقتايمىن. ءبىز كوپتەن كۇتكەن تەمىر جولدىڭ قۇرىلىسى بۇگىن ءبىتتى. وسى ماسەلە ءۇشىن جينالىپ وتىرمىز» ، - دەدى ەلباسى شارا بارىسىندا.

 مەملەكەت باسشىسى ءوز سوزىندە قازاقستان مەن تۇركىمەنستاننىڭ قۇرلىقتىڭ ورتاسىندا ورنالاسقانىن، تەڭىزگە شىعاتىن جولى جوق ەكەندىگىن اتاپ ءوتتى. دەگەنمەن، قازاقستان، تۇركىمەنستان جانە يران مەملەكەتتەرىنىڭ كاسپيي تەڭىزى ارقىلى دا بۇرىننان قارىم- قاتىناس جاساپ كەلگەندىگىن ەسكە سالدى.

«قازىرگى ءىستىڭ تاريحي ءمانى بار. بىرىنشىدەن، ءۇش ەلدىڭ حالقى ءۇشىن جولدىڭ بويىندا نەشە ءتۇرلى ەلدى مەكەندەر پايدا بولىپ، حالىق جۇمىسپەن قامتىلادى، قارىم- قاتىناس جاندانادى. ەكىنشىدەن، ءۇش مەملەكەتتىڭ اراسىنداعى ساۋدا- ساتتىق ۇلعايادى. بيىلعى جىلدىڭ باسىندا ءبىز تۇركىمەنستان مەن قازاقستان اراسىنداعى جولدى ىسكە قوسقانبىز. وسى از ۋاقىتتىڭ ىشىندە ساۋدا- ساتتىق 40 پايىزعا ءوستى. ەندى مىنە ءۇش مەملەكەت اراسىندا تىكەلەي تەمىر جول قاتىناسى ورنادى. ۇشىنشىدەن، بۇل جول ءبىزدىڭ توڭىرەگىمىزدەگى بارلىق كورشىلەرىمىزگە ءوز ىقپالىن تيگىزەدى» ، - دەدى ق ر پرەزيدەنتى.

 سونىمەن قاتار ەلباسى قازاقستان قىتايدان كاسپي تەڭىزىنە دەيىن تىكەلەي تەمىر جول سالعانىن اتاپ ءوتتى.

«مىنا جول سول جولعا قوسىلادى. قىتايعا، قىتاي ارقىلى تىنىق مۇحيتىنا شىعار مۇمكىندىك بار. ول جولدىڭ ۇزىندىعى بۇرىنعى جولدىڭ ۇزىندىعىنان ءۇش ەسە كەم» ، - دەدى مەملەكەت باسشىسى.

 

اۆتور: مارلان جيەمباي