ەلباسى ن. نازاربايەۆ «قازاقستان- تۇركىمەنستان- يران» تەمىر جولىنىڭ تۇركىمەن- يران بولىگىنىڭ اشىلۋ راسىمىنە قاتىستى

گورگان. قازاقپارات - بۇگىن ەلباسى نۇرسۇلتان نازاربايەۆ «قازاقستان- تۇركىمەنستان- يران» تەمىر جولىنىڭ تۇركىمەن- يران بولىگىنىڭ اشىلۋ راسىمىنە قاتىستى.

سالتاناتتى شاراعا تۇركىمەنستان پرەزيدەنتى گۋربانگۋلى بەردىمۇحامەدوۆ پەن يران يسلام رەسپۋبليكاسىنىڭ پرەزيدەنتى حاسان رۋحاني دە قاتىسىپ، ءۇش مەملەكەتتىڭ باسشىلارى تۇركىمەنستان مەن يران تەمىر جولدارىن ءتۇيىستىردى. وسىدان كەيىن قازاقستان استىعىن تيەگەن جۇك پويىزى تۇركىمەنستان تارابىنان يران شەكاراسىن كەسىپ ءوتتى.

 ايتا كەتەرلىگى، ءۇش مەملەكەتتىڭ اۋماعىنان وتەتىن «وزەن-  قىزىلقيا- بەرەكەت- ەترەك- گورگان» تەمىر جولى جەلىسى «سولتۇستىك- وڭتۇستىك» جاڭا حالىقارالىق كولىك ءدالىزىنىڭ ءبىر بولىگى. بۇل جوبا قازاقستان، تۇركىمەنستان جانە يران پرەزيدەنتتەرى قول قويعان بىرلەسكەن دەكلاراتسياعا وراي جۇزەگە اسىرىلۋدا. جولدىڭ 146 شاقىرىمى - قازاقستان، 700 شاقىرىمى - تۇركىمەنستان، ال قالعان 82 شاقىرىمى - يران اۋماعى ارقىلى وتەدى.

 ماگيسترالدىڭ تۇركىمەنستان مەن قازاقستان اراسىنداعى ۋچاسكەسى وتكەن جىلدىڭ مامىرىندا ەكى ەلدىڭ باسشىلارىنىڭ قاتىسۋىمەن رەسمي اشىلعان بولاتىن. بۇگىندە قازاقستان مەن يران اتالعان دەكلاراتسياعا سايكەس ءوز ۋچاسكەلەرىندەگى بولىكتەردى تولىعىمەن اياقتادى. ال تۇركىمەنستان بولسا، تەمىر جولدىڭ قازاقستان باعىتىنداعى 444 شاقىرىمىن اياقتاپ، وتكەن جىلدان باستاپ يران باعىتىنداعى 256 شاقىرىمدى ءوز كۇشتەرىمەن سالۋدا.

اۆتور: مارلان جيەمباي